ଅର୍ଗସ ବ୍ୟୁରୋ : ପଶ୍ଚିମବଙ୍ଗରେ ଅଧିକରୁ ଅଧିକ ଲୋକସଭା ସିଟ୍ ହାତେଇବାକୁ କୌଣସି ବି କସରତ ଛାଡିନି ବିଜେପି । ଗତକାଲି ୧୧୧ ଜଣ ପ୍ରାର୍ଥୀଙ୍କ ତାଲିକା ବିଜେପି ତରଫରୁ ଘୋଷଣା କରାଯାଇଥିବାବେଳେ, ଏହି ଲିଷ୍ଟରେ ରହିଛନ୍ତି ବହୁଚର୍ଚ୍ଚିତ ପଶ୍ଚିମବଙ୍ଗ ସନ୍ଦେଶଖାଲି ଘଟଣାର ପୀଡିତା ରେଖା ପାତ୍ର । ପଶ୍ଚିମବଙ୍ଗର ବଶୀରହାଟ ଲୋକସଭା ସିଟରୁ ରେଖାଙ୍କୁ ଟିକେଟ୍ ଦେଇଛି ବିଜେପି । 

ଗତ କିଛି ଦିନ ଧରି ପଶ୍ଚିମବଙ୍ଗର ସନ୍ଦେଶଖାଲି ଘଟଣା ବେଶ ଚର୍ଚ୍ଚାରେ ରହିଥିଲା । ଏମିତି କି ଏହି ଘଟଣାରେ ଟିଏମସି ନେତା ଶାହାଜାହାନ୍ ଶେଖଙ୍କୁ ଗିରଫ ମଧ୍ୟ କରାଯାଇଥିଲା । ଆଉ ଏହି ଘଟଣା ପରେ ଏବେ ଏହି ଆନ୍ଦୋଳନର ମୁଖ୍ୟ ଚେହେରା କୁହାଯାଉଥିବା ରେଖାପାତ୍ରଙ୍କୁ ବିଜେପି ଦେଇଛି ଲୋକସଭା ଟିକେଟ୍ । 

ଅଧିକ ପଢନ୍ତୁ ଭାରତ ଖବର

ପଶ୍ଚିମବଙ୍ଗର ୪୨ଟି ଲୋକସଭା ଆସନ ମଧ୍ୟରୁ ୩୮ଟି ସିଟରେ ପ୍ରାର୍ଥୀ ଘୋଷଣା କରିସାରିଛି ବିଜେପି । କେବଳ ଡାଇମଣ୍ଡ ହାର୍ବର, ଆସନସୋଲ, ବୀରଭୂମି ଓ ଝାଡଗ୍ରାମର ପ୍ରାର୍ଥୀ ଘୋଷଣା କରିବା ବାକି ଅଛି । ତେବେ କେମିତି ପଶ୍ଚିମବଙ୍ଗର ଅଧିକରୁ ଅଧିକ ଲୋକସଭା ଆସନ ବିଜେପିକୁ ହାତକୁ ଯିବ, ସେନେଇ ଦଳ ସ୍ୱତନ୍ତ୍ର ରଣନୀତି ପ୍ରସ୍ତୁତ କରୁଥିବା କୁହାଯାଉଛି ।