Cancer Drug Price Cuts / କ୍ୟାନସର ରୋଗୀଙ୍କୁ ବଡ଼ ଆଶ୍ବସ୍ତି, ହଜାର ହଜାର ଟଙ୍କା ଶସ୍ତା ହେବ ଔଷଧ

ମଧ୍ୟବିତ୍ତ ଏବଂ କ୍ୟାନସର ରୋଗୀଙ୍କ ପରିବାର ପାଇଁ ଏକ ବଡ଼ ଆଶ୍ବସ୍ତି । ଦେଶରେ କର୍କଟ ବା କ୍ୟାନସର ଔଷଧର ମୂଲ୍ୟରେ ବେଶ୍ ବଡ଼ ଧରଣର ହ୍ରାସ ଘଟିବାକୁ ଯାଉଛି । ଆସନ୍ତା ନଭେମ୍ବର ୯ ତାରିଖରୁ ନୂଆ ମୂଲ୍ୟ ଲାଗୁ ହେବ । କେତେକ ଔଷଧର ଦାମ୍ ପ୍ରାୟ ୭୦ରୁ ୯୩ ପ୍ରତିଶତ ପର୍ଯ୍ୟନ୍ତ କମିଯାଇଛି ।

କ୍ୟାନସର ରୋଗୀ ଏବଂ ସେମାନଙ୍କ ପରିବାର ଲୋକଙ୍କ ପାଇଁ କେନ୍ଦ୍ର ସରକାରଙ୍କ ତରଫରୁ ବଡ଼ ଦୀପାବଳି ଭେଟି । ରୋଗୀଙ୍କ ଜୀବନ ବଞ୍ଚାଇବା ନାଁରେ ଦେଶରେ ଚାଲିଥିବା ମନମୁଖୀ ବ୍ୟବସାୟ ଉପରେ ଲାଗିବ ରୋକ୍ । ଭାରତର ଜାତୀୟ ଫାର୍ମାସ୍ୟୁଟିକାଲ୍ ପ୍ରାଇସିଂ ଅଥରିଟି ବା NPPA କ୍ୟାନସର ପାଇଁ ବ୍ୟବହୃତ ହେଉଥିବା ୧୩୭ଟି ଅଣ-ନିର୍ଦ୍ଧାରିତ ଔଷଧର ଟ୍ରେଡ୍ ମାର୍ଜିନକୁ ୩୦ ପ୍ରତିଶତକୁ ସୀମିତ କରିଦେଇଛନ୍ତି । ଏହା ଫଳରେ ଔଷଧର ସର୍ବାଧିକ ଖୁଚୁରା ମୂଲ୍ୟ ବା MRPରେ ହ୍ରାସ ଘଟିଛି ।

ଥାୟୋଟେପା 100 ମିଗ୍ରା: ପୂର୍ବ ମୂଲ୍ୟ ୮୦ ୦୭୨ ଟଙ୍କା ଥିବା ବେଳେ ଏବେ ଏହା ମାତ୍ର ୭ ହଜାର ୧୫୦ ଟଙ୍କାରେ ମିଳିବ
ଆବିରାଟେରୋନ ଆସେଟେଟ୍: ପ୍ରାୟ ୨୮ ହଜାର ଟଙ୍କାରୁ କମି ଏବେ ୪ ହଜାର ୮୪୦ ରୁ ୫ ହଜାର ୭୬୮ ମଧ୍ୟରେ ଉପଲବ୍ଧ ହେବ
ପାଲବୋସିକ୍ଲିବ: ୨୪ ହଜାର ୫୦୫ ଟଙ୍କାରୁ ସିଧାସଳଖ ହ୍ରାସ ପାଇ ୨ ହଜାର ୦୬୮ ଟଙ୍କା ହୋଇଛି।
ବେଭାକାଲ୍ପ ୧୦୦ ମିଗ୍ରା : ପୂର୍ବ ମୂଲ୍ୟ ୧୦ ହଜାର ୫୦୦ ଟଙ୍କା ଥିବା ବେଳେ ଏବେ ଏହା ହ୍ରାସ ପାଇ ମାତ୍ର ୪ ହଜାର ୫୨୩ ହୋଇଛି 

ଏହି ନୂଆ ଦର ନଭେମ୍ବର ୯ ତାରିଖରୁ ସାରା ଦେଶରେ ପ୍ରଭାବଶାଳୀ ହେବ । କୋଲୋରେକ୍ଟାଲ୍, ଫୁସଫୁସ, ବ୍ଲଡ୍ ଏବଂ ସ୍ତନ କ୍ୟାନ୍ସର ଭଳି ୨୦ରୁ ଅଧିକ ପ୍ରକାରର କର୍କଟ ରୋଗ ପାଇଁ ବ୍ୟବହୃତ ହେଉଥିବା ୫୪୩ଟି ବ୍ରାଣ୍ଡର ଔଷଧ ଏହି ମୂଲ୍ୟ ହ୍ରାସ ପରିସରଭୁକ୍ତ ହୋଇଛି । ଯଦିଓ କେତେକ ପେଟେଣ୍ଟେଡ୍ ବିଦେଶୀ ଇମ୍ୟୁନୋଥେରାପି ଔଷଧର ମୂଲ୍ୟ ପୂର୍ବଭଳି ଅପରିବର୍ତ୍ତିତ ରହିଛି ।

ନୂଆ ନିୟମ ଅନୁଯାୟୀ ସମସ୍ତ ହସ୍ପିଟାଲ୍ ଏବଂ ଫାର୍ମାସିଗୁଡ଼ିକୁ ନୂଆ ଦର ତାଲିକା ସାମ୍ନାରେ ପ୍ରଦର୍ଶନ କରିବାକୁ ବାଧ୍ୟତାମୂଳକ କରାଯାଇଛି। ସାଧାରଣ ଲୋକେ NPPAର 'ଫାର୍ମା ସହି ଦାମ' ଆପ୍ ଜରିଆରେ ମଧ୍ୟ ନିଜ ଔଷଧର ସଠିକ୍ ମୂଲ୍ୟ ଯାଞ୍ଚ କରିପାରିବେ ।