Smit Machhar Health Update / କ୍ୟାପ୍ଟେନ ସ୍ମିତ ମଚ୍ଛାରଙ୍କୁ ନେଇ ବଡ଼ ଖବର, ହସ୍ପିଟାଲରେ ଭେଟିଲେ ରାଷ୍ଟ୍ରଦୂତ...ଜାଣନ୍ତୁ ଏବେ କେମିତି ଅଛି ସ୍ବାସ୍ଥ୍ୟବସ୍ଥା

୧୭୪ ଜଣ ଯାତ୍ରୀଙ୍କ ଜୀବନ ଥିଲା ବିପଦରେ...କକପିଟ୍‌ ଭିତରେ ଘଟିଥିଲା ଭୟଙ୍କର ଘଟଣା । ହଠାତ୍ କୋ-ପାଇଲଟ୍‌ଙ୍କ ଛୁରୀ ଆକ୍ରମଣରେ ଗୁରୁତର ଆହତ ହେଲେ ଭାରତୀୟ କ୍ୟାପ୍ଟେନ ସ୍ମିତ ମଚ୍ଛାର । କିନ୍ତୁ ଆହତ ହୋଇଥିଲେ ମଧ୍ୟ ହାର ମାନିନଥିଲେ କ୍ୟାପ୍ଟେନ । ନିଜ ଜୀବନକୁ ବାଜିରେ ଲଗାଇ ସେ ବିମାନ ଓ ଶତାଧିକ ଯାତ୍ରୀଙ୍କୁ ବଞ୍ଚାଇଥିଲେ । ଆଉ ଏବେ ସାମ୍ନାକୁ ଆସିଛି କ୍ୟାପ୍ଟେନ ମଚ୍ଛାରଙ୍କ ସ୍ୱାସ୍ଥ୍ୟକୁ ନେଇ ବଡ଼ ଅପଡେଟ୍ ।

ଫ୍ଲାଏ ଦୁବାଇର ଭାରତୀୟ କ୍ୟାପ୍ଟେନ ସ୍ମିତ ମଚ୍ଛାରଙ୍କ ସ୍ୱାସ୍ଥ୍ୟକୁ ନେଇ ବଡ଼ ଅପଡେଟ୍ ସାମ୍ନାକୁ ଆସିଛି । ସଂଯୁକ୍ତ ଆରବ ଏମିରେଟ୍ସରେ ଥିବା ଭାରତୀୟ ଦୂତାବାସ ପକ୍ଷରୁ କୁହାଯାଇଛି ଯେ କ୍ୟାପ୍ଟେନ ମଚ୍ଛାରଙ୍କ ସ୍ୱାସ୍ଥ୍ୟ ଏବେ ଭଲ ରହିଛି ଏବଂ ସେ ଦ୍ରୁତ ଗତିରେ ସୁସ୍ଥ ହେଉଛନ୍ତି ।

କ୍ୟାପ୍ଟେନ ମଚ୍ଛାରଙ୍କ ସ୍ୱାସ୍ଥ୍ୟ କେମିତି ଅଛି ?

ଅକ୍ଟୋବର ୧ ତାରିଖରେ UAEସ୍ଥିତ ଭାରତୀୟ ଦୂତାବାସ ସୋସିଆଲ ମିଡିଆରେ ଏକ ପୋଷ୍ଟ କରି କହିଛି ଯେ ଭାରତୀୟ ରାଷ୍ଟ୍ରଦୂତ ଦୀପକ ମିତ୍ତଲ ହସ୍ପିଟାଲକୁ ଯାଇ କ୍ୟାପ୍ଟେନ ମଚ୍ଛାର ଏବଂ ତାଙ୍କ ପରିବାର ସହିତ ସାକ୍ଷାତ କରିଛନ୍ତି ।

ଦୂତାବାସ ପକ୍ଷରୁ କୁହାଯାଇଛି ଯେ କ୍ୟାପ୍ଟେନ ମଚ୍ଛାରଙ୍କ ସ୍ୱାସ୍ଥ୍ୟରେ ଉନ୍ନତ ହେଉଛି ଏବଂ ସେ ଦ୍ରୁତ ଗତିରେ ସୁସ୍ଥ ହେଉଛନ୍ତି । ତାବୁକର ଏକ ହସ୍ପିଟାଲରେ ଭର୍ତ୍ତି ହେବାର ଗୋଟିଏ ଦିନ ପରେ ତାଙ୍କୁ ଆବଶ୍ୟକ ଚିକିତ୍ସା ସୁବିଧା ପାଇଁ UAEକୁ ନିଆଯାଇଥିଲା । ଭାରତୀୟ ଦୂତାବାସ କହିଛି ଯେ ତାଙ୍କର ଚିକିତ୍ସା ନିରନ୍ତର ଭାବେ ଚାଲିଥିବା ସୁନିଶ୍ଚିତ କରିବା ପାଇଁ ସ୍ଥାନୀୟ କର୍ତ୍ତୃପକ୍ଷଙ୍କ ସହ ଦୂତାବାସ ଯୋଗାଯୋଗରେ ରହିଛି ।

ପ୍ରଧାନମନ୍ତ୍ରୀ କଲେ କ୍ୟାପ୍ଟେନଙ୍କ ପ୍ରଶଂସା

ଭାରତୀୟ କ୍ୟାପ୍ଟେନଙ୍କ ସାହସିକ ପଦକ୍ଷେପକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ପ୍ରଶଂସା କରିଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ ପାଇଲଟ୍ ନିଜ ଜୀବନର ଚିନ୍ତା ନକରି ଆଉ ଏକ 9/11 ଭଳି ଆକ୍ରମଣକୁ ବିଫଳ କରିଥିଲେ । ସେ କହିଛନ୍ତି ଯେ ୧୪୦ କୋଟି ଭାରତୀୟ କ୍ୟାପ୍ଟେନ୍ ମଚ୍ଛାରଙ୍କୁ ସଲାମ କରୁଛନ୍ତି ଏବଂ ତାଙ୍କର ଶୀଘ୍ର ଆରୋଗ୍ୟ କାମନା କରିଛନ୍ତି ।

ଘଟଣାର ତଦନ୍ତ ହେବ

ଏହି ଘଟଣାକୁ ନେଇ UAE ପକ୍ଷରୁ ମଧ୍ୟ ତଦନ୍ତ ଆରମ୍ଭ କରାଯିବ ବୋଲି କୁହାଯାଇଛି । ଘଟଣାର ପରିସ୍ଥିତି ଏବଂ ଏହା ପଛର କାରଣ ଜାଣିବା ପାଇଁ UAEର ଅଟର୍ଣ୍ଣି-ଜେନେରାଲ କାଉନସେଲର ଡ. ହମଦ ଅଲ-ଶମସୀ ପବ୍ଲିକ ପ୍ରସିକ୍ୟୁସନର ବିଶେଷ ସଦସ୍ୟମାନଙ୍କୁ ନେଇ ଏକ ଟିମ୍ ଗଠନ କରିବାକୁ ନିର୍ଦ୍ଦେଶ ଦେଇଥିବା ଜଣାପଡ଼ିଛି ।