Amit Shah Statement / ଅମିତ ଶାହଙ୍କ ସ୍ପଷ୍ଟୀକରଣ, ଡିଲିମିଟେସନ୍ ପରେ ଦକ୍ଷିଣ ଭାରତର ପ୍ରତିନିଧିତ୍ୱ ବଢ଼ିବ

ଲୋକସଭାରେ ସୀମା ନିର୍ଦ୍ଧାରଣ ବା ‘ଡିଲିମିଟେସନ୍’ ବିଲ୍‌କୁ ନେଇ ଜାରି ରହିଥିବା ବିତର୍କ ମଧ୍ୟରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ବଡ଼ ସ୍ପଷ୍ଟୀକରଣ ରଖିଛନ୍ତି । ବିଶେଷ କରି ଦକ୍ଷିଣ ଭାରତର ରାଜନୈତିକ ପ୍ରଭାବ କମିଯିବ ବୋଲି ଯେଉଁ ଚର୍ଚ୍ଚା ଚାଲିଥିଲା, ତାହାକୁ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ସମ୍ପୂର୍ଣ୍ଣ ଭାବେ ଖଣ୍ଡନ କରିଛନ୍ତି ।

ଗୁରୁବାର ସଂଧ୍ୟାରେ ଲୋକସଭାରେ ସୀମା ପୁନଃନିର୍ଦ୍ଧାରଣ ପ୍ରସଙ୍ଗରେ ଶାହ ବିରୋଧୀଙ୍କୁ ଦେଇଛନ୍ତି କଡ଼ା ଜବାବ । ସେ କହିଛନ୍ତି, ଦକ୍ଷିଣ ଭାରତର ଶକ୍ତି କମିଯିବ ବୋଲି ମିଥ୍ୟା ନ୍ୟାରେଟିଭ୍ ପ୍ରଚାର କରି ଭ୍ରମ ସୃଷ୍ଟି କରାଯାଉଛି । ଏବେ ଲୋକସଭାରେ ୫୪୩ ଆସନ ମଧ୍ୟରୁ ଦକ୍ଷିଣ ଭାରତର ୧୨୯ ସାଂସଦ ଅଛନ୍ତି, ଯାହା ୨୩.୭୬ ପ୍ରତିଶତ ଅଟେ । ପ୍ରସ୍ତାବ ଅନୁସାରେ ଆସନ ସଂଖ୍ୟା ୮୫୦କୁ ବୃଦ୍ଧି ପାଇଲେ, ଦକ୍ଷିଣ ଭାରତର ସାଂସଦ ସଂଖ୍ୟା ୧୯୫ରେ ପହଞ୍ଚିବ । ଯାହା ମୋଟ ସଂଖ୍ୟାର ୨୩.୯୭ ପ୍ରତିଶତରେ ପହଞ୍ଚିବ ବୋଲି ଶାହ ହିସାବ ଦେଇଛନ୍ତି ।

ଗୃହମନ୍ତ୍ରୀ ସ୍ପଷ୍ଟ କରିଛନ୍ତି ଯେ, ନୂଆ ବ୍ୟବସ୍ଥାରେ ଦକ୍ଷିଣ ଭାରତର ପ୍ରତିନିଧିତ୍ୱ କମିବ ନାହିଁ, ବରଂ ସାମାନ୍ୟ ବୃଦ୍ଧି ପାଇବ । ସୀମା ନିର୍ଦ୍ଧାରଣ କମିଶନଙ୍କ ନିୟମ ସମ୍ପୂର୍ଣ୍ଣ ପୁରୁଣା ଆଇନ ଅନୁଯାୟୀ କରାଯାଇଛି । ଏଥିରେ କୌଣସି ପରିବର୍ତ୍ତନ ହୋଇନାହିଁ । ଏବେ ଚାଲିଥିବା କିମ୍ବା ୨୦୨୯ ପର୍ଯ୍ୟନ୍ତ ହେବାକୁ ଥିବା ସମସ୍ତ ନିର୍ବାଚନ ବର୍ତ୍ତମାନର ଆସନ ସଂଖ୍ୟା ଆଧାରରେ ହିଁ ଅନୁଷ୍ଠିତ ହେବ ବୋଲି ଅମିତ ଶାହ ସ୍ପଷ୍ଟ କରିଛନ୍ତି ।

ତେବେ ଆସନ୍ତୁ ନଜର ପକାଇବା ଦକ୍ଷିଣ ଭାରତୀୟ ରାଜ୍ୟୱାରି ତଥ୍ୟ ଉପରେ । ରାଜ୍ୟ ଗୁଡ଼ିକରେ ଏବେ ସଂସଦ ପ୍ରତିନିଧିତ୍ବ କେତେ ରହିଛି ଓ ଡିଲିମିଟେସନ୍ ପରେ କେତେ ବଢ଼ିବ...

ଲୋକସଭା ଆସନ ସଂଖ୍ୟା

ବର୍ତ୍ତମାନ - ୫୪୩
ସୀମା ନିର୍ଦ୍ଧାରଣ ପରେ - ୮୫୦

ଦକ୍ଷିଣ ଭାରତ ରାଜ୍ୟର ଆସନ

କର୍ଣ୍ଣାଟକ

ବର୍ତ୍ତମାନ - ୨୮ (୫.୧୫%)
ସୀମା ନିର୍ଦ୍ଧାରଣ ପରେ - ୪୨ (୫.୪୪%)

ଆନ୍ଧ୍ର ପ୍ରଦେଶ

ବର୍ତ୍ତମାନ - ୨୫ (୪.୬୦%)
ସୀମା ନିର୍ଦ୍ଧାରଣ ପରେ - ୩୮ (୪.୬୫)

ତେଲେଙ୍ଗାନା

ବର୍ତ୍ତମାନ - ୧୭ (୩.୧୩ %)
ସୀମା ନିର୍ଦ୍ଧାରଣ ପରେ - ୨୬ ( ୩.୧୮%)

ତାମିଲନାଡୁ

ବର୍ତ୍ତମାନ - ୩୯ (୭.୧୮ %)
ସୀମା ନିର୍ଦ୍ଧାରଣ ପରେ - ୫୯ (୭.୨୩ %)

କେରଳମ

ବର୍ତ୍ତମାନ - ୨୦ (୩.୬୮ %)
ସୀମା ନିର୍ଦ୍ଧାରଣ ପରେ - ୩୦ (୩.୬୭ %)