Argus News - ଏୟାର ଇଣ୍ଡିଆର ହାତ ଛାଡିଦେଲେ ସିଇଓ; ନିର୍ଦ୍ଧାରିତ ସମୟ ପୂର୍ବରୁ ଚାକିରିରୁ ଇସ୍ତଫା

ଭାରତର ଏକ ପ୍ରମୁଖ ଘରୋଇ ବିମାନ ସେବା ଯୋଗାଉଥିବା କମ୍ପାନୀ ଏୟାର ଇଣ୍ଡିଆର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) କ୍ୟାମ୍ପବେଲ ୱିଲସନ୍ ନିଜ ପଦରୁ ଇସ୍ତଫା ଦେଇଛନ୍ତି । ଗତ ସପ୍ତାହର ବୋର୍ଡ ବୈଠକରେ ତାଙ୍କ ଇସ୍ତଫା ଗ୍ରହଣ କରାଯାଇଛି । ତେବେ ସିଇଓ କ୍ୟାମ୍ପବେଲ୍ କାହିଁକି ଏହି ପଦବୀ ଛାଡ଼ିଲେ ସେ ନେଇ ଆରମ୍ଭ ହେଲାଣି କଳ୍ପନା ଜଳ୍ପନା । ତାଙ୍କ ବଦଳରେ ଅନ୍ୟ କୌଣସି ବ୍ୟକ୍ତି ନମିଳିବା ପର୍ଯ୍ୟନ୍ତ ସେ ଏୟାରଲାଇନ୍ସର ସିଇଓ ଭାବରେ କାର୍ଯ୍ୟ କରିବେ । ୱିଲସନ୍ ସେପ୍ଟେମ୍ବର ୨୦୨୬ ପର୍ଯ୍ୟନ୍ତ ଏହି ପଦବୀରେ ରହିବେ ବୋଲି ଆଶା କରାଯାଉଛି ।

• ଶେଷ ହେଲା ୨୦୨୨ରେ ଆରମ୍ଭ ଯାତ୍ରା

କ୍ୟାମ୍ପବେଲଙ୍କ ଇସ୍ତଫା ପରେ ବିମାନ ସେବା ଯୋଗାଉଥିବା କମ୍ପାନୀ ଏବେ ଜଣେ ନୂତନ ସିଇଓ ଖୋଜିବାରେ ଲାଗିଛି। ବୋର୍ଡ ବର୍ତ୍ତମାନ ଅନେକ ବିଶ୍ୱସ୍ତରୀୟ ଏୟାରଲାଇନ୍ସର ମୁଖ୍ୟଙ୍କ ସହ ଆଲୋଚନା କରୁଥିବା ଜଣାପଡ଼ିଛି । ଏଠାରେ କହିରଖୁଛୁ କି, ୱିଲସନ୍ ସେପ୍ଟେମ୍ବର ୨୦୨୨ ମସିହାରେ ୫ ବର୍ଷର ଚୁକ୍ତିରେ ଏୟାର ଇଣ୍ଡିଆରେ ଯୋଗ ଦେଇଥିଲେ । ତେବେ ସେହି ବର୍ଷ ଏୟାରଲାଇନ୍ସର ଘରୋଇକରଣ ମଧ୍ୟ ହୋଇଥିଲା । ତାଙ୍କ କାର୍ଯ୍ୟକାଳ ଜୁଲାଇ ୨୦୨୭ରେ ଶେଷ ହେବାର ଥିଲା, କିନ୍ତୁ ସମୟସୀମା ସରିବା ପୂର୍ବରୁ ସେ ଚାକିରି ଛାଡ଼ିଦେଇଛନ୍ତି ।

• ପୂର୍ବରୁ କେଉଁଠି କାମ କରିଥିଲେ କ୍ୟାମ୍ପବେଲ୍ ?

ମୂଳତଃ ନ୍ୟୁଜିଲ୍ୟାଣ୍ଡର ଅଧିବାସୀ କ୍ୟାମ୍ପବେଲ୍ ୱିଲସନ୍ ଏୟାର ଇଣ୍ଡିଆରେ ଯୋଗଦେବା ପୂର୍ବରୁ, ସିଙ୍ଗାପୁର ଏୟାରଲାଇନ୍ସ (SIA)ରେ ପ୍ରାୟ ୨୬ ବର୍ଷ କାର୍ଯ୍ୟ କରିଥିଲେ । ଏୟାର ଇଣ୍ଡିଆରେ ଥିବା ସମୟରେ, ସେ କମ୍ପାନୀ ପାଇଁ " Vihaan.AI " ନାମକ ଏକ ୫ ବର୍ଷର ରୋଡମ୍ୟାପ୍ ବିକଶିତ କରିଥିଲେ, ଯାହାର ଲକ୍ଷ୍ୟ ଥିଲା ଯେ ଏୟାରଲାଇନ୍ସର ସେବାକୁ ଉନ୍ନତ କରିବା ଏବଂ ଏହାର ନେଟୱାର୍କକୁ ବିସ୍ତାର କରିବା ।

ପଢନ୍ତୁ ଏହି ଖବର: କ୍ୟାବିନ କ୍ରୁଙ୍କ ପାଇଁ ଆସିଲା କଡ଼ା ନିୟମ; ଟିକେ ଓଜନ ଏପଟ ସେପଟ ହେଲେ କଟିବ ଦରମା

• ଇସ୍ତଫା ଦେବା ପଛର କାରଣ

ଏୟାର ଇଣ୍ଡିଆ ବର୍ତ୍ତମାନ ସବୁଠାରୁ ଚ୍ୟାଲେଞ୍ଜିଂ ସମୟ ଦେଇ ଗତି କରୁଛି । କମ୍ପାନୀର କ୍ଷତି ବଢୁଥିବାବେଳେ ପରିଚାଳନାଗତ ଅସୁବିଧା ମଧ୍ୟ ଦେଖାଦେଇଛି । ତେବେ ଏହା କ୍ୟାମ୍ପବେଲଙ୍କ ଇସ୍ତଫା ପଛର କାରଣ ବୋଲି କୁହାଯାଉଛି । ସାମ୍ପ୍ରତିକ ରିପୋର୍ଟ ଅନୁଯାୟୀ, ୨୦୨୪-୨୫ରେ ଏୟାର ଇଣ୍ଡିଆର କ୍ଷତି ହ୍ରାସ ପାଇବା ପରିବର୍ତ୍ତେ ବୃଦ୍ଧି ପାଇବାର ଆକଳନ କରାଯାଉଛି । କମ୍ପାନୀ ମଧ୍ୟ ଯଥେଷ୍ଟ ଋଣ ଚାପର ସମ୍ମୁଖୀନ ହେଉଛି । ଏହା ବ୍ୟତୀତ ଜୁନ ୨୦୨୫ରେ ଅହମ୍ମଦାବାଦରେ ଘଟିଥିବା ଭୟଙ୍କର ବିମାନ ଦୁର୍ଘଟଣା ପରେ ଏୟାରଲାଇନ୍ସ କଡ଼ା ନିୟାମକ ଯାଞ୍ଚ ଅଧୀନରେ ରହିଛି ।