Sexual Harassment / ବମ୍ବେ ହାଇକୋର୍ଟର ଗୁରତ୍ବପୂର୍ଣ୍ଣ ରାୟ, ମହିଳା ଅଧିକାରୀଙ୍କ କାନ୍ଧ ଧରିବା ଯୌନ ଉତ୍ପୀଡନ ନୁହେଁ

ମୁମ୍ବାଇ,୩୦/୦୮: ମହିଳାଙ୍କ କାନ୍ଧ ଧରିବା, ଚାପିବା କିମ୍ବା ଠେଲି ଦେବା ଘଟଣା ସବୁ କ୍ଷେତ୍ରରେ ଭାରତୀୟ ଦଣ୍ଡ ସଂହିତା (IPC) ଧାରା ୩୫୪A ଅନୁଯାୟୀ ଯୌନ ଉତ୍ପୀଡ଼ନ ଭାବେ ଗଣାଯିବ ନାହିଁ। ଅଭିଯୁକ୍ତଙ୍କ କାର୍ଯ୍ୟ ପଛରେ ଯୌନ ଉଦ୍ଦେଶ୍ୟ ଥିବାର ପ୍ରମାଣ ମଧ୍ୟ ରହିବା ଆବଶ୍ୟକ ବୋଲି ବମ୍ବେ ହାଇକୋର୍ଟର କୋଲହାପୁର ବେଞ୍ଚ ଏକ ମାମଲାର ଶୁଣାଣି ସମୟରେ ସ୍ପଷ୍ଟ କରିଛନ୍ତି। ଏହି ମାମଲାଟି ଜଣେ ମହିଳା ବ୍ଲକ ଉନ୍ନୟନ ଅଧିକାରୀଙ୍କ ସହ ଗ୍ରାମ ପଞ୍ଚାୟତ କାର୍ଯ୍ୟାଳୟରେ ଘଟିଥିବା ଦୁର୍ବ୍ୟବହାର ଘଟଣା ସହିତ ଜଡିତ। ଅଭିଯୋଗ ଅନୁସାରେ, ଜଣେ ଚାଷୀ ବଳପୂର୍ବକ ଗ୍ରାମ ପଞ୍ଚାୟତ କାର୍ଯ୍ୟାଳୟରେ ପ୍ରବେଶ କରିଥିଲେ। ସେଠାରେ ସେ ମହିଳା BDOଙ୍କ ସହ ଦୁର୍ବ୍ୟବହାର କରିବା ସହ ତାଙ୍କ କାନ୍ଧ ଧରିଥିବା ଅଭିଯୋଗ ହୋଇଥିଲା।

ଚାଷୀଙ୍କ ଉପରେ ଯୌନ ନିର୍ଯାତନା ଅଭିଯୋଗ ଆସିଥିଲା
ଏହି ଘଟଣାକୁ ନେଇ ମହିଳା ଅଧିକାରୀ ଅଭିଯୋଗ ଦାଖଲ କରିଥିଲେ। ଅଭିଯୋଗ ଆଧାରରେ ଚାଷୀଙ୍କ ବିରୋଧରେ ଯୌନ ଉତ୍ପୀଡ଼ନ ସମେତ ବିଭିନ୍ନ ଆଇନଗତ ଧାରାରେ ମାମଲା ରୁଜୁ ହୋଇଥିଲା। ପରେ ଏହି ମାମଲା ବମ୍ବେ ହାଇକୋର୍ଟର କୋଲହାପୁର ବେଞ୍ଚରେ ପହଞ୍ଚିଥିଲା।

ମାମଲାର ଶୁଣାଣି କରି କୋର୍ଟ କହିଛନ୍ତି ଯେ କେବଳ ଜଣେ ମହିଳାଙ୍କ କାନ୍ଧ ଧରିବା, ଚାପିବା କିମ୍ବା ଠେଲି ଦେବା ଦ୍ୱାରା ମାତ୍ର ତାହାକୁ ଧାରା ୩୫୪A ଅନୁଯାୟୀ ଯୌନ ଉତ୍ପୀଡ଼ନ ବୋଲି କୁହାଯାଇପାରିବ ନାହିଁ। ଏପରି ଅଭିଯୋଗ ପ୍ରମାଣ ପାଇଁ ଘଟଣା ପଛରେ ଯୌନ ଉଦ୍ଦେଶ୍ୟ କିମ୍ବା ଯୌନ ପ୍ରକୃତିର ଅସଦାଚରଣ ଥିବା ସ୍ପଷ୍ଟ ହେବା ଆବଶ୍ୟକ। କୋର୍ଟଙ୍କ ମତରେ, ଉପସ୍ଥାପିତ ସୂଚନା ଓ ଅଭିଯୋଗରୁ ଏହା ସ୍ପଷ୍ଟ ହୋଇନଥିଲା ଯେ ଅଭିଯୁକ୍ତ ଚାଷୀ ମହିଳା ଅଧିକାରୀଙ୍କୁ ଯୌନ ଭାବେ ଉତ୍ପୀଡ଼ନ କରିବା ଉଦ୍ଦେଶ୍ୟରେ ତାଙ୍କ କାନ୍ଧ ଧରିଥିଲେ। ତେଣୁ କେବଳ ଏହି ଅଭିଯୋଗକୁ ଆଧାର କରି IPC ଧାରା ୩୫୪A ଲାଗୁ କରିବା ଯୁକ୍ତିସଙ୍ଗତ ନୁହେଁ ବୋଲି ବେଞ୍ଚ କହିଛନ୍ତି।

ପଢନ୍ତୁ ଏହି ଖବର: ମଡେଲ ମୁସ୍କାନର ହତ୍ୟା ଅଭିଯୁକ୍ତ ଇମ୍ରାନ ବିରୋଧରେ ରହିଛି ଗଣଦୁଷ୍କର୍ମ,ଏବଂ ହତ୍ୟା ଉଦ୍ୟମ ମାମଲା

ତେବେ ଏହି ରାୟର ଅର୍ଥ ଏହା ନୁହେଁ ଯେ ଅଭିଯୁକ୍ତଙ୍କ ବିରୋଧରେ ରୁଜୁ ହୋଇଥିବା ସମସ୍ତ ମାମଲା ଶେଷ ହୋଇଯାଇଛି। ହାଇକୋର୍ଟ ଏଫଆଇଆରକୁ ସମ୍ପୂର୍ଣ୍ଣ ଭାବେ ରଦ୍ଦ କରିନାହାଁନ୍ତି। କୋର୍ଟ କେବଳ ଯୌନ ଉତ୍ପୀଡ଼ନ ସମ୍ପର୍କିତ ଅଭିଯୋଗରୁ ଅଭିଯୁକ୍ତଙ୍କୁ ଆଶ୍ୱସ୍ତି ଦେଇଛନ୍ତି। ଅନ୍ୟପକ୍ଷରେ, ଚାଷୀଙ୍କ ବିରୋଧରେ ଥିବା ଅନ୍ୟାନ୍ୟ ଅଭିଯୋଗ ଓ ଆଇନଗତ ପ୍ରକ୍ରିୟା ଜାରି ରହିବ। ଗ୍ରାମ ପଞ୍ଚାୟତ କାର୍ଯ୍ୟାଳୟରେ ବଳପୂର୍ବକ ପ୍ରବେଶ, ସରକାରୀ କାର୍ଯ୍ୟରେ ବାଧା ସୃଷ୍ଟି କିମ୍ବା ଅଧିକାରୀଙ୍କ ସହ ଦୁର୍ବ୍ୟବହାର ଭଳି ଅନ୍ୟ ଅଭିଯୋଗଗୁଡ଼ିକର ତଦନ୍ତ ଓ ବିଚାର ପ୍ରକ୍ରିୟା ଆଇନ ଅନୁଯାୟୀ ଜାରି ରହିବ ବୋଲି କୋର୍ଟ ସ୍ପଷ୍ଟ କରିଛନ୍ତି।

ଏହି ରାୟକୁ ଆଇନଗତ ଦୃଷ୍ଟିକୋଣରୁ ଗୁରୁତ୍ୱପୂର୍ଣ୍ଣ ବୋଲି ଦେଖାଯାଉଛି। କୌଣସି ଶାରୀରିକ ସ୍ପର୍ଶ ଅପମାନଜନକ କିମ୍ବା ଅସ୍ୱସ୍ତିକର ହୋଇପାରେ, କିନ୍ତୁ ଯୌନ ଉତ୍ପୀଡ଼ନର ଅଭିଯୋଗ ସ୍ଥାପିତ କରିବା ପାଇଁ ଆଇନରେ ଉଲ୍ଲେଖିତ ଆବଶ୍ୟକ ଉପାଦାନ ଓ ଉଦ୍ଦେଶ୍ୟର ପରୀକ୍ଷା ଜରୁରୀ ବୋଲି କୋର୍ଟଙ୍କ ରାୟରୁ ସ୍ପଷ୍ଟ ହୋଇଛି। ତେଣୁ ମହିଳାଙ୍କ ସହ ଦୁର୍ବ୍ୟବହାରର ପ୍ରତ୍ୟେକ ଘଟଣାର ଆଇନଗତ ମୂଲ୍ୟାୟନ ଘଟଣାର ପରିସ୍ଥିତି, ପ୍ରମାଣ ଏବଂ ଅଭିଯୁକ୍ତଙ୍କ ଉଦ୍ଦେଶ୍ୟକୁ ଆଧାର କରି କରାଯିବ ବୋଲି ବମ୍ବେ ହାଇକୋର୍ଟଙ୍କ ଏହି ରାୟ ଗୁରୁତ୍ୱପୂର୍ଣ୍ଣ ସନ୍ଦେଶ ଦେଇଛି।