Argus News - ବିଜେପିର 46 ତମ ପ୍ରତିଷ୍ଠା ଦିବସ,୧୯୮୦ରେ ପ୍ରତିଷ୍ଠା ହୋଇଥିଲା ଦଳ

ଭୁବନେଶ୍ବର,୦୬/୦୪: ବିଶ୍ବର ସର୍ବବୃହତ ରାଜନୈତିକ ଦଳ ବିଜେପିର ଆଜି 46 ତମ ପ୍ରତିଷ୍ଠା ଦିବସ । 45 ବର୍ଷ ତଳେ ଆଜିର ଦିନରେ ଅର୍ଥାତ 6 ଏପ୍ରିଲ 1980ରେ ଆଟଳ ବିହାରୀ ବାଜପେୟୀ ଓ ଲାଲକୃଷ୍ଣ ଆଡଭାନୀଙ୍କ ସମେତ 11 ଜଣ ନେତା ମିଶି ମୁମ୍ବାଇର ସମୁଦ୍ର କୂଳରେ ଭାରତୀୟ ଜନତା ପାର୍ଟିର ସ୍ଥାପନା କରିଥିଲେ। ବାଜପେୟୀ ବନିଥିଲେ ପ୍ରତିଷ୍ଠାତା ସଭାପତି । ଦଳ ଗଠନ ପରେ 1984ରେ ବିଜେପି ପ୍ରଥମ ଥର ପାଇଁ ଲୋକସଭା ନିର୍ବାଚନର ସାମ୍ନା କରିଥିଲା । ସାରା ଦେଶରେ 224 ଜଣ ପ୍ରାର୍ଥୀ ପଦ୍ମଫୁଲ ଚିହ୍ନରେ ନିର୍ବାଚନ ଲଢିଥିଲେ। କିନ୍ତୁ ମାତ୍ର 2 ଟି ଆସନରେ ହିଁ ଜିତି ପାରିଥିଲେ ଦଳର ପ୍ରାର୍ଥୀ । 108 ଟି ଆସନରେ ବିଜେପି ପ୍ରାର୍ଥୀ ଅମାନତ ହରାଇଥିଲେ। କିନ୍ତୁ ଦଳ ହାର ମାନିନଥିଲା । ଆହୁରି ମଜଭୁତିର ସହ 1989 ନିର୍ବାଚନର ସମ୍ନା କରିଥିଲା ଦଳ । ସେତେବେଳେ ଦଳର ସଭାପତି ମଙ୍ଗ ଧରିଥାନ୍ତି ଲାଲକୃଷ୍ଣ ଆଡଭାନୀ।

1989ରେ 225ଟି ଆସନରେ ପ୍ରାର୍ଥୀ ଦେଇଥିଲା ବିଜେପି। ସେଥିରୁ 86 ଆସନରେ ଦଳକୁ ମିଳିଥିଲା ବିଜୟ । ଏହି ବିଜୟ ସର୍ଭଭାରତୀୟ ସ୍ତରରେ ବିଜେପିର ସଂଗଠନ ବିସ୍ତାର କରିବାରେ ସାହାଯ୍ୟ କରିଥିଲା। 1989ରେ ବିଜେପିର ବାହ୍ୟ ସମର୍ଥନରେ କେନ୍ଦ୍ରରେ ଭିପି ସିଂହ ସରକାର ଗଠନ କଲେ । କିନ୍ତୁ ବିଜେପି ପରବର୍ତ୍ତି ନିର୍ବାଚନରେ ଏକ ବଡ଼ ବିଜୟ ପାଇଁ ରଣନୀତି ପ୍ରସ୍ତୁତ କରିବା ଆରମ୍ଭ କରିଦେଇଥିଲା । ରାମ ଜନ୍ମ ଭୂମି ପ୍ରସଙ୍ଗକୁ ଯୋରଦାର ଢଙ୍ଗରେ ଉଠାଇଥିଲା ବିଜେପି । ଏଥିସହ ଦେଶରେ ବିଜେପିର ଏକ ହିନ୍ଦୁ କଠୋରପନ୍ଥୀ ଦଳ ଭାବେ ଛବି ତିଆରି ହୋଇସାରିଥିଲା । ବିହାରରେ ଆଡଭାନୀଙ୍କ ରଥଯାତ୍ରାକୁ ଲାଲୁ ଯାଦବ ଅଟକାଇବା ଘଟଣା ବିଜେପିକୁ ଭିପି ସିଂହ ସରକାରରୁ ସମର୍ଥନ ପ୍ରତ୍ୟାହାର ପାଇଁ ବାଧ୍ୟ କରିଥିଲା । ଏହାପରେ କଂଗ୍ରେସ ସମର୍ଥନରେ ଗଠିତ ଚନ୍ଦ୍ରଶେଖରଙ୍କ ସରକାର ମାତ୍ର 4 ମାସ ହିଁ ତିଷ୍ଠିପାରିଲା ।

1991ରେ ଦେଶରେ ହେଲା ସାଧାରଣ ନିର୍ବାଚନ । ଏଥର 468 ପ୍ରାର୍ଥୀଙ୍କୁ ମଇଦାନକୁ ଓହ୍ଲାଇଥିଲା ବିଜେପି । ଆଉ ସମସ୍ତଙ୍କୁ ଚମକାଇ 120 ଆସନ ହାସଲ କରିଥିଲା ବିଜେପି ଆଉ ବନିଥିଲା ଦେଶର ଦ୍ବିତୀୟ ବୃହତ୍ତମ ରାଜନୈତିକ ଦଳ । ସାରା ଦେଶରେ ବିଜେପି ପାଇଥିବା ଭୋଟହାର 20.11 ପ୍ରତିଶତରେ ପହଞ୍ଚିଯାଇଥିଲା। ସବୁଠୁ ବଡ଼ ଦଳ କଂଗ୍ରେସ ସରକାର ଗଠନ କଲା । ପ୍ରଧାନମନ୍ତ୍ରୀ ବନିଲେ ପିଭି ନରସିଂହ ରାଓ। ଆଉ ମୁଖ୍ୟ ବିରୋଧୀ ଦଳ ଆସନରେ ବସିଲା ବିଜେପି । କଂଗ୍ରେସ ସରକାର 5 ବର୍ଷ ଚାଲିଲା କିନ୍ତୁ ପିଭି ନରସିଂହ ରାଓ ସରକାର ବିରୋଧରେ ପୁଳା ପୁଳା ଦୁର୍ନୀତି ଅଭିଯୋଗ ଆସିଲା। ବିଜେପି ଏହି ଦୁର୍ନୀତିକୁ ମୁଖ୍ୟ ପ୍ରସଙ୍ଗ କରି 1996 ଲୋକସଭା ନିର୍ବାଚନ ଲଢିଲା । ଆଉ କଂଗ୍ରେସକୁ ପଛକୁ ଠେଲି 161 ଆସନ ସହ ଲୋକସଭାରେ ବିଜେପି ବନିଥିଲା ନମ୍ବର ୱାନ ପାର୍ଟି । ରାଷ୍ଟ୍ରପତିଙ୍କ ଆମନ୍ତ୍ରଣ କ୍ରମେ ଅଟଳବିହାରୀ ବାଜପେୟୀ ବିଜେପି ସରକାରର ପ୍ରଧାନମନ୍ତ୍ରୀ ଭାବେ ଶପଥ ନେଲେ । କିନ୍ତୁ ସଂଖ୍ୟା ଯୋଗାଡ଼ରେ ସମର୍ଥ ହୋଇପାରିଲାନି ଦଳ । ମାତ୍ର 13 ଦିନରେ ଭାଙ୍ଗିଯାଇଥିଲା ବାଜପେୟୀ ସରକାର । କିଛି ଛୋଟ ଦଳ କଂଗ୍ରେସ ସମର୍ଥନରେ ସରକାର ଗଢିଲେ। ଦେବଗୌଡ଼ା ଓ ଆଇ.କେ ଗୁଜରାଲ କ୍ରମାନ୍ବୟରେ ମେଣ୍ଟ ସରକାରର ପ୍ରଧାନମନ୍ତ୍ରୀ ବନିଲେ। କିନ୍ତୁ ମାତ୍ର 18 ମାସ ହିଁ ତିଷ୍ଠି ପାରିଥିଲା ଏହି ସରକାର । ଏଥି ମଧ୍ୟରେ ବିଜେପି ବୁଝିସାରିଥିଲା କେନ୍ଦ୍ରରେ ଶାସନ କରିବାକୁ ହେଲେ ମେଣ୍ଟ ରାଜନୀତିକୁ ଆପଣାଇବା ଛଡ଼ା ବାଟ ନାହିଁ । ତେଣୁ ବିଜେପି ବିଭିନ୍ନ ରାଜ୍ୟରେ ଆଞ୍ଚଳିକ ଦଳଙ୍କ ସହ ନିର୍ବାଚନ ପୂର୍ବରୁ ମେଣ୍ଟ କରିଥିଲା । ଆଉ ବିଜେପିର ଏହି ପରୀକ୍ଷା ସଫଳ ବି ହେଲା ।

1998ରେ ହୋଇଥିବା ସାଧାରଣ ନିର୍ବାଚନରେ ବିଜେପି 182ଟି ଆସନରେ ବିଜୟ ହାସଲ କଲା । ସହଯୋଗୀ ଦଳଙ୍କୁ ନେଇ ଏନଡିଏ ସରକାରର ପ୍ରଧାନମନ୍ତ୍ରୀ ଭାବେ ଦ୍ବିତୀୟ ଥର ଶପଥ ନେଲେ ଆଟଳ ବିହାରୀ ବାଜପେୟୀ । କିନ୍ତୁ ଏଆଇଏଡିଏମକେର ସମର୍ଥନ ପ୍ରତ୍ୟାହାର ଯୋଗୁଁ ମାତ୍ର ଏଥର 13 ମାସ ହିଁ ଚାଲି ପରିଥିଲା ବାଜପେୟୀଙ୍କ ସରକାର । ଅନାସ୍ଥା ପ୍ରସ୍ତାବରେ ଗୋଟିଏ ଭୋଟରେ ହାରିବା ପରେ 1999ରେ ପୁଣି ଥରେ ହୋଇଥିଲା ଲୋକସଭା ନିର୍ବାଚନ । କିନ୍ତୁ ପୂର୍ବ ଅଭିଜ୍ଞତାରୁ ବିଜେପି ଶିଖି ସାରିଥିଲା ମେଣ୍ଟ ସରକାର ଚଳାଇବାର ସଫଳ ଫର୍ମୁଲା । 1999 ନିର୍ବାଚନରେ ବିଜେପିର ଆସନ ବଢିଲା ନାହିଁ ସତ କିନ୍ତୁ ଏନଡିଏର ଆସନ ସଂଖ୍ୟା ଆହୁରି ମଜଭୁତ ହୋଇଯାଇଥିଲା। ଯାହାର ଫଳ ସ୍ବରୂପ ଏଥର କେନ୍ଦ୍ରରେ ସଂପୂର୍ଣ୍ଣ 5 ବର୍ଷ ପୂରଣ କରିଥିଲା ବିଜେପି । ଏହି ସମୟ ଭିତରେ ବିଭିନ୍ନ ରାଜ୍ୟରେ ବିଜେପି ନିଜର ସରକାର ଗଠନ କରିବା ସହ ବହୁ ରାଜ୍ୟରେ ଆଞ୍ଚଳିକ ଦଳଗୁଡ଼ିକ ସହ ମିଶି ମେଣ୍ଟ ସରକାର ଗଠନ କରିଥିଲା । 2003 ଶେଷ ବେଳକୁ ହୋଇଥିବା ବିଧାନସଭା ନିର୍ବାଚନରେ ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡ଼ରେ ବିଜେପି ସରକାର ଗଠନ କରିଥିଲା । ଏହା ବିଜେପିର ଉତ୍ସାହ ଏତେ ବଢାଇ ଦେଇଥିଲା ଯେ ଇଣ୍ଡିଆ ସାଇନିଂ ଓ ଫିଲ ଗୁଡ୍ ସ୍ଲୋଗାନ ସହ 2004ରେ ଲୋକସଭା ନିର୍ବାଚନ ଲଢିଥିଲା ବିଜେପି କିନ୍ତୁ ନିର୍ବାଚନ ପରିଣାମ ବିଜେପି ପାଇଁ ବି ଫିଲ ବ୍ୟାଡ ସାବ୍ୟସ୍ତ ହୋଇଥିଲା । ମାତ୍ର 138ଟି ଆସନରେ ଜିତି ପାରିଥିଲା ବିଜେପି । କେନ୍ଦ୍ରରେ ଗଠନ ହେଲା କଂଗ୍ରେସ ନେତୃତ୍ବାଧୀନ ୟୁପିଏ ସରକାର । ମନମୋହନ ସିଂହ ହେଲେ ପ୍ରଧାନମନ୍ତ୍ରୀ ।
ପଢନ୍ତୁ ଏହି ଖବର:ପଞ୍ଜାବ BJP ମୁଖ୍ୟାଳୟରେ ବିସ୍ଫୋରଣ ପଛରେ ISI, ୫ ଜଣଙ୍କୁ ବାନ୍ଧିଲା ପୋଲିସ୍
2009 ନିର୍ବାଚନରେ ବାଜପେୟୀ ଅସୁସ୍ଥତା କାରଣରୁ ରାଜାନୀତିରୁ ନିଷ୍କ୍ରିୟ ହୋଇସାରିଥିଲେ । ଆଡଭାନୀଙ୍କ ନେତୃତ୍ବରେ ବିଜେପି ନିର୍ବାଚନ ଲଢିଲା । କିନ୍ତୁ 2004 ଠାରୁ ଆହୁରି ଖରାପ ପ୍ରଦର୍ଶନ କଲା ଦଳ । ଦଳ ମାତ୍ର 116ଟି ଆସନରେ ସୀମିତ ରହିଗଲା ବିଜେପିର ସଦସ୍ୟ ସଂଖ୍ୟା । ପୁଣି କେନ୍ଦ୍ରରେ ସରକାର ଗଢିଲା କଂଗ୍ରେସ। ଏହାପରେ ବିଜେପିରେ ମୋଦି ଯୁଗର ଆରମ୍ଭ ହେଲା ।

2014 ନିର୍ବାଚନରେ ନରେନ୍ଦ୍ର ମୋଦିଙ୍କ ନାଁରେ ନିର୍ବାଚନ ଲଢିଲା ଦଳ । କଂଗ୍ରେସ ସରକାରର ଦୁର୍ନୀତିରେ ବ୍ୟତିବ୍ୟସ୍ତ ଭାରତରେ ମୋଦି ଲହର ଏଭଳି ବୋହିଲା ଯେ 2014 ନିର୍ବାଚନରେ ଇତିହାସ ରଚିଲା ବିଜେପି । ମୋଦିଙ୍କ ନେତୃତ୍ବରେ ନିଜ ଦମରେ ମ୍ୟାଜିକ ନମ୍ବର ଟପି 281 ସିଟରେ ବିଜୟ ହାସଲ କଲା ବିଜେପି । 1984 ନିର୍ବାଚନ ପରେ ପ୍ରଥମ ଥର ପାଇଁ ଦେଶରେ କୌଣସି ଦଳକୁ ପୂର୍ଣ୍ଣ ବହୁମତ ମିଳିଥିଲା । ବିଜେପିର ଭୋଟ୍ ସେୟାର ମଧ୍ୟ ବଢି 31. 34 ପ୍ରତିଶତ ଯାଏ ପହଞ୍ଚି ଯାଇଥିଲା। ଏହି ନିର୍ବାଚନରେ ମୋଦି ଲହର ଏତେ ପ୍ରଚଣ୍ଡ ଥିଲା ଯେ ଦେଶର ସର୍ବପୁରାତନ ଦଳ କଂଗ୍ରେସ 50 ଆସନ ବି ଜିତି ପାରିଲା ନାହିଁ । ମୋଦି ଲହର ଦିନକୁ ଦିନ ଦେଶରେ ଆହୁରି ପ୍ରଖର ହୋଇ ଚାଲିଥିଲା । ବିଜେପି କେନ୍ଦ୍ରରେ କ୍ଷମତା ସହ ଅନେକ ରାଜ୍ୟରେ କ୍ଷମତାସୀନ ହୋଇଚାଲିଲା ।
2019 ନିର୍ବାଚନ ବେଳେକୁ ବିଜେପି ଏତେ ଶକ୍ତିଶାଳୀ ହୋଇସାରିଥିଲା ଯେ ପୂର୍ବ ରେକର୍ଡକୁ ଟପି ଏଥର 303 ଆସନରେ ବିଜୟ ହାସଲ କରିଥିଲା ବିଜେପି । ଆଉ ଭୋଟ ହାର 37.76 ପ୍ରତିଶତରେ ପହଞ୍ଚି ଯାଇଥିଲା । 2024 ନିର୍ବାଚନରେ ବିଜେପି 240 ଆସନରେ ଜିତିଥିଲା । ଭୋଟ ହାର 36.56 ପ୍ରତିଶତ ଥିଲା । ଏକଦା କେବଳ ଉତ୍ତର ଭାରତ ପାର୍ଟି ଭାବେ ପରିଚିତ ବିଜେପି ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ବରେ ପୂର୍ବ, ପଶ୍ଚିମ ଉତ୍ତର , ଦକ୍ଷିଣ ସବୁଠି ନିଜର ମଜଭୁତ ଉପସ୍ଥିତି ଜାହିର କରିବା ସହ ଅଧିକାଂଶ ରାଜ୍ୟରେ ସରକାର ଗଠନ କରିବାରେ ସକ୍ଷମ ହୋଇଛି । ଆଉ ବିଜେପିର ଛବି କେବଳ ଏକ କଠୋର ହିନ୍ଦୁତ୍ବବାଦୀ ଦଳରେ ସୀମିତ ରହିନାହିଁ। ବିଜେପିର ପୂର୍ବ ସ୍ବରୂପ ଭାରତୀୟ ଜନସଂଘର ପ୍ରତିଷ୍ଠାତା ଦୀନଦୟାଲ ଉପାଧ୍ୟାୟଙ୍କର ଯେଉଁ ମନ୍ତ୍ର ଥିଲା ଅନ୍ତୋଦୟ ସେହି ରାସ୍ତାରେ ଚାଲିଛନ୍ତି ମୋଦି ସରକାର ।

କେନ୍ଦ୍ର ସରକାରଙ୍କର ମୁଖ୍ୟ ସ୍ଲୋଗାନ ପାଲଟିଛି ସବକା ସାଥ୍, ସବକା ବିକାଶ ଓ ସବକା ବିଶ୍ବାସ । ଏହି ମନ୍ତ୍ର ସହ ନରେନ୍ଦ୍ର ମୋଦି ଙ୍କ ନେତ୍ବତ୍ବରେ ବିଜେପି ଅପ୍ରତିଦ୍ବନ୍ଦ୍ବୀ ରାଜନୈତିକ ଶକ୍ତି ଭାବେ ନିଜର କଳେବର ଲଗାତାର ବଢାଇ ଚାଲିଛି । ଆମେ ମୋଦ ସରକାର ଭାରତକୁ ବିଶ୍ବଗୁରୁ ବନାଇବା ଲକ୍ଷ୍ୟ ନେଇ ଲଗାତାର ଉଦ୍ୟମ କରିଚାଲିଛନ୍ତି ।