Rahul Gandhi Controversy / ରାହୁଲ ଗାନ୍ଧିଙ୍କ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀଙ୍କୁ ଅପମାନ, ଅଶାଳୀନ ମନ୍ତବ୍ୟକୁ ନେଇ ସାରା ଦେଶରେ ତୁମ୍ବିତୋଫାନ

ଛାତ୍ରୋଁ କି ଗୁଞ୍ଜ କାର୍ଯ୍ୟକ୍ରମ ମଞ୍ଚରେ ରାହୁଲ ଗାନ୍ଧି । ଶିକ୍ଷା ବ୍ୟବସ୍ଥା ଉପରେ ପ୍ରଶ୍ନ, ଟାର୍ଗେଟରେ ମୋଦି ସରକାର । ଅର୍ଥାତ୍ ସବୁକିଛି ସେହି ହିସାବରେ ଚାଲୁଥିଲା ଯେମିତି ଯୋଜନା ଏହି କାର୍ଯ୍ୟକ୍ରମକୁ ନେଇ ପ୍ରସ୍ତୁତ କରାଯାଇଥିଲା । କିନ୍ତୁ କାର୍ଯ୍ୟକ୍ରମ ମଝିରେ କିଛି ଏମିତି ହେଲା ଯେ ଛାତ୍ରଙ୍କ ସମସ୍ୟା ବଦଳରେ ପ୍ରସଙ୍ଗ ଅନ୍ୟଆଡ଼େ ଚାଲିଗଲା । ଏବେ ରାଜନୀତିର ଏହି ମଞ୍ଚରେ ଜଣେ ମା'ଙ୍କ ପ୍ରତି ପିଏମ୍ ମୋଦିଙ୍କ ସମ୍ବେଦନଶୀଳ ବ୍ୟବହାରକୁ କରାଯାଇଛି ଉପହାସ । ପ୍ରଧାନମନ୍ତ୍ରୀଙ୍କୁ ଅପମାନ କରି ପୁଣି ଅଡ଼ୁଆରେ ପଡ଼ିଛନ୍ତି ରାହୁଲ ଗାନ୍ଧି ।

ଶନିବାର ମଧ୍ୟପ୍ରଦେଶ ଇନ୍ଦୋରରେ ଅନୁଷ୍ଠିତ 'ଛାତ୍ରୋଁ କି ଗୁଞ୍ଜ' କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଉଦ୍ଦେଶ୍ୟ କରି ଅପମାନିତ କରାଯାଇଥିଲା । ବିବାଦ ସେତେବେଳେ ଆରମ୍ଭ ହେଲା ଯେତେବେଳେ ମଞ୍ଚ ଉପରକୁ ଜଣେ ଷ୍ଟାଣ୍ଡଅପ୍‌ କମେଡିଆନ୍‌ ପୁଲକିତ୍‌ଙ୍କ ଏଣ୍ଟ୍ରି ହେଲା ।

ସେ ରାହୁଲ ଗାନ୍ଧିଙ୍କ ସହ ମଜାଳିଆ ଅନ୍ଦାଜରେ କଥା ହେଉଥିଲେ । ଉଭୟ ନିଜ ମନ୍ତବ୍ୟ ଓ ଅଙ୍ଗଭଙ୍ଗୀ ମାଧ୍ୟମରେ ପ୍ରଧାନମନ୍ତ୍ରୀ ମୋଦିଙ୍କୁ ଅନୁକରଣ କରି ଉପହାସ କରିଥିଲେ । ଜଣେ ବୃଦ୍ଧା ମହିଳାଙ୍କୁ ବସିବାକୁ ଚୌକି ଦେବା ପ୍ରସଙ୍ଗ ଉଠାଇ ମଧ୍ୟ ସେମାନେ ଉପହାସ କରିବାକୁ ପଛାଇ ନଥିଲେ । ଏହି ସମୟରେ ରାହୁଲ ବହୁ ଜୋରରେ ହସି ସମସ୍ତ ପ୍ରସଙ୍ଗକୁ ସମର୍ଥନ କରୁଥିବା ଓ କମେଡିଆନକୁ ଆହୁରି ଅପମାନିତ କରିବାକୁ ଉସକାଉଥିବା ଦେଖିବାକୁ ମିଳିଥିଲା । କିନ୍ତୁ ଏହି ସମୟରେ ସେ ଏମିତି କିଛି କଥା କହିଦେଲେ ଯାହା ପାଲଟିଗଲା ବିବାଦର କେନ୍ଦ୍ର ।

କାର୍ଯ୍ୟକ୍ରମର ଏ ଅଂଶ ସାମ୍ନାକୁ ଆସିବା କ୍ଷଣି ସୃଷ୍ଟି ହେଲା ବଡ଼ ବିବାଦ । ବିଜେପିର ଟାର୍ଗେଟରେ ରାହୁଲ ଗାନ୍ଧି । ରାହୁଲଙ୍କ ମଞ୍ଚରୁ ମା'ଙ୍କୁ ଅପମାନ ବୋଲି ଦର୍ଶାଇ ଶାସକ ଦଳ କରିଛି ଜୋରଦାର ଆକ୍ରମଣ । ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ମୋହନ ଯାଦବ ସୋସିଆଲ୍ ମିଡିଆରେ ଲେଖିଛନ୍ତି - ଏପରି ମଜା ଉଡ଼ାଇବା ସମଗ୍ର ଦେଶର ମାଆମାନଙ୍କୁ ଅପମାନିତ କରିବା ସମାନ ।"

ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମୀ ମଧ୍ୟ ଏହାକୁ ଅତ୍ୟନ୍ତ ନିନ୍ଦନୀୟ ବୋଲି କହି ସୋସିଆଲ୍ ମିଡିଆରେ ଲେଖିଛନ୍ତି - "ଏହି ମଞ୍ଚରେ ଆପତ୍ତିଜନକ ଶବ୍ଦ ବ୍ୟବହାର କରାଯାଇଛି ଏବଂ ସେଥିରେ ରାହୁଳ ଗାନ୍ଧୀ ହସିବା ଏହା ଖୁବ୍ ଲଜ୍ଜାଜନକ ଓ ଯନ୍ତ୍ରଣାଦାୟକ ।" କେନ୍ଦ୍ରମନ୍ତ୍ରୀ କିରଣ ରିଜିଜୁ କହିଛନ୍ତି, "କଂଗ୍ରେସ ଦଳ ହେଉଛି କମେଡି ଓ ଜୋକରଙ୍କ ଦଳ, ସେମାନେ ସବୁଦିନ ପାଇଁ ବିଦା ହୋଇଯିବେ" ଏବଂ ସେଥିରେ 'RIP' ମଧ୍ୟ ଲେଖିଛନ୍ତି । ସେହିପରି କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଶୀ କହିଛନ୍ତି ଏହା ଅତ୍ୟନ୍ତ ଲଜ୍ଜାଜନକ ଏବଂ ଘୃଣ୍ୟ । ସେ ଏହାକୁ ରାହୁଲ ଗାନ୍ଧି ଓ କଂଗ୍ରେସ ଦଳର ନୈତିକ ପତ୍ତନର ପରାକାଷ୍ଠା ବୋଲି କହିଛନ୍ତି ।

ଇଏ ପ୍ରଥମ ଥର ନୁହେଁ ଯେ 'ଛାତ୍ରୋଁ କୀ ଗୁଞ୍ଜ' କାର୍ଯ୍ୟକ୍ରମରେ କୌଣସି ବିବାଦ ଉଠିଛି । ମାସକ ତଳେ ନୂଆଦିଲ୍ଲୀରେ ଏହି କାର୍ଯ୍ୟକ୍ରମରେ ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନୀଙ୍କ ବାହାନାରେ ପିଏମ୍‌ଙ୍କୁ ଟାର୍ଗେଟ୍ କରିବା ନେଇ ଜୋରଦାର ହଙ୍ଗାମା ହୋଇଥିଲା । ସେଠାରେ ପିଏମ୍ ମୋଦିଙ୍କ ବିଦେଶ ନୀତି ଓ ବିଶ୍ୱ ନେତାମାନଙ୍କ ସହ ତାଙ୍କର ଆଲିଙ୍ଗନ ଶୈଳୀକୁ ରାହୁଳ ଗାନ୍ଧି ସମାଲୋଚନା କରୁଥିଲେ । ଏହି ସମୟରେ ସେ ମଞ୍ଚରେ ସାମ୍ବାଦିକ ସନ୍ଦୀପ ଦୀକ୍ଷିତଙ୍କୁ ଆଲିଙ୍ଗନ କରିଥିଲେ ।

ଏବେ ପୁଣି ରାହୁଲଙ୍କ ଏକ କାର୍ଯ୍ୟକ୍ରମରେ ପିଏମ୍ ମୋଦିଙ୍କୁ ନେଇ ଆପତ୍ତିଜନକ ଆଚରଣ ନେଇ ରାଜନୈତିକ ପାରଦ ଏବେ ସବୁଠୁ ଉଚ୍ଚରେ । ତେବେ ଇନ୍ଦୋରର ଏହି କାର୍ଯ୍ୟକ୍ରମକୁ ନେଇ ରାହୁଲ ଗାନ୍ଧିଙ୍କୁ କଡ଼ା ସମାଲୋଚନା କରିଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । କହିଛନ୍ତି ରାହୁଲ ଶିକ୍ଷା ବ୍ୟବସ୍ଥାକୁ ଏକ ସଂକୁଚିତ ଏବଂ ରାଜନୈତିକ ସ୍ଲୋଗାନରେ ପରିଣତ କରିବାକୁ ଚେଷ୍ଟା କରିଛନ୍ତି । ଛାତ୍ରଛାତ୍ରୀଙ୍କ ସମସ୍ୟାକୁ ନେଇ ରାଜନୈତିକ ନାଟକ କରାଯାଉଥିବା ବେଳେ, ପ୍ରକୃତରେ ମୋଦି ସରକାର ଶିକ୍ଷା ବ୍ୟବସ୍ଥାର ବିକାଶ ପାଇଁ କାମ କରୁଛନ୍ତି ବୋଲି ଦୃଢ଼ୋକ୍ତି କରିଛନ୍ତି ଧର୍ମେନ୍ଦ୍ର ପ୍ରଧାନ ।