ଶୁକ୍ରବାର ୧୫ ତମ ଉପରାଷ୍ଟ୍ରପତି ଭାବେ ଶପଥ ଗ୍ରହଣ କରିଛନ୍ତି ସିପି ରାଧାକ୍ରିଷ୍ଣନ୍ । ଶୁକ୍ରବାର ସକାଳେ ରାଷ୍ଟ୍ରପତି ଭବନରେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ ରାଧାକ୍ରିଷ୍ଣନଙ୍କୁ ଶପଥ ପାଠ କରାଇଛନ୍ତି । ତେବେ ବଡ଼ କଥା ହେଉଛି, ଏହି ଶପଥ ଗ୍ରହଣ ଉତ୍ସବରେ ବିରୋଧୀ ଦଳ ନେତା ତଥା କଂଗ୍ରେସ ସାଂସଦ ରାହୁଲ ଗାନ୍ଧୀ ଅନୁପସ୍ଥିତ ଥିଲେ । ରାହୁଲ ଗାନ୍ଧୀଙ୍କ ଅନୁପସ୍ଥିତି ପାଇଁ ବିଜେପି କଂଗ୍ରେସ ନେତାଙ୍କୁ ସମାଲୋଚନା କରିଥିଲା । ଏମିତିକି ବିଜେପି ରାହୁଲ ଗାନ୍ଧୀଙ୍କ ମାଲେସିଆ ଗସ୍ତ ଉପରେ ମଧ୍ୟ ପ୍ରଶ୍ନ ଉଠାଇଛି ।

ବିଜେପି ରାଷ୍ଟ୍ରୀୟ ମୁଖପାତ୍ର ପ୍ରଦୀପ ଭଣ୍ଡାରୀ ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ' ରେ ଏକ ପୋଷ୍ଟରେ ଅଭିଯୋଗ କରିଛନ୍ତି ଯେ ରାହୁଲ ଗାନ୍ଧୀ ଏହି କାର୍ଯ୍ୟକ୍ରମକୁ 'ବୟକଟ' କରିଛନ୍ତି । ପ୍ରଦୀପ ଭଣ୍ଡାରୀ ଆହୁରି ଲେଖିଛନ୍ତି ଯେ, ରାହୁଲ ଗାନ୍ଧୀ ଭାରତୀୟ ସମ୍ବିଧାନକୁ ଘୃଣା କରନ୍ତି ! ରାହୁଲ ଗାନ୍ଧୀ ଭାରତୀୟ ଗଣତନ୍ତ୍ରକୁ ଘୃଣା କରନ୍ତି !

ବିଜେପି ମୁଖପାତ୍ର କହିଛନ୍ତି ଯେ ରାହୁଲ କିଛି ଦିନ ପୂର୍ବରୁ ଲାଲକିଲ୍ଲାରେ ସ୍ୱାଧୀନତା ଦିବସ ସମାରୋହରେ ଯୋଗ ଦେଇ ନଥିଲେ ଏବଂ ଆଜି ସେ ଉପରାଷ୍ଟ୍ରପତିଙ୍କ ଶପଥ ଗ୍ରହଣ ଉତ୍ସବରେ ମଧ୍ୟ ଅନୁପସ୍ଥିତ ଥିଲେ । ଯେଉଁ ବ୍ୟକ୍ତି ଏପରି ସାମ୍ବିଧାନିକ ଅବସରକୁ ଅଣଦେଖା କରନ୍ତି ସେ ସାର୍ବଜନୀନ ଜୀବନର ଯୋଗ୍ୟ ହୋଇପାରିବେ କି ?
ଭଣ୍ଡାରୀ ଆହୁରି ଦାବି କରିଛନ୍ତି ଯେ ଗାନ୍ଧୀଙ୍କ ପାଖରେ ବିଦେଶରେ ଛୁଟି କାଟିବା ପାଇଁ ସମୟ ଅଛି କିନ୍ତୁ ସରକାରୀ କାର୍ଯ୍ୟକ୍ରମରେ ଯୋଗଦେବା ପାଇଁ ନୁହେଁ। ସେ ରାହୁଲ ଗାନ୍ଧୀଙ୍କୁ 'ଭାରତୀୟ ଗଣତନ୍ତ୍ର ପାଇଁ ବିପଦପୂର୍ଣ୍ଣ' ବୋଲି କହିଥିଲେ।

Rahul Gandhi hates Indian Constitution!

Rahul Gandhi hates Indian democracy!

Rahul Gandhi boycotts official Vice President Swearing in ceremony!

Few days back he had boycotted celebration of India's independence at Red Fort!

Can a man who despises India's independence…

— Pradeep Bhandari(प्रदीप भंडारी)🇮🇳 (@pradip103) September 12, 2025

କଂଗ୍ରେସ ଏହାର ନେତା ରାହୁଲ ଗାନ୍ଧୀଙ୍କ ସପକ୍ଷରେ ବାହାରିଛନ୍ତି । କଂଗ୍ରେସ ନେତା ଉଦିତ ରାଜ କହିଛନ୍ତି ଯେ ବିରୋଧୀ ଦଳ ନେତା ପ୍ରତ୍ୟେକ ସରକାରୀ କାର୍ଯ୍ୟକ୍ରମରେ ଯୋଗଦେବା ପାଇଁ କୌଣସି ପ୍ରୋଟୋକଲ ନାହିଁ। ଉଦିତ ରାଜ କହିଛନ୍ତି ଯେ କଂଗ୍ରେସ ଅଧ୍ୟକ୍ଷ ଦଳର ପ୍ରତିନିଧିତ୍ୱ କରନ୍ତି। ବିଜେପି ସମ୍ବିଧାନକୁ ନଷ୍ଟ କରୁଛି, ଯେତେବେଳେ ରାହୁଲ ଗାନ୍ଧୀ ଏହାକୁ ସୁରକ୍ଷା ଦେବା ପାଇଁ ଲଢ଼ୁଛନ୍ତି।

ଏନଡିଏ ସହଯୋଗୀ ଶିବସେନା ମଧ୍ୟ ବିରୋଧୀ ଦଳ ନେତାଙ୍କ ଅନୁପସ୍ଥିତିକୁ ସମାଲୋଚନା କରିଛି। ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ କହିଛନ୍ତି ଯେ ରାଜନୈତିକ ପ୍ରତିଦ୍ୱନ୍ଦ୍ୱିତାକୁ ସାମ୍ବିଧାନିକ କାର୍ଯ୍ୟ ଉପରେ ପ୍ରଭାବ ପକାଇବା ଉଚିତ୍ ନୁହେଁ ।