ଆଜି ଭାରତ ବନ୍ଦ ଡାକରା ଦେଇଛନ୍ତି କେନ୍ଦ୍ରୀୟ ଶ୍ରମିକ ସଂଗଠନ ଓ ସ୍ବାଧୀନ ଫେଡେରେସନ୍ । ଦେଶବ୍ୟାପୀ ଧର୍ମଘଟ ଡାକରାକୁ ସମର୍ଥନ କରିଛନ୍ତି ପ୍ରମୁଖ ବାମପନ୍ଥୀ ଦଳ । ସିପିଆଇ, ସିପିଏମ ଓ ଫରୱାର୍ଡ ବ୍ଲକ ଭଳି ବାମ ଦଳଗୁଡ଼ିକ ଏହି ଧର୍ମଘଟକୁ ସଫଳ କରିବାକୁ ଆହ୍ବାନ ଦେଇଛନ୍ତି । କେନ୍ଦ୍ର ସରକାର ଶ୍ରମିକ, କୃଷକ, ଛାତ୍ର, ଯୁବକ, ମହିଳା ଓ ସଂଖ୍ୟାଲଘୁଙ୍କ ସ୍ବାର୍ଥକୁ ଅଣଦେଖା କରୁଥିବା ଅଭିଯୋଗ କରି ଏହି ଧର୍ମଘଟ ଡକରା ଦିଆଯାଇଛି ।

ତେବେ ବିଭିନ୍ନ ସଂଗଠନ ପକ୍ଷରୁ ଭାରତ ବନ୍ଦ ଡାକରା ପ୍ରସଙ୍ଗରେ ପ୍ରତିକ୍ରିୟା ରଖିଛି ବିଜେପି । ଅତି କଡ଼ା ଭାଷାରେ ବିଜେପି କହିଛି, ଯେଉଁମାନେ ଆଜି ବିରୋଧ କରୁଛନ୍ତି, ସେମାନେ ସରକାରରେ ଥିଲାବେଳେ ଶ୍ରମିକମାନେ ନିର୍ଯାତିତ ହେଉଥିଲେ । ଏହି ସଂଗଠନଗୁଡ଼ିକ ଶ୍ରମିକଙ୍କୁ ନେଇ ବେପାର କରୁଛନ୍ତି, ଶ୍ରମିକ ଆନ୍ଦୋଳନରେ ଯେଉଁ ସଂଗଠନ ମାନଙ୍କର ରୋଜି ରୁଟି ଚାଲୁଛି ସେମାନେ ଶ୍ରମିକଙ୍କ ନାଁରେ ବର୍ଷ ବର୍ଷ ଧରି ରାଜନୀତି କରୁଥିବା ବିଜେପି ଅଭିଯୋଗ କରିଛି ।

ପଢ଼ନ୍ତୁ ଏହି ଖବର: ଆସନ୍ତା କାଲି କେନ୍ଦ୍ରୀୟ ବାଣିଜ୍ୟ ସଂଗଠନର ଭାରତ ବନ୍ଦ ଡାକରା, ବିଜେପି କହିଲା ପ୍ରଭାବହୀନ ।

ପୂର୍ବରୁ ୨୯ଟି ଶ୍ରମ ଆଇନ ଥିଲା, ଯାହାର କ୍ଷତି ଭାରତର ଶ୍ରମିକମାନେ ଭୋଗୁଥିଲେ । ଆଉ ଏବେ ଯେଉଁମାନେ ସଂସ୍କାରକୁ ବିରୋଧ କରୁଛନ୍ତି, ଯେଉଁମାନେ ଆନ୍ଦୋଳନ କରୁଛନ୍ତି, ସେମାନେ ଆଗରୁ କଳ କାରଖାନା ବନ୍ଦର ସୂତ୍ରଧର ଥିଲେ ବୋଲି କହିଛନ୍ତି ବିଜେପି ମୁଖପାତ୍ର ।