GST Bribe Case / କେସ୍ ରଫାଦଫା ପାଇଁ ୮ ଲକ୍ଷ ଲାଞ୍ଚ ମାଗୁଥିଲେ GST ଅଧିକାରୀ; ଏମିତି ଧରାପଡ଼ିଲେ

ବେଙ୍ଗାଲୁରୁ: ପାଖରେ ବଡ଼ ସରକାରୀ ଚାକିରି । ତଥାପି କମିନି ଲୋଭ । ଲାଞ୍ଚ ନେଉଥିବାବେଳେ ଧରାପଡ଼ିଲେ ଜଣେ ଜିଏସ ଟିଅଧିକାରୀ । ଏହି କେନ୍ଦ୍ର ସରକାରୀ କର୍ମଚାରୀ ଜଣକ ₹୮ ଲକ୍ଷ ଟଙ୍କା ଲାଞ୍ଚ ନେଉଥିବା ସମୟରେ ଧରାପଡ଼ିଛନ୍ତି । ଏହି ଲାଞ୍ଚୁଆ ଅଫିସର ଜଣକ କେନ୍ଦ୍ରୀୟ ସଦନରେ କାର୍ଯ୍ୟରତ ଥିଲେ । ଏକ ମିଥ୍ୟା ଅଭିଯୋଗକୁ ବନ୍ଦ କରିଦେବା ପାଇଁ ସେ ୮ ଲକ୍ଷ ଟଙ୍କା ଲାଞ୍ଚ ମାଗିଥିବା ଅଭିଯୋଗ ହୋଇଛି । କର୍ଣ୍ଣାଟକର ରାଜଧାନୀ ବେଙ୍ଗାଲୁରୁରୁ ଏହି ଘଟଣା ସାମ୍ନାକୁ ଆସିଛି।

• ପୂରା ଘଟଣା କ’ଣ?

ବେଙ୍ଗାଲୁରୁ ସହରର ଲୋକାୟୁକ୍ତ ଦଳ, ପିସି ଆଇନ ୧୯୮୮ (୨୦୧୮ରେ ସଂଶୋଧିତ)ର ଧାରା ୭ଏ ଅନୁଯାୟୀ କେନ୍ଦ୍ର ସରକାରଙ୍କ ଜଣେ ସରକାରୀ କର୍ମଚାରୀଙ୍କ ବିରୁଦ୍ଧରେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ଲାଞ୍ଚ ଗ୍ରହଣ କରିବା ସମୟରେ ସରକାରୀ ଅଧିକାରୀଙ୍କୁ ଲାଞ୍ଚ ଟଙ୍କା ସହ ଧରିଛନ୍ତି । ଅଭିଯୁକ୍ତଙ୍କ ନାମ ମୋହିତ ପ୍ରତାପ ସିଂହ ବୋଲି ଜଣାପଡ଼ିଛି । ସେ କୋରାମଙ୍ଗଲା କେନ୍ଦ୍ରୀୟ ସଦନରେ କାର୍ଯ୍ୟରତ ଥିବାବେଳେ ଦକ୍ଷିଣ କମିଶନରେଟର ଦକ୍ଷିଣ ଡିଭିଜନ-୪, ଏ-ରେଞ୍ଜର କେନ୍ଦ୍ରୀୟ GST, ସୁପରିଣ୍ଟେଣ୍ଡେଣ୍ଟ ଭାବରେ କାର୍ଯ୍ୟ କରୁଛନ୍ତି । ତାଙ୍କ ସହିତ ଜଣେ ମଧ୍ୟସ୍ଥି ସଲମାନ ଶେଖ ମଧ୍ୟ ଧରାପଡ଼ିଛନ୍ତି ।

• ମିଥ୍ୟା ଅଭିଯୋଗ ବନ୍ଦ କରିବା ପାଇଁ ଲାଞ୍ଚ ନେଉଥିଲେ

ଲୋକାୟୁକ୍ତ କାର୍ଯ୍ୟାଳୟ ଅନୁସାରେ, ଏକ ମିଥ୍ୟା କେନ୍ଦ୍ରୀୟ ଜିଏସଟି ଅଭିଯୋଗ ବନ୍ଦ କରିବା ପାଇଁ ପୀଡିତ ସୟଦ ଜମିରଙ୍କଠାରୁ ₹୮ ଲକ୍ଷ ଲାଞ୍ଚ ଦାବି କରାଯାଇଥିଲା । ଏହି ଖବର ପାଇବା ପରେ ଲୋକାୟୁକ୍ତ ଏକ ଜାଲ ବିଛାଇଲେ । ଲୋକାୟୁକ୍ତ ପୋଲିସ ଇନ୍ସପେକ୍ଟର ବିଜୟା କୃଷ୍ଣ ଏବଂ ତାଙ୍କ ଦଳ କେନ୍ଦ୍ରୀୟ GST ଅଧୀକ୍ଷକଙ୍କୁ କୋରାମଙ୍ଗଲାର କେନ୍ଦ୍ରୀୟ ସଦନରେ ତାଙ୍କ ଚାମ୍ବରରେ ଲାଞ୍ଚ ଗ୍ରହଣ କରୁଥିବା ସମୟରେ ଧରିଥିଲେ । କର୍ତ୍ତୃପକ୍ଷ ଏବେ ଏହି ମାମଲାର ଅଧିକ ତଦନ୍ତ କରୁଛନ୍ତି ।

ପଢନ୍ତୁ ଏହି ଖବର: କେସ୍ ଡାଏରୀ ଦାଖଲ ପାଇଁ ଅଭିଯୁକ୍ତଙ୍କ ସମ୍ପର୍କୀୟଙ୍କ ଠାରୁ ଲାଞ୍ଚ; ଧରାପଡ଼ିଲେ ମହିଳା IIC

• ଲାଞ୍ଚୁଆ ତହସିଲଦାର ଗିରଫ

ଏଠାରେ କହିରଖୁଛୁ କି, ବୁଧବାର କର୍ଣ୍ଣାଟକ ଲୋକାୟୁକ୍ତ ଆଉ ଏକ ମାମଲାରେ ଜଣେ ଲାଞ୍ଚୁଆ ତହସିଲଦାରଙ୍କୁ ଗିରଫ କରିଥିଲେ । ଲୋକାୟୁକ୍ତ ଅଧିକାରୀମାନେ ଧାରୱାଡର ତହସିଲଦାରଙ୍କୁ ୫୦ ଲକ୍ଷ ଟଙ୍କା ଲାଞ୍ଚ ନେଉଥିବା ବେଳେ ଧରିଥିଲେ । ଏହାକୁ କର୍ଣ୍ଣାଟକର ଏପର୍ଯ୍ୟନ୍ତର ସବୁଠାରୁ ବଡ଼ ଲାଞ୍ଚ ମାମଲା ବୋଲି କୁହାଯାଉଛି । ତହସିଲଦାର ୩୩ ଏକର ଜମିର ମାଲିକାନା କାଗଜପତ୍ର ବଦଳାଇବା ପାଇଁ ପୀଡିତଙ୍କଠାରୁ ଏହି ଲାଞ୍ଚ ଦାବି କରିଥିଲେ । ଏହି ଲାଞ୍ଚ ରାଶି ପ୍ରତ୍ୟେକ ୫୦ ଲକ୍ଷ ଟଙ୍କାର ଦୁଇଟି କିସ୍ତିରେ ଦାବି କରାଯାଇଥିଲା । ଅଭିଯୋଗ ହୋଇଛି ଯେ ଅଧିକାରୀ ଜଣକ ଲାଞ୍ଚ ଭାବରେ ମୋଟ ୧ କୋଟି ଟଙ୍କା ଏବଂ ୧ ଏକର ଜମି ଦାବି କରିଥିଲେ ।