Cancer Drug Prices / ମୋଦି ସରକାରଙ୍କ ବଡ଼ ନିଷ୍ପତ୍ତି, ୭୦ ପ୍ରତିଶତ ଶସ୍ତା ହେବ କ୍ୟାନସର ଔଷଧ

କ୍ୟାନସର ଚିକିତ୍ସା ପାଇଁ ଆସିଛି ବଡ଼ ଆଶ୍ୱସ୍ତିର ଖବର । ଏଣିକି କମିପାରେ ଜୀବନରକ୍ଷକ କ୍ୟାନସର ଔଷଧର ଦାମ । କେନ୍ଦ୍ର ସରକାରଙ୍କ ନୂଆ ନିଷ୍ପତ୍ତି ପରେ କିଛି ଔଷଧର ମୂଲ୍ୟରେ ୭୦ ପ୍ରତିଶତ ପର୍ଯ୍ୟନ୍ତ ହ୍ରାସ ହେବାର ଆଶା ରହିଛି । କେନ୍ଦ୍ର ସରକାର ସମସ୍ତ ଅଣ-ତାଲିକାଭୁକ୍ତ କ୍ୟାନ୍ସର ଔଷଧର ଟ୍ରେଡ୍ ମାର୍ଜିନ୍ ଉପରେ ୩୦ ପ୍ରତିଶତର କ୍ୟାପ୍ ବା ସୀମା ଧାର୍ଯ୍ୟ କରିଛନ୍ତି । ଏହାର ସିଧାସଳଖ ଲାଭ ମିଳିବ କ୍ୟାନ୍ସର ରୋଗୀ ଓ ସେମାନଙ୍କ ପରିବାରକୁ ।

କ୍ୟାନସର ଚିକିତ୍ସାରେ ହେଉଥିବା ବିପୁଳ ଖର୍ଚ୍ଚରେ ଚିନ୍ତିତ ରୋଗୀ ଓ ସେମାନଙ୍କ ପରିବାର ପାଇଁ କେନ୍ଦ୍ର ସରକାର ଏକ ବଡ଼ ପଦକ୍ଷେପ ନେଇଛନ୍ତି । ସମସ୍ତ ଅଣ-ତାଲିକାଭୁକ୍ତ କ୍ୟାନସର ଔଷଧ ଉପରେ ଟ୍ରେଡ୍ ମାର୍ଜିନ୍‌କୁ ସର୍ବାଧିକ ୩୦ ପ୍ରତିଶତରେ ସୀମିତ କରିବାକୁ ସରକାର ନିଷ୍ପତ୍ତି ନେଇଛନ୍ତି ।

ସରକାରଙ୍କ ଏହି ନିଷ୍ପତ୍ତିର ଲକ୍ଷ୍ୟ ହେଉଛି ଔଷଧ ଉପରେ ଅତ୍ୟଧିକ ଲାଭ ରୋକିବା ସହ ଜୀବନରକ୍ଷକ କ୍ୟାନ୍ସର ଔଷଧକୁ ସାଧାରଣ ଲୋକଙ୍କ ପାଇଁ ଅଧିକ ସୁଲଭ କରିବା । ଟ୍ରେଡ୍ ମାର୍ଜିନ୍ ୩୦ ପ୍ରତିଶତରେ ସୀମିତ ହେବା ପରେ କିଛି ଔଷଧର ଖୁଚୁରା ମୂଲ୍ୟ ବା MRPରେ ୭୦ ପ୍ରତିଶତ ପର୍ଯ୍ୟନ୍ତ ହ୍ରାସ ହୋଇପାରେ ବୋଲି ଅଧିକାରିକ ସୂତ୍ରରୁ ଜଣାପଡ଼ିଛି ।

ଏହା ଫଳରେ କ୍ୟାନ୍ସର ଚିକିତ୍ସା ପାଇଁ ରୋଗୀଙ୍କ ପକେଟରୁ ହେଉଥିବା ଖର୍ଚ୍ଚରେ ବଡ଼ ହ୍ରାସ ଆସିବା ଆଶା କରାଯାଉଛି । ଆକଳନ ଅନୁସାରେ, ଏହି ପଦକ୍ଷେପ ଦ୍ୱାରା ରୋଗୀମାନେ ପ୍ରତିବର୍ଷ ପ୍ରାୟ ୨,୫୦୦ କୋଟି ଟଙ୍କା ସଞ୍ଚୟ କରିପାରନ୍ତି ।

ସରକାରଙ୍କ ଏହି ନିଷ୍ପତ୍ତିରେ ବିଭିନ୍ନ ପ୍ରକାରର ଅଣ-ତାଲିକାଭୁକ୍ତ କ୍ୟାନ୍ସର ଔଷଧକୁ ସାମିଲ କରାଯାଇଛି । ବ୍ରାଣ୍ଡେଡ୍ କିମ୍ବା ଜେନେରିକ୍, ଦେଶରେ ଉତ୍ପାଦିତ କିମ୍ବା ଆମଦାନୀ ହେଉଥିବା, ପେଟେଣ୍ଟେଡ୍ କିମ୍ବା ନନ୍-ପେଟେଣ୍ଟେଡ୍—ସମସ୍ତ ଔଷଧ ଉପରେ ଏହି ନିୟମ ଲାଗୁ ହେବ । ଏହା ଦ୍ୱାରା ଔଷଧର ଦାମ୍‌ କମିବା ସହିତ ବଜାରରେ ଜୀବନରକ୍ଷକ ଔଷଧର ଯୋଗାଣ ମଧ୍ୟ ପ୍ରଭାବିତ ନହେବାକୁ ନିଶ୍ଚିତ କରିବା ଉପରେ ଗୁରୁତ୍ୱ ଦିଆଯାଇଛି ।

୨୦୧୯ର ପଦକ୍ଷେପକୁ ଆହୁରି ବ୍ୟାପକ କଲା ସରକାର

କ୍ୟାନ୍ସର ଔଷଧର ଦାମ ନିୟନ୍ତ୍ରଣ ଦିଗରେ ଏହା ୨୦୧୯ରେ ନିଆଯାଇଥିବା ପଦକ୍ଷେପକୁ ଆହୁରି ବ୍ୟାପକ କରିଛନ୍ତି କେନ୍ଦ୍ର ସରକାର । ସେତେବେଳେ ୫୨୬ଟି ବ୍ରାଣ୍ଡ୍‌ ଉପରେ ଏହିପରି ବ୍ୟବସ୍ଥା ଲାଗୁ କରାଯାଇଥିଲା । ଏହା ଫଳରେ ରୋଗୀମାନେ ପ୍ରତିବର୍ଷ ପ୍ରାୟ ୯୮୪ କୋଟି ଟଙ୍କା ସଞ୍ଚୟ କରିଥିବା ଆକଳନ କରାଯାଇଥିଲା ।
ଏବେ ନୂଆ ନିଷ୍ପତ୍ତି ଦ୍ୱାରା ଅଧିକ ସଂଖ୍ୟକ ଅଣ-ତାଲିକାଭୁକ୍ତ କ୍ୟାନ୍ସର ଔଷଧର ମୂଲ୍ୟ ନିୟନ୍ତ୍ରଣକୁ ଆଣିବାକୁ ଉଦ୍ୟମ କରାଯାଇଛି। ଏହା ଦ୍ୱାରା କ୍ୟାନ୍ସର ଚିକିତ୍ସାକୁ ଅଧିକ ସୁଲଭ ଓ ସାଧାରଣ ଲୋକଙ୍କ ପହଞ୍ଚ ମଧ୍ୟରେ ଆଣିବା ଦିଗରେ ସରକାରଙ୍କ ପଦକ୍ଷେପ ଆହୁରି ବ୍ୟାପକ ହୋଇଛି।