କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେଙ୍କ ବିରୋଧରେ ନିର୍ବାଚନ କମିଶନଙ୍କୁ ଅଭିଯୋଗ କରିଛି ବିଜେପି । କେନ୍ଦ୍ରମନ୍ତ୍ରୀ କିରଣ ରିଜିଜୁ, ନିର୍ମଳା ସୀତାରମଣ, ଅର୍ଜୁନ ରାମ ମେଘୱାଲଙ୍କ ସହ ଏକ ଉଚ୍ଚସ୍ତରୀୟ ପ୍ରତିନିଧି ଦଳ ଆଜି ନୂଆଦିଲ୍ଲୀରେ ନିର୍ବାଚନ କମିଶନଙ୍କୁ ଭେଟି ଅଭିଯୋଗ ପତ୍ର ଦେଇଛନ୍ତି । ଚେନ୍ନାଇର ଏକ ନିର୍ବାଚନୀ ସଭାରେ ପ୍ରଧାନମନ୍ତ୍ରୀ ମୋଦିଙ୍କ ପ୍ରତି ଖଡଗେ, ଅପଶବ୍ଦ ପ୍ରୟୋଗ କରିଥିବା ନେଇ ବିଜେପି ଫେରାଦ ହୋଇଛି । ବିଜେପି ଦାବି କରିଛି ଯେ -ଚେନ୍ନାଇରରେ ଆୟୋଜିତ ଏକ ନିର୍ବାଚନୀ ସଭାରେ ପ୍ରଧାନମନ୍ତ୍ରୀଙ୍କ ପ୍ରତି ଅପଶବ୍ଦ ପ୍ରୟୋଗ କରିଥିଲେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ।

ରାଜନୈତିକ ବୟାନବାଜିର ସଵୁ ସୀମା ଲଙ୍ଘିଯାଇ, ବିରୋଧୀ ଓ ସାଧାରଣ ଲୋକଙ୍କୁ ପ୍ରଧାନମନ୍ତ୍ରୀ ଆତଙ୍କିତ କରୁଥିବା ଭଳି ଅମୂଳକ ଅଭିଯୋଗ ଆଣିଥିଲେ । ଯାହାକୁ କଡ଼ା ଭାଷାରେ ନିନ୍ଦା କରିଛି ବିଜେପି । ଦେଶର ପ୍ରଧାନମନ୍ତ୍ରୀଙ୍କ ପ୍ରତି ଅଶାଳୀନ ଭାଷାର ପ୍ରୟୋଗ ଗଣତନ୍ତ୍ର ପ୍ରତି ଘୃଣ୍ୟ ଅପମାନ ଓ ଜନମତ ପ୍ରତି କୁଠାରଘାତ । ଗଣତାନ୍ତ୍ରିକ ପଦ୍ଧତିରେ ନିର୍ବାଚିତ ଓ ଦେଶର ସେବା ପାଇଁ ସମର୍ପିତ ପ୍ରଧାନମନ୍ତ୍ରୀଙ୍କ ପ୍ରତି ବିରୋଧୀଙ୍କ ଏଭଳି ମାନସିକତାକୁ ଦେଶବାସୀ କେବେହେଲେ ଗ୍ରହଣ କରିବେ ନାହିଁ ।

ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ପ୍ରତି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କ ଦ୍ୱାରା କରାଯାଇଥିବା ଅଶୋଭନୀୟ ମନ୍ତବ୍ୟ କେବଳ ନିନ୍ଦନୀୟ ନୁହେଁ, ବରଂ ଏହା ରାହୁଲ ଗାନ୍ଧୀଙ୍କ ନେତୃତ୍ୱରେ କଂଗ୍ରେସର ସମ୍ପୂର୍ଣ୍ଣ ଭୁଶୁଡ଼ି ପଡ଼ିଥିବା ଓ ପତନଶୀଳ ଚିନ୍ତାଧାରାର ଏକ ଉଦାହରଣ । ଦେଶର ପ୍ରଧାନମନ୍ତ୍ରୀଙ୍କ ପାଇଁ ଏହି ସ୍ତରର ଭାଷା ପ୍ରୟୋଗ କରିବା, ୧୪୦ କୋଟି ଦେଶବାସୀଙ୍କ ଜନାଦେଶ ଏବଂ ଭାରତର ଗଣତାନ୍ତ୍ରିକ ମର୍ଯ୍ୟାଦା ଉପରେ ପ୍ରହାର ।

ବିବାଦ ପରେ ଖଡଗେ ସଫେଇ ରଖି କହିଥିଲେ ଯେ, ଆତଙ୍କବାଦୀ ଶବ୍ଦକୁ ସେ ଆକ୍ଷରିକ ଭାବେ ବ୍ୟବହାର କରିନାହାନ୍ତି । ସେ କେବଳ ଏହର ଭାବାର୍ଥ ବୁଝାଇବାକୁ ଚାହୁଁଥିଲେ । କିନ୍ତୁ ବିଜେପିର ଅଭିଯୋଗ ପରେ ଭାରତୀୟ ନିର୍ବାଚନ କମିଶନ୍ କି ପଦକ୍ଷେପ ନେଉଛନ୍ତି, ତା ଉପରେ ନଜର ରହିଛି ।

ଏଥିସହ ପଢ଼ନ୍ତୁ: 'ଭୟ ଓ ଦୁର୍ନୀତିର ରାଜନୀତିକୁ ପ୍ରତ୍ୟାଖ୍ୟାନ କରିବେ ପଶ୍ଚିମବଙ୍ଗର ଜନତା': ଧର୍ମେନ୍ଦ୍ର ପ୍ରଧାନ