Auto Hits Woman / ୪୦ ଟଙ୍କା ପାଇଁ ବିବାଦ; ବୃଦ୍ଧ ମହିଳାଙ୍କୁ ଧକ୍କା ଦେଲା ଅଟୋ ଡ୍ରାଇଭର

ମାତ୍ର ୪୦ ଟଙ୍କାକୁ ନେଇ ବିବାଦ । ଶେଷରେ ହସ୍ପିଟାଲ ପହଞ୍ଚିଲେ ବୃଦ୍ଧ ମହିଳା । ୪୦ ଟଙ୍କା ଭଡ଼ାକୁ ନେଇ ସବୁ ମାନବିକତାକୁ ଭୁଲି ଅଟୋ ଡ୍ରାଇଭର ବୃଦ୍ଧ ମହିଳାଙ୍କୁ ଧକ୍କା ଦେଇଛି । ଏଭଳି ଏକ ଅମାନୁଷିକ କାଣ୍ଡ ମହାରାଷ୍ଟ୍ର ଠାଣେ ଜିଲ୍ଲାରେ ଘଟିଥିବା ଦେଖିବାକୁ ମିଳିଛି । ମହିଳାଙ୍କ ବୟସ ପ୍ରାୟ ୬୨ ବର୍ଷ । ୪୦ ଟଙ୍କା ପାଇଁ ବୃଦ୍ଧ ମହିଳାଙ୍କ ହାତ ଭାଙ୍ଗିଯାଇଛି । ଏହି ଘଟଣା ଏବେ ସାର୍ବଜନୀନ ପରିବହନରେ ଯାତ୍ରୀଙ୍କ ସୁରକ୍ଷାକୁ ନେଇ ପ୍ରଶ୍ନ ଉଡ଼ିଛି ।

ପୋଲିସର କହିବାନୁସାରେ, ଏହି ଘଟଣାଟି ମଙ୍ଗଳବାର ଡୋମ୍ବିବଲିଠାରେ ଘଟିଛି । ପୀଡ଼ିତା ହେଉଛନ୍ତି ରିଜା ଜୋସେଫ, ଯିଏକି ନିଜ ପରିବାର ସହିତ କସ୍ତୁରୀ ପ୍ଲାଜାରୁ ଦାୱଡୀ ସ୍ଥିତ ଘରକୁ ଫେରୁଥିଲେ । ରାସ୍ତାରେ ସେମାନେ ଏକ ଅଟୋ ଭଡ଼ା କରୁଥିଲେ । ଡ୍ରାଇଭର ପ୍ରଥମରୁ ୧୨୦ ଟଙ୍କା ଭଡ଼ା ନେବ ବୋଲି କହିଥିଲା । ପରିବାର ସହମତିରେ ସମସ୍ତେ ଅଟୋରେ ବସିଥିଲେ । ଯେତେବେଳେ ବୃଦ୍ଧ ମହିଳା ସମସ୍ତ ପରିବାର ସହିତ ଗନ୍ତବ୍ୟସ୍ଥଳରେ ପହଞ୍ଚିଥିଲେ ସେତେବେଳେ ଅଟୋ ଡ୍ରାଇଭର ୧୬୦ ଟଙ୍କା ମାଗିଥିଲା ।

ବୃଦ୍ଧଙ୍କ ପରିବାର ଲୋକଙ୍କ କହିବାନୁସାରେ, ବିବାଦରୁ ବର୍ତ୍ତିବା ଲାଗି ସେମାନେ ଅଧିକ ଭଡ଼ା ଦେବାକୁ ରାଜି ହୋଇଯାଇଥିଲେ । ଏହାପରେ ମଧ୍ୟ ଅଟୋ ଡ୍ରାଇଭର ଜଣକ ରାସ୍ତାର ଦୂରତା ମଧ୍ୟରେ ଭୁଲ ତଥ୍ୟ ଦେଇ ଗାଳିଗୁଲଜ କରିବାକୁ ଲାଗିଥିଲା । ଏହି ସମୟରେ ବୃଦ୍ଧ ମହିଳାଙ୍କ ପୁଅମାନେ ଅଭଦ୍ର ଭାଷା ଶୁଣି ଅଟୋ ଟାଳକଙ୍କ ସହ ଯୁକ୍ତିତର୍କ କରିଥିଲେ । ଉଭୟ ଗୋଷ୍ଠୀ ମଧ୍ୟରେ ଯୁକ୍ତିତର୍କ ବଢିବା ପରେ ବୃଦ୍ଧି ରିଜା ଜୋସେଫ ହସ୍ତକ୍ଷେପ କରିଥିଲେ । ଏହି ସମୟରେ ଡ୍ରାଇଭର ବୃଦ୍ଧାଙ୍କୁ ଖୁବ ଜୋରରେ ଧକ୍କା ଦେଇଥିଲା । ସନ୍ତୁଳନ ହରାଇ ବୃଦ୍ଧା ଜଣକ ରାସ୍ତା ବାହାରେ ପଡ଼ିଯାଇଥିଲେ ଏବଂ ତାଙ୍କ ବାମ ହାତରେ ଆଘାତ ଲାଗିଛି ।

ପଢନ୍ତୁ ଏହି ଖବର: ବେଶ୍ୟାବୃତ୍ତି ପାଇଁ ବାଧ୍ୟ କଲେ ଶାଶୂଘର ଲୋକେ; ଜୀବନ ହାରିଲେ ମହିଳା

ଘଟଣା ପରେ ସ୍ଥାନୀୟ ଲୋକେ ତୁରନ୍ତ ସାହାଯ୍ୟ କରି ବୃଦ୍ଧାଙ୍କୁ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ । ବୃଦ୍ଧାଙ୍କ ହାତ ଭାଙ୍ଗିଯାଇଥିବା ହସ୍ପିଟାଲରେ ଜଣାପଡ଼ିଛି । ଏବେ ତାଙ୍କର ଚିକିତ୍ସା ଜାରି ରହିଛି । ହସ୍ପିଟାଲରୁ ଦିଆଯାଇଥିବା ବୟାନ ଆଧାରରେ ମାନପାଡ଼ା ପୋଲିସ ଅଭିଯୁକ୍ତ ଅଟୋ ଡ୍ରାଇଭର ବିରୋଧରେ ମାମଲା ରୁଜୁ କରିଛି ।