School Holiday Cancelled / ୧୫ ଅଗଷ୍ଟରେ ସ୍କୁଲ୍ ଛୁଟି ବାତିଲ ! ପ୍ରଥମରୁ ଦ୍ବାଦଶ ଶ୍ରେଣୀ ଯାଏଁ ପିଲାଙ୍କୁ ଆସିବାକୁ ପଡ଼ିବ ବିଦ୍ୟାଳୟ

ଏଥର ୧୫ ଅଗଷ୍ଟରେ ସ୍କୁଲ୍‌ ଛୁଟି ଭାବି ଘରେ ରହିବାକୁ ଭାବୁଥିବା ଛାତ୍ରଛାତ୍ରୀ ଓ ଅଭିଭାବକଙ୍କ ପାଇଁ ଆସିଛି ଏକ ବଡ଼ ଖବର । ସାଧାରଣତଃ ସ୍ୱାଧୀନତା ଦିବସରେ ସ୍କୁଲ୍‌ ବନ୍ଦ ରହେ, କିନ୍ତୁ ଏଥର ଉତ୍ତରପ୍ରଦେଶର ଗାଜିଆବାଦରେ ବଦଳିଛି ନିୟମ । ଜିଲ୍ଲାପାଳଙ୍କ ନିର୍ଦ୍ଦେଶରେ ୧୫ ଅଗଷ୍ଟରେ ଖୋଲା ରହିବ ସମସ୍ତ ସ୍କୁଲ୍‌ । କେବଳ ସ୍କୁଲ୍‌ ଖୋଲିବ ନାହିଁ, ଛାତ୍ରଛାତ୍ରୀଙ୍କଠାରୁ ଆରମ୍ଭ କରି ଶିକ୍ଷକ-ଶିକ୍ଷୟିତ୍ରୀଙ୍କ ପର୍ଯ୍ୟନ୍ତ ସମସ୍ତଙ୍କୁ ଉପସ୍ଥିତ ରହିବାକୁ ପଡ଼ିବ ।

୧୫ ଅଗଷ୍ଟ ଅର୍ଥାତ୍‌ ସ୍ୱାଧୀନତା ଦିବସ । ଦେଶ ପାଇଁ ଏହା ଗର୍ବ, ସମ୍ମାନ ଓ ଦେଶପ୍ରେମର ଦିନ । ଏହି ଦିନ ଦେଶବ୍ୟାପୀ ବିଭିନ୍ନ ସ୍ଥାନରେ ତ୍ରିରଙ୍ଗା ଉତ୍ତୋଳନ ସହ ସ୍ୱାଧୀନତା ଦିବସ ପାଳନ କରାଯାଏ । ସାଧାରଣତଃ ଏହି ଦିନ ସ୍କୁଲ୍‌ଗୁଡ଼ିକରେ ଛୁଟି ରହିଥାଏ । କିନ୍ତୁ ଏଥର ଉତ୍ତରପ୍ରଦେଶର ଗାଜିଆବାଦରେ ଚିତ୍ର କିଛି ଭିନ୍ନ ରହିବ ।
ଗଜିଆବାଦ ଜିଲ୍ଲାପାଳଙ୍କ ନିର୍ଦ୍ଦେଶ ଅନୁସାରେ, ଅଗଷ୍ଟ ୧୫ରେ ଗାଜିଆବାଦ ଜିଲ୍ଲାର ପ୍ରଥମ ଶ୍ରେଣୀରୁ ଦ୍ବାଦଶ ପର୍ଯ୍ୟନ୍ତ ସମସ୍ତ ସ୍କୁଲ୍‌ ଖୋଲା ରହିବ । ଛାତ୍ରଛାତ୍ରୀଙ୍କ ସହ ସମସ୍ତ ଶିକ୍ଷକ-ଶିକ୍ଷୟିତ୍ରୀଙ୍କୁ ମଧ୍ୟ ସ୍କୁଲ୍‌ରେ ଉପସ୍ଥିତ ରହିବାକୁ ପଡ଼ିବ । ତେଣୁ ୧୫ ଅଗଷ୍ଟର ଛୁଟି ଭାବି ପିଲାଙ୍କୁ ଘରେ ରଖିବା ପୂର୍ବରୁ ଅଭିଭାବକମାନେ ଏହି ନିର୍ଦ୍ଦେଶ ଜାଣିବା ଜରୁରୀ ।

ତେବେ ସ୍କୁଲ୍‌ ଖୋଲା ରହିଲେ ମଧ୍ୟ ପାଠପଢ଼ା ହେବ କି ନାହିଁ, ଏନେଇ ସ୍ପଷ୍ଟ ନିର୍ଦ୍ଦେଶ ଦିଆଯାଇନାହିଁ । ତେବେ ସ୍ୱାଧୀନତା ଦିବସ ଅବସରରେ ସ୍କୁଲ୍‌ଗୁଡ଼ିକରେ ଜାତୀୟ ପର୍ବ ସମ୍ପର୍କିତ ବିଭିନ୍ନ କାର୍ଯ୍ୟକ୍ରମ ଆୟୋଜନ ହେବ । ଛାତ୍ରଛାତ୍ରୀଙ୍କୁ ଦେଶର ଇତିହାସ ଓ ସ୍ୱାଧୀନତା ସଂଗ୍ରାମ ସମ୍ପର୍କରେ ଜଣାଇବା ସହ ସେମାନଙ୍କ ମନରେ ଦେଶପ୍ରେମ ଓ ଦାୟିତ୍ୱବୋଧ ବଢ଼ାଇବା ଉପରେ ଗୁରୁତ୍ୱ ଦିଆଯିବ ।

ଏହା ସହ ଛାତ୍ରଛାତ୍ରୀ ଓ ଅଭିଭାବକମାନେ ତ୍ରିରଙ୍ଗା ସହ ସେଲ୍‌ଫି ନେଇ ‘ହର ଘର ତିରଙ୍ଗା’ ୱେବସାଇଟ୍‌ରେ ଅପଲୋଡ୍‌ କରିବାକୁ ପ୍ରୋତ୍ସାହିତ କରାଯିବ । ସ୍ୱାଧୀନତା ସଂଗ୍ରାମ ଓ ଯୁଦ୍ଧରେ ସହିଦ ହୋଇଥିବା ସୈନିକଙ୍କ ପରିବାରକୁ ମଧ୍ୟ ସ୍କୁଲ୍‌ କାର୍ଯ୍ୟକ୍ରମକୁ ନିମନ୍ତ୍ରଣ କରି ସମ୍ମାନିତ କରିବାକୁ କୁହାଯାଇଛି ।

ଜିଲ୍ଲାପାଳଙ୍କ ନିର୍ଦ୍ଦେଶକୁ ଅବମାନନା କରି ଯଦି କୌଣସି ସ୍କୁଲ୍‌ ୧୫ ଅଗଷ୍ଟରେ ବନ୍ଦ ରହେ, ତେବେ ନିୟମ ଅନୁସାରେ ସମ୍ପୃକ୍ତ ସ୍କୁଲ୍‌ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ । ତେଣୁ ଗାଜିଆବାଦର ଅଭିଭାବକ ଓ ଛାତ୍ରଛାତ୍ରୀଙ୍କ ପାଇଁ ଏଥର ସ୍ୱାଧୀନତା ଦିବସରେ ‘ଛୁଟି’ ନୁହେଁ, ବରଂ ସ୍କୁଲ୍‌ରେ ଦେଶପ୍ରେମର କାର୍ଯ୍ୟକ୍ରମରେ ଯୋଗଦେବା ହେବ ମୁଖ୍ୟ ଆକର୍ଷଣ ।