Argus News - ପଶ୍ଚିମବଙ୍ଗ ଭବାନୀପୁରରେ ବିଜେପିର ଶକ୍ତି ପ୍ରଦର୍ଶନ, ମମତାଙ୍କ ଗଡ଼ରେ ଅମିତ ଶାହଙ୍କ ରଣହୁଙ୍କାର

ନନ୍ଦିଗ୍ରାମ ପରେ ଆଜି ଭବାନୀପୁରରେ ପ୍ରାର୍ଥୀପତ୍ର ଦାଖଲ କରିଛନ୍ତି ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ । ଏହା ପୂର୍ବରୁ ମମତାଙ୍କ ପାରମ୍ପରିକ ଗଡ଼ରେ ବିଶାଳ ରୋଡ ଶୋ' କରି ଶକ୍ତି ପ୍ରଦର୍ଶନ କରିଛି ବିଜେପି । ଶୁଭେନ୍ଦୁଙ୍କ ସହ ଖୋଲା ଗାଡ଼ିରେ ବୁଲି ପ୍ରଚାର କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ଆଉ ଭବାନୀପୁରଙ୍କୁ ପଶ୍ଚିମବଙ୍ଗରେ ପରିବର୍ତ୍ତନ ପାଇଁ ଦେଇଛନ୍ତି ଆହ୍ବାନ । ସେପଟେ ବିଜେପିର ଅନ୍ୟ ପ୍ରାର୍ଥୀଙ୍କ ପାଇଁ ଆଜି ବୀରଭୁମରେ ପ୍ରଚାର କରିଛନ୍ତି ଓଡ଼ିଶା ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।

ପଶ୍ଚିମବଙ୍ଗ ବିଧାନସଭା ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଗଡ଼ରେ BJPର ଶକ୍ତି ପ୍ରଦର୍ଶନ । ରାଜ୍ୟର ସବୁଠାରୁ ହାଇ-ପ୍ରୋଫାଇଲ୍ ଆସନ 'ଭବାନୀପୁର'ରୁ ବିଜେପି ପ୍ରାର୍ଥୀ ଭାବେ ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ ମଇଦାନକୁ ଓହ୍ଲାଇଛନ୍ତି । ଆଜି ପ୍ରାର୍ଥିପତ୍ର ଦାଖଲ ପୂର୍ବରୁ ଶୁଭେନ୍ଦୁଙ୍କ ସହ ବିଶାଳ ରୋଡ୍ ଶୋ’ କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ଏକ ଖୋଲା ଗାଡ଼ିରେ ଶାହ ଓ ଶୁଭେନ୍ଦୁ ଜନସାଧାରଣଙ୍କୁ ହାତ ହଲାଇ ଅଭିବାଦନ ଜଣାଇବା ସହ ଭୋଟ୍ ମାଗିଛନ୍ତି । ଦଳୀୟ କର୍ମୀଙ୍କ ଭିତରେ ଜୋସ୍ ଭରିଛନ୍ତି । ଭବାନୀପୁରର ଭୋଟରଙ୍କୁ ନିର୍ଭୟରେ ମତଦାନ କରିବାକୁ ଅପିଲ୍ ସହ ଟିଏମସିକୁ ବଙ୍ଗୋପସାଗରରେ ଫିଙ୍ଗିଦେବାକୁ ଆହ୍ବାନ କରିଛନ୍ତି ଅମିତ ଶାହ ।

ଭବାନୀପୁର ଆସନଟି ମମତାଙ୍କ ପାରମ୍ପରିକ ଗଡ଼ । ହେଲେ ଗତ ନିର୍ବାଚନରେ ନନ୍ଦିଗ୍ରାମ ଯିବା ତାଙ୍କୁ ମହଙ୍ଗା ପଡ଼ିଥିଲା । ୨୦୨୧ ନିର୍ବାଚନରେ ତାଙ୍କ ଦଳ ଜିତିଥିଲେ ବି ଖୋଦ ମମତାଙ୍କ ପରାଜୟ ଲଜ୍ଜାଜନକ ପରିସ୍ଥିତି ସୃଷ୍ଟି କରିଥିଲା । ପରବର୍ତ୍ତୀ ସମୟରେ ସେ ଉପନିର୍ବାଚନରେ ଜିତି ମୁଖ୍ୟମନ୍ତ୍ରୀ ହେଲେ, ଆଉ ଏବେ ନିଜ ପାରମ୍ପରିକ ଆସନକୁ ଫେରିଛନ୍ତି । ହେଲେ ଏଥର ମଧ୍ୟ ଶୁଭେନ୍ଦୁଙ୍କୁ ଦୁଇଟି ଆସନ ନନ୍ଦିଗ୍ରାମ ଓ ଭବାନୀପୁରରୁ ପ୍ରାର୍ଥୀ କରି ମମତାଙ୍କୁ ତାଙ୍କ ଘରୋଇ ମାଟିରେ ହିଁ ସିଧାସଳଖ ଚ୍ୟାଲେଞ୍ଜ ଦେଇଛି ବିଜେପି ।

TMC ହାତରୁ କ୍ଷମତା ଛଡ଼ାଇ ଆଣିବା ପାଇଁ ଦଳ ସ୍ବତନ୍ତ୍ର ରଣନୀତି କରିଛି । ପଶ୍ଚିମବଙ୍ଗରେ ପହଞ୍ଚିଛନ୍ତି ଓଡ଼ିଶା ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ବିରଭୁମ୍ ଜିଲ୍ଲା ରାମପୁର ହାଟରେ କରିଛନ୍ତି ରୋଡ୍ ଶୋ' । ହନସନ, ନାଲହାଟି ଓ ମୁରରାଇ ବିଧାନସଭା କ୍ଷେତ୍ରରେ ଦଳୀୟ ପ୍ରାର୍ଥୀଙ୍କ ନାମାଙ୍କନ ରାଲିରେ ସାମିଲ ହୋଇଛନ୍ତି ।
ଗୋଟିଏ ପଟେ ବିଜେପିର ରାଜନୈତିକ ଆକ୍ରମଣ, ଅନ୍ୟପଟେ ମମତା ସରକାରଙ୍କୁ ଅଦାଲତୀ ଝଟକା । ପଶ୍ଚିମବଙ୍ଗ ମାଲଦାରେ ନ୍ୟାୟିକ ଅଧିକାରୀଙ୍କୁ ଦିଆଯାଇଥିବା ଧମକ ଓ ହିଂସାକୁ ନେଇ ସୁପ୍ରିମକୋର୍ଟ କଠୋର ହୋଇଛନ୍ତି । କୋର୍ଟ ଏହି ଘଟଣାକୁ ନ୍ୟାୟିକ ପ୍ରକ୍ରିୟାକୁ ବାଧା ଦେବାକୁ ଏକ ସୁଚିନ୍ତିତ ଷଡ଼ଯନ୍ତ୍ର ବୋଲି କହିବା ସହ ପଶ୍ଚିମବଙ୍ଗ ମୁଖ୍ୟ ସଚିବ, ଗୃହ ସଚିବ ଓ ପୋଲିସ DGଙ୍କ ସମେତ ବରିଷ୍ଠ ଅଧିକାରୀମାନଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି । ନିର୍ବାଚନ କମିଶନଙ୍କ SIR ପ୍ରକ୍ରିୟାରେ ଅଭିଯୋଗ ବିଚାର କରିବାକୁ ୭ ଜଣ ବିଚାର ବିଭାଗୀୟ ଅଧିକାରୀ ମାଲଦାରେ ନିୟୋଜିତ ହୋଇଥିଲେ । ଏମାନଙ୍କ ମଧ୍ୟରେ ୩ ଜଣ ମହିଳା ଅଧିକାରୀ ଥିଲେ । ହେଲେ ସେମାନଙ୍କୁ ପ୍ରାୟ ୯ ଘଣ୍ଟା ଧରି ପ୍ରବଳ ହିଂସା ଓ ଭୟର ସାମ୍ନା କରିବାକୁ ପଡ଼ିଥିଲା ।