ବିଦା ହେବେ ବାଂଲାଦେଶୀ ଅନୁପ୍ରବେଶକାରୀ , ରାଜ୍ୟ ଆଇନ ମନ୍ତ୍ରୀଙ୍କ ବଡ ବୟାନ
Key Points
- ବିଦା ହେବେ ବାଂଲାଦେଶୀ ଅନୁପ୍ରବେଶକାରୀ
- ରାଜ୍ୟ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନଙ୍କ ବଡ଼ ବୟାନ
- ପୂର୍ବରୁ ଆସିଥିବା ଲୋକେ CAAରେ ଅନ୍ତର୍ଭୁକ୍ତ ହେବେ କି ନାହଁ କରାଯିବ ବିଚାର
- ତଦନ୍ତ ପରେ ନିଷ୍ପତ୍ତି ନେବେ ରାଜ୍ୟ ସରକାର
- ପଶ୍ଚିମବଙ୍ଗ ଦେଇ କିଏ ଆସୁଛି, କିଏ ଜଳପଥରେ କରୁଛି ଅନୁପ୍ରବେଶ ଚାଲିଛି ଯାଞ୍ଚ
- ପରିଚୟ ପତ୍ର ଯାଞ୍ଚ ସହ ଅନୁପ୍ରବେଶକାରୀଙ୍କ ଉପରେ ତୀକ୍ଷଣ ନଜର
ଅର୍ଗସ ବ୍ୟୁରୋ : ଯେଉଁ ବିଦେଶୀ ଭାରତର ସୀମା ଲଂଘିଛନ୍ତି ସେମାନେ ଯେଉଁ ଦେଶର ହୋଇଥିଲେ ବି ନିଜ ଦେଶକୁ ପ୍ରତ୍ୟାର୍ପିତ କରିଦିଆଯିବ ବୋଲି କହିଛନ୍ତି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ସମ୍ବଲପୁରରେ ବାଂଲାଦେଶୀ ସନ୍ଦେହରେ କିଛି ଯୁବକଙ୍କୁ କାବୁ କରିଛନ୍ତି ବିଜେପି ଯୁବ ମୋର୍ଚ୍ଚାର କର୍ମକର୍ତ୍ତା । ସହରରେ ବେଆଇନ ଭାବେ ବାଂଲାଦେଶୀ ପ୍ରବେଶ କରିଥିବା ସନ୍ଦେହରେ ଏମାନଙ୍କୁ କାବୁ କରି ଥାନାରେ ଜିମା ଦିଆଯାଇଛି । ବୁଢ଼ାରଜା ଅଂଚଳର ଏକ ଫ୍ଲାଟରେ ୩୪ ଜଣ ଯୁବକ ଲୁଚି ରହିଥିଲେ । ଏମାନଙ୍କଠାରୁ ମିଳିଛି ବାଂଲାଦେଶୀ ଆଧାର କାର୍ଡ।
ଭଦ୍ରକ ବାସୁଦେବପୁରରେ ବି ବାଂଲାଦେଶୀ ସନ୍ଦେହରେ 6 ଜଣକୁ ଅଟକ ରଖି ପୋଲିସ ଜିମା ଦିଆଯାଇଛି । ପୁଣି ବାଂଲାଦେଶରେ ହିନ୍ଦୁଙ୍କ ଉପରେ ହେଉଥିବା ଅତ୍ୟାଚାର ପ୍ରତିବାଦରେ ଭଦ୍ରକ ସମରାଇପୁର ମହାବୀର କଲୋନୀ ବାସିନ୍ଦାଙ୍କ ପକ୍ଷରୁ ବିକ୍ଷୋଭ କରାଯାଇଛି । ସେପଟେ ବାଂଲାଦେଶୀ ରୋହିଙ୍ଗ୍ୟାଙ୍କୁ ବିତାଡ଼ିତ ଦାବିରେ କୁଚିଣ୍ଡା ହିନ୍ଦୁ ସମାଜ ପକ୍ଷରୁ ରାଜ୍ୟପାଳଙ୍କୁ ସ୍ମାରକପତ୍ର ଦିଆଯାଇଛି ।
ଅଧିକ ପଢନ୍ତୁ : ବାଂଲାଦେଶରେ ହିନ୍ଦୁ ଅତ୍ୟାଚାରକୁ ନେଇ ବିଭିନ୍ନ ଦେଶରେ ହିନ୍ଦୁ ବିକ୍ଷୋଭ
ବାଂଲାଦେଶରେ ରାଜନୈତିକ ଅସ୍ଥିରତା ଓ ହିଂସା ନେଇ ଓଡ଼ିଶାରେ ଛନକା । ମୁକୁଳା ପଡ଼ି ରହିଛି ଉପକୂଳ । ପାଟ୍ରୋଲିଂ ପାଇଁ ଉପକୂଳରେ ଥିବା ମେରାଇନ ଥାନାରେ ନାହାନ୍ତି ଆବଶ୍ୟକ କର୍ମଚାରୀ। ଯାହାକୁ ନେଇ ଏବେ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ବାଂଲାଦେଶରେ ଅଣାୟତ୍ତ ସ୍ଥିତି। ଅନୁପ୍ରବେଶ ରୋକିବାକୁ କଡ଼ା ପଦକ୍ଷେପ ଗ୍ରହଣ କରିଛନ୍ତି ଭାରତ ସରକାର । ସୀମାବର୍ତ୍ତୀ ରାଜ୍ୟ ଗୁଡ଼ିକରେ ସରକାର ବି ସଜାଗ ରହିଛନ୍ତି।
