ଏଠି ନଥିଲା ପୁଳା ପୁଳା ଟଙ୍କାର ଡିମାଣ୍ଡ । ଅତି ସାଧାରଣ ଢଙ୍ଗରେ ପରସ୍ପରକୁ ଜୀବନ ସାଥୀ କରିଛନ୍ତି ବରକନ୍ୟା । ଜାକଜକମରୁ ଦୂରେଇଛନ୍ତି । ପ୍ରକୃତ ବିବାହ ଉତ୍ସବର ବାର୍ତ୍ତା ବାଣ୍ଟିଛନ୍ତି । ଯୌତୁକ ପ୍ରଥାରୁ ଦୂରେଇ ମାତ୍ର ୧ ଟଙ୍କା ଓ ନଡ଼ିଆ ନେଇ ନିଜ ସାତ ଜନ୍ମର ସାଥୀଙ୍କ ହାତ ଧରିଛନ୍ତି । ଏବେ ଚର୍ଚ୍ଚାରେ ଉତ୍ତରପ୍ରଦେଶ ସହାରନପୁରର ଆର୍ମି ମେଜର ବର ଓ କ୍ୟାପ୍ଟେନ ରାଙ୍କ କନ୍ୟାଙ୍କ ବିବାହ ଉତ୍ସବ ।

ମିରପୁର ଗାଁ ନିବାସୀ ଚୌଧୁରୀ ଓମପାଲ ସିଂ ଭାରତୀୟ ସେନାର ଜଣେ ଅବସରପ୍ରାପ୍ତ ଅଧିକାରୀ । ସେ ସରସାୱା ଆର୍ଯ୍ୟ ଜଟ୍ ସମାଜ ବିକାଶ ସମିତିର ଯୁଗ୍ମ ସଚିବ ଭାବେ କାମ ରୁଛନ୍ତି । ମାର୍ଚ୍ଚ ୧୬ ତାରିଖରେ ସେ ନିଜ ପୁଅ ମେଜର ମଧୁର ଚୌଧୁରୀଙ୍କ ବିବାହ ବ୍ରଜମଣ୍ଡଳର ଅଧିବାସୀ ଜ୍ୟୋତି ସୌରୋତଙ୍କ ସହିତ କରାଇଥିଲେ । ଗୋଟିଏ ପଟେ ବିବାହରେ ଝିଅର ସଉଦା ହେବା ପରି ପୁଳା ପୁଳା ଟଙ୍କା ମାଗିଥାନ୍ତି ବରପକ୍ଷ । କିନ୍ତୁ ଏଠାରେ ମାତ୍ର ୧ ଟଙ୍କା ଓ ନଡ଼ିଆ ନେଇ ବରପକ୍ଷ ବିବାହ କରିଛନ୍ତି ।

ଏ ନେଇ ପରିବାର କହିଛି ଯେ ଉଭୟ ପରିବାର ତୀର୍ଥ ଯାତ୍ରା ସମୟରେ ମଥୁରାରେ ପରସ୍ପରକୁ ଭେଟିଥିଲେ । କଥାବାର୍ତ୍ତା ସମୟରେ ଯେତେବେଳେ ଜ୍ୟୋତିଙ୍କ ପରିବାର ବିବାହ ପାଇଁ ଜଣେ ଉପଯୁକ୍ତ ବରପାତ୍ରକୁ ଖୋଜୁଥିଲେ, ସେତେବେଳେ ମଧୁଙ୍କ ପରିବାର କହିଥିଲେ ଯେ ତାଙ୍କ ପୁଅ ବି ସେନାରେ ମେଜର ଭାବେ କାର୍ଯ୍ୟରତ । ଏହି ସମ୍ପର୍କ ଓ କଥାବାର୍ତ୍ତା ଧୀରେ ଧୀରେ ଆଗକୁ ବଢିଥିଲା ଏବଂ ଶେଷରେ ଉଭୟ ବିବାହ ବନ୍ଧନରେ ବାନ୍ଧି ହୋଇଛନ୍ତି ।

'ବୋହୂ ମୋର ବଡ଼ ଯୌତୁକ'
ବରଙ୍କ ପୁଅ ଚୌଧୁରୀ ଓମପାଲ ସିଂ କହିଛନ୍ତି ଯେ ତାଙ୍କ ପାଇଁ ବୋହୂ ହିଁ ସବୁଠୁ ବଡ଼ ଯୌତୁକ । ସେ ଆହୁରି କହିଛନ୍ତି ଯେ ଏହା ମାଧ୍ୟମରେ ସେ ସମାଜକୁ ବାର୍ତ୍ତା ଦେବାକୁ ଚାହାଁନ୍ତି ଯେ ଝିଅମାନେ ବୋଝ ନୁହଁନ୍ତି ଏବଂ ସେମାନଙ୍କୁ ପାଠ ପଢାଇ ସକ୍ଷମ କରିବା ଉଚିତ । ସେ ନିଜ ଜୀବନରେ କେବେ ହେଲେ ଯୌତୁକ ନେବେ ନାହିଁ ବୋଲି ପଣ କରିଥିଲେ ଏବଂ ସମାଜକୁ ଏକ ସକାରାତ୍ମକ ବାର୍ତ୍ତା ଦେବାକୁ ଚାହୁଁଥିଲେ । ଏଥିଲାଗି ସେ ନିଜ ପୁଅ ବିବାହ ଉତ୍ସବରେ କେବଳ ଟଙ୍କାଟିଏ ନେଇ ବିବାହକୁ ସୁରୁଖୁରୁରେ ସାରିଥିବା କହିଛନ୍ତି ।