Bengaluru techie couple death / ସହିପାରିଲେନି ସ୍ଵାମୀଙ୍କ ମୃତ୍ୟୁ ଦୁଃଖ; ୧୭ ମହଲାରୁ ଡେଇଁଲେ ମହିଳା

ଡକାଡକି ହୋଇ ପଛକୁ ପଛ ଚାଲିଗଲେ ଦମ୍ପତି । ଏମିତି ଏକ ଖରାପ ସମୟ ଆସିଲା ଯେ ଦୁଇ ଜଣଙ୍କର ଏକାଦିନରେ ମୃତ୍ୟୁ ଘଟିଛି । ତେଲେଙ୍ଗାନାର ଏକ ଯୁବ ଟେକ୍ନିସିଆନ୍ ଦମ୍ପତି ବେଙ୍ଗାଲୁରୁସ୍ଥିତ ତାଙ୍କ ଘରେ ଏକ ଦୁଃଖଦ ଘଟଣାକ୍ରମରେ ଆତ୍ମହତ୍ୟା କରିଛନ୍ତି । ସ୍ଵାମୀଙ୍କ ଆତ୍ମହତ୍ୟା ପରେ ପତ୍ନୀ ମଧ୍ୟ ଛାତରୁ ଡେଇଁ ଆତ୍ମହତ୍ୟା କରିଛନ୍ତି । ଆତ୍ମହତ୍ୟା କୌଣସି ସମସ୍ୟାର ସମାଧାନ ନଥିଲେ ବି ଏଭଳି ଘଟଣା ସମସ୍ତଙ୍କୁ ଦୁଃଖିତ କରିଛି ।

• କଣ ଥିଲା ଘଟଣା ?

ତେଲେଙ୍ଗାନାର ସିଦ୍ଧିପେଟର ଜଣେ ସଫ୍ଟୱେର୍ ଇଞ୍ଜିନିୟର ଭାନୁ ଚନ୍ଦର ରେଡ୍ଡୀ କୁଣ୍ଟା (୩୨) ସୋମବାର ଦିନ ତାଙ୍କ ଆପାର୍ଟମେଣ୍ଟର ଏକ କୋଠରୀରେ ଫାଶୀ ଲଗାଇ ଆତ୍ମହତ୍ୟା କରିଥିଲେ । ତାଙ୍କ ପତ୍ନୀ ବିବି ସାଜିଆ ସିରାଜ (୩୧) ମଧ୍ୟ ଜଣେ ଟେକ୍ନିସିଆନ୍, ଯିଏକି ପ୍ରମୁଖ ଟେକ୍ କମ୍ପାନୀ IBMରେ କାମ କରୁଥିଲେ । ସେ ଅଫିସରୁ ଘରକୁ ଫେରିବା ପରେ ତାଙ୍କ ଘରର କବାଟ ବନ୍ଦ ଥିବା ଦେଖିଥିଲେ ।

ଯେତେବେଳେ ସେ ତାଙ୍କ ସ୍ୱାମୀଙ୍କୁ ବାରମ୍ବାର କବାଟ ଠକ୍ ଠକ୍ କରି ଡାକିଥିଲେ, ସେତେବେଳେ କୌଣସି ଉତ୍ତର ମିଳିନଥିଲା । ଏହାପରେ ସେ ସୁରକ୍ଷା କର୍ମୀ ଏବଂ ପଡ଼ୋଶୀମାନଙ୍କୁ ଏନେଇ ସୂଚିତ କରିଥିଲେ । ଯେତେବେଳେ ପଡ଼ୋଶୀମାନେ ଜୋରଜବରଦସ୍ତ କବାଟ ଖୋଲିଥିଲେ, ସମସ୍ତେ ହତବାକ୍ ହୋଇଥିଲେ । କେହି ନିଜ ଆଖିକୁ ବିଶ୍ଵାସ କରିପାରିନଥିଲେ । କାଲି କଥା କହୁଥିବା ମଣିଷଟି ଆଜି ନିର୍ଜୀବ ପାଲଟିଯାଇଛି । କାରଣ କବାଟ ଖୋଲିବା ପରେ ସମସ୍ତେ ଭାନୁଙ୍କୁ ମୃତ ଦେଖିଲେ ।

• ସ୍ଵାମୀଙ୍କ ବିୟୋଗ ସହିପାରିଲେନି ମହିଳା

ସ୍ଵାମୀଙ୍କୁ ମୃତ ପାଇବା ପରେ ସାଜିଆ ନିଜକୁ ସମ୍ଭାଳିପାରିନଥିଲେ । ଏହାର କିଛି ମିନିଟ୍ ପରେ, ସାଜିଆ ସେହି ଆବାସିକ କମ୍ପ୍ଲେକ୍ସର ୧୭ ମହଲାରୁ ଡେଇଁ ମୃତ୍ୟୁବରଣ କରିଛନ୍ତି । ପ୍ରାରମ୍ଭିକ ସୂଚନା ଅନୁସାରେ, ଏହି ଦମ୍ପତି ୯ ବର୍ଷ ପୂର୍ବରୁ ବିବାହ କରିଥିଲେ । ବିବାହ ପୂର୍ବରୁ ସେମାନେ ଲିଭ୍-ଇନ୍ ରିଲେସନସିପରେ ରହୁଥିଲେ । ପୋଲିସକୁ ମିଳିଥିବା କିଛି ସୂତ୍ର ଅନୁସାରେ, ବିବାହ ପରେ ଉଭୟଙ୍କ ମଧ୍ୟରେ ଅନେକ ସମୟରେ ଝଗଡ଼ା ହେଉଥିଲା ।

ପଢନ୍ତୁ ଏହି ଖବର: ପାକିସ୍ତାନରୁ ଆସିଲା ବଡ଼ ଖବର; ଶେଷରେ ମଲା ଜୈସ ଆତଙ୍କୀ ମସୁଦ ଅଜହର ଭାଇ

ତେବେ ତେଲେଙ୍ଗାନାରେ ପରିବାର ସଦସ୍ୟଙ୍କ ଦ୍ୱାରା ଦାଖଲ ଅଭିଯୋଗ ଆଧାରରେ ଅପ୍ରାକୃତିକ ମୃତ୍ୟୁର ଦୁଇଟି ପୃଥକ ରିପୋର୍ଟ ଦାଖଲ କରାଯାଇଛି । ତଦନ୍ତକାରୀମାନେ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରି ସମ୍ଭାବ୍ୟ ସ୍ୱାସ୍ଥ୍ୟ ସମସ୍ୟା, ସମ୍ପର୍କ ସମସ୍ୟା ଏବଂ ଭାବପ୍ରବଣ ଯନ୍ତ୍ରଣା ସମେତ ମୃତ୍ୟୁର କାରଣ ହେଉଥିବା ପରିସ୍ଥିତିର ତଦନ୍ତ କରୁଛନ୍ତି ବୋଲି ଅଧିକାରୀମାନେ କହିଛନ୍ତି ।

ବି.ଦ୍ର: ଆତ୍ମହତ୍ୟା କୌଣସି ସମସ୍ୟାର ସମାଧାନ ନୁହେଁ । ଯଦି ଆପଣ ଅବସାଦଗ୍ରସ୍ତ ଅଛନ୍ତି, ତେବେ ଆଦୌ ବିଚଳିତ ହୁଅନ୍ତୁ ନାହିଁ । ଦୟାକରି ଆପଣଙ୍କର ନିକଟସ୍ଥ ମାନସିକ ସ୍ୱାସ୍ଥ୍ୟ ବିଶେଷଜ୍ଞଙ୍କ ସହିତ ଯୋଗାଯୋଗ କରନ୍ତୁ ।