ସଫଳତା ସେମାନଙ୍କୁ ମିଳିଥାଏ ଯିଏ ସଫଳତା ପାଇବାକୁ କଠିନ ପରିଶ୍ରମ କରିଥାଏ। ଆଉ ତା' ପାଇଁ ଧୈର୍ଯ୍ୟର ସହିତ ଅପେକ୍ଷା କରିବାକୁ ପଡ଼େ। ଯେତେ ବାଧା ବିଘ୍ନ ଆସିଲେ ବି ସେ ସେହି ଲକ୍ଷ୍ୟରୁ ଓହରିଯାଏନାହିଁ। ଆମେ କହୁଛୁ ବିହାରର ମୁଙ୍ଗେର ଜିଲ୍ଲାର ତିଳକାରି ଗାଁର ମଶରୁମ ମହିଳାଙ୍କ କଥା। ବୀଣା ଦେବୀଙ୍କୁ ଆଜି ସମସ୍ତେ ‘ମଶରୁମ୍ ଲେଡି’ ଭାବେ ଜାଣନ୍ତି। ଏକ ସାଧାରଣ ଗୃହିଣୀ ଠାରୁ ୭୦,୦୦୦ରୁ ଅଧିକ ମହିଳାଙ୍କୁ ସଶକ୍ତ କରିଥିବା ଏହି ମହିଳାଙ୍କ ଯାତ୍ରା ସତରେ ପ୍ରେରଣାଦାୟକ। ତାଙ୍କର ଆର୍ଥିକ ଅବସ୍ଥା ସ୍ବଚ୍ଛଳ ନ ଥିଲା। ଦିନ ଥିଲା ମହିଳା ଜଣକ ନିଜ ଛୁଆଙ୍କ ପେଟକୁ ଦାନା କି ଭଲ କନା ଖଣ୍ଡେ ଦେଇ ପାରୁ ନ ଥିଲେ। ବୀଣା ଦେବୀଙ୍କର ୪ ସନ୍ତାନ ଅଛନ୍ତି। ବହୁ ଦୁଃଖକଷ୍ଟରେ ସେ ତାଙ୍କ ଛୁଆଙ୍କର ଲାଳନ ପାଳନ କରିଛନ୍ତି। କିନ୍ତୁ କେବେ ବି ସେ ନିଜ ଧୈର୍ଯ୍ୟ ହରାଇ ନ ଥିଲେ। ଆଉ ସେ ଦିନେ ଚିନ୍ତା କଲେ ମଶରୁମ ଚାଷ କରିବେ ବୋଲି। କୌଣସି ଜମି କି ଜାଗା ନ ଥିଲା। ପାଖରେ ପଇସା ବି ନ ଥିଲା। ନିଜେ ଶୋଉଥିବା ଖଟରେ ହିଁ ଛତୁ ଚାଷ ପ୍ରଥମେ କରିଥିଲେ।

୨୦୧୩ରେ ସେ କେବଳ ୫୦୦ ଟଙ୍କାରେ ମଶରୁମ୍ ଚାଷ ଆରମ୍ଭ କଲେ। ଗାଁର ଲୋକମାନେ ପ୍ରଥମେ ତାଙ୍କୁ ବହୁତ କିଛି କହିଥିଲେ। ତୁମେ କେବେ ସଫଳ ହୋଇପାରିବନି। କିନ୍ତୁ ସେ ଆଶା ଛାଡ଼ି ନ ଥିଲେ। ପ୍ରଥମ ବର୍ଷରେ ୧୦,୦୦୦ ଟଙ୍କା ଲାଭ କରିବା ପରେ, ବୀନାଙ୍କ ଆତ୍ମବିଶ୍ୱାସ ବଢ଼ିଗଲା। ସେ ବୁଝିଲେ ଯେ ମହିଳାଙ୍କୁ ଅର୍ଥନୈତିକ ଭାବେ ସଶକ୍ତ କରିବାରେ ଏହି ଚାଷ ଏକ ଅସାଧାରଣ ଅସ୍ତ୍ର।

ଆଜି, ବୀନା ୭୦,୦୦୦ରୁ ଅଧିକ ଗାଁ ମହିଳାଙ୍କୁ ଛତୁ ଚାଷ, ପ୍ରସ୍ତୁତି ଓ ବଜାରରେ କିଭଳି ବିକ୍ରି କରାଯିବ ସେନେଇ ତାଲିମ ଦେଇଛନ୍ତି। ରୋଜଗାର ଦେଇଛନ୍ତି। ଆଉ ସେମାନେ ନିଜ ପରିବାର ପାଇଁ ଦୁଇ ପଇସା କମାଉଛନ୍ତି। ବୀଣାଙ୍କୁ ମଶରୁମ ଲେଡି ଉପାଧି ଦିଆଯାଇଛି। ଯାହା ୧୦୦ରୁ ଅଧିକ ଗାଁର ହଜାର ହଜାର ମହିଳାଙ୍କ ଜୀବନରେ ପରିବର୍ତ୍ତନ ଆଣିଛନ୍ତି। ଚାରିଟି ସନ୍ତାନ ପାଳନ କରିବା ଏବଂ ଗ୍ରାମୀଣ ଡାକ୍ତର ଭାବରେ ତାଙ୍କ ସ୍ୱାମୀଙ୍କ ସାଧାରଣ ଆୟରେ ଏକ ପରିବାର ଚଳାଇବା ସହିତ, କିଛି ଦିନ ଚୁଲି ଜଳାଇବା ମଧ୍ୟ ଏକ ଚ୍ୟାଲେଞ୍ଜ ଥିଲା। କିନ୍ତୁ ଆଜି ସେ ସମୟ ବଦଳିଛି। ତାଙ୍କର ପ୍ରଥମ ପ୍ରୟାସରେ, ସେ କେବଳ ଏକ କିଲୋଗ୍ରାମ ଛତୁ ବିହନ ଅର୍ଡର କରିଥିଲେ ଏବଂ ତାଙ୍କ ବିଛଣା ତଳେ ସୀମିତ ସ୍ଥାନରେ ସେଗୁଡ଼ିକୁ ଚାଷ କରିବା ଆରମ୍ଭ କରିଥିଲେ। ବୀଣା ଦେବୀ କହିଛନ୍ତି ଯେ ଛତୁ ଚାଷ ଦେଖାଯାଉଥିବା ଭଳି ସରଳ ନୁହେଁ। ଏଥିପାଇଁ ଆର୍ଦ୍ରତା, ତାପମାତ୍ରା ଏବଂ ପରିଷ୍କାର ପରିଚ୍ଛନ୍ନତାର ସଠିକ ନିୟନ୍ତ୍ରଣ ଆବଶ୍ୟକ, ଯାହା ତାଲିମ କିମ୍ବା ସୁବିଧା ବିନା ପରିଚାଳନା କରିବା କଷ୍ଟକର।

ଆରମ୍ଭରେ କମ୍ ଉତ୍ପାଦନ ସତ୍ତ୍ୱେ, ବୀନା ନିଜ ଜିଦ୍‌ରେ ଅଟଳ ରହିଥିଲେ। ସେ ଭାଗଲପୁରର ସବୋର୍ସ୍ଥିତ ବିହାର କୃଷି ବିଶ୍ୱବିଦ୍ୟାଳୟରୁ ମାର୍ଗଦର୍ଶନ ଲୋଡ଼ିଥିଲେ। ସ୍ଥାନୀୟ ବଜାରରେ ଛତୁର ଚାହିଦା ବୃଦ୍ଧି ପାଇବା ଏବଂ କିଲୋଗ୍ରାମ ପିଛା 200 ଟଙ୍କାରୁ 300 ଟଙ୍କା ପର୍ଯ୍ୟନ୍ତ ମୂଲ୍ୟ ବୃଦ୍ଧି ପାଇବା ସହିତ, ବିନା ଦେବୀ ଲାଭ ପାଇବା ଆରମ୍ଭ କଲେ ଏବଂ ତାଙ୍କର ଆୟ ଶେଷରେ ବାର୍ଷିକ ଲକ୍ଷ ଲକ୍ଷ ଟଙ୍କାରେ ପହଞ୍ଚିଲା। ଏହା ତାଙ୍କ ପରିବାରକୁ ପରିବର୍ତ୍ତନ କଲା। ତାଙ୍କର ପିଲାମାନେ, ଯେଉଁମାନେ ଖାଇବାକୁ କି ପାଠ ପଢ଼ିବାକୁ କୌଣସି ସୁବିଧା ପାଇ ନ ଥିଲେ। ଆଜି ତାଙ୍କର ବଡ଼ ପୁଅ ଇଞ୍ଜିନିୟରିଂ ପଢ଼ୁଛି, ଏବଂ ଅନ୍ୟମାନେ ମଧ୍ୟ ଭଲ ସ୍କୁଲ ଏବଂ କଲେଜରେ ପାଠ ପଢ଼ୁଛନ୍ତି।

ତାଙ୍କର ସଫଳତା ବଢ଼ିବା ସହିତ, କେବଳ ନିଜ ପାଇଁ ନୁହେଁ, ବରଂ ତାଙ୍କ ପରି ଅନ୍ୟ ମହିଳାଙ୍କ ପାଇଁ ତାଙ୍କର ମହତ୍ତ୍ୱାକାଂକ୍ଷା ମଧ୍ୟ ବଢ଼ିଲା। ବୀଣା ଦେବୀଙ୍କ କାର୍ଯ୍ୟର ପ୍ରଭାବ ଅଣଦେଖା ହୋଇନାହିଁ। ୨୦୧୪ ମସିହାରେ, ତାଙ୍କୁ ବିହାର ମୁଖ୍ୟମନ୍ତ୍ରୀ ନୀତିଶ କୁମାର ସମ୍ମାନିତ କରିଥିଲେ। ୨୦୧୮ ମସିହାରେ ସେ ମହିଳା କୃଷକ ପୁରସ୍କାର ପାଇଥିଲେ। ଏବଂ ପରେ ୨୦୧୯ ମସିହାରେ କିଷାନ ଅଭିନବ ପୁରସ୍କାର ପାଇଥିଲେ। ୨୦୨୦ ମସିହାରେ ଅନ୍ତର୍ଜାତୀୟ ମହିଳା ଦିବସରେ ତାଙ୍କୁ ତତ୍କାଳୀନ ରାଷ୍ଟ୍ରପତି ରାମନାଥ କୋବିନ୍ଦ ସମ୍ମାନିତ କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ତାଙ୍କ ମନ କି ବାତ ରେଡିଓ କାର୍ଯ୍ୟକ୍ରମ ସମୟରେ ତାଙ୍କ କାହାଣୀକୁ ପ୍ରଶଂସା କରିଥିଲେ। ବୀନାଙ୍କ କାହାଣୀ ଆମକୁ ଶିଖାଏ – ପରିସ୍ଥିତି ଯେତେ କଷ୍ଟକର ହେଲେ ମଧ୍ୟ, ଆତ୍ମବିଶ୍ୱାସ ଓ ଦୃଢ ସଙ୍କଳ୍ପ ଥିଲେ, ସ୍ଵପ୍ନକୁ ସତ୍ୟ କରିହେବ। ସେ କେବଳ ଏକ କୃଷକ ନୁହେଁ – ସେ ଗାଁ ମହିଳାଙ୍କ ପାଇଁ ଏକ ବଡ଼ ପ୍ରେରଣା ବୋଲି କହିଲେ ଭୁଲ ହେବନାହିଁ।

Argus News | argus news | Odisha Latest News, Breaking News, Trending News, Live TV