ନୂଆଦିଲ୍ଲୀ, ୨୫/୦୬: ଡିଜିଟାଲ୍ ଗିରଫଦାରୀର ଭୟ ଦେଖାଇ ଲୋକଙ୍କଠାରୁ ଟଙ୍କା ଠକୁଥିବା ଏକ ବିଶାଳ ସାଇବର ଠକେଇ ଗ୍ୟାଙ୍ଗର ପର୍ଦ୍ଦାଫାସ କରିଛି ସିବିଆଇ। ଏହି ମାମଲାରେ ଦେଶର ୧୬ଟି ରାଜ୍ୟର ୮୦ରୁ ଅଧିକ ସ୍ଥାନରେ ଏକକାଳୀନ ଚଢ଼ାଉ କରାଯାଇଥିବା ବେଳେ ୨ ଜଣଙ୍କୁ ଗିରଫ କରାଯାଇଛି।

ସିବିଆଇ ସୂଚନା ଅନୁଯାୟୀ, ଏହି ସଂଗଠିତ ସାଇବର ନେଟୱର୍କ ୨୦୦ରୁ ଅଧିକ ମାମଲାରେ ଠକେଇ କରିବା ପାଇଁ ଭାରତର ସୁପ୍ରିମକୋର୍ଟ ନାମରେ ଏକ ନକଲି ୱେବସାଇଟ୍ ବ୍ୟବହାର କରୁଥିଲା।  ଅଭିଯୁକ୍ତମାନେ ନିଜକୁ ଆଇନ ପ୍ରବର୍ତ୍ତନ ସଂସ୍ଥାର ଅଧିକାରୀ ବୋଲି ପରିଚୟ ଦେଇ ଲୋକଙ୍କୁ ‘ଡିଜିଟାଲ୍ ଆରେଷ୍ଟ’ କରାଯିବ ବୋଲି ଧମକ ଦେଉଥିଲେ ଏବଂ ଏହା ମାଧ୍ୟମରେ ଲକ୍ଷାଧିକ ଟଙ୍କା ହଡ଼ପ କରୁଥିଲେ।

ନକଲି ସୁପ୍ରିମକୋର୍ଟ ୱେବସାଇଟ୍‌ର ଖୁଲାସା

ସୁପ୍ରିମକୋର୍ଟ ରେଜିଷ୍ଟ୍ରି ପକ୍ଷରୁ ମିଳିଥିବା ଅଭିଯୋଗ ଆଧାରରେ ସିବିଆଇ ଏକ ଏଫ୍‌ଆଇଆର୍‌ ରୁଜୁ କରି ତଦନ୍ତ ଆରମ୍ଭ କରିଥିଲା। ତଦନ୍ତ ସମୟରେ ସୁପ୍ରିମକୋର୍ଟର ଆଧିକାରିକ ୱେବସାଇଟ୍‌ ସହ ସମାନ ଦେଖାଯାଉଥିବା ଏକ ନକଲି ଡୋମେନ୍‌ ଠାବ କରାଯାଇଥିଲା।
ଏହି ନକଲି ୱେବସାଇଟ୍‌ ମାଧ୍ୟମରେ ଠକମାନେ ଜାଲ୍‌ କୋର୍ଟ ଆଦେଶ, ଜାଲ୍‌ ତଦନ୍ତ ନୋଟିସ୍‌ ଓ ଅନ୍ୟାନ୍ୟ ଭୁଆ ଦଲିଲ ଅପଲୋଡ୍‌ କରି ପୀଡ଼ିତଙ୍କ ମନରେ ଭୟ ସୃଷ୍ଟି କରୁଥିଲେ। ପରେ ଡିଜିଟାଲ୍ ଗିରଫଦାରୀର ଧମକ ଦେଇ ଟଙ୍କା ଆଦାୟ କରାଯାଉଥିଲା।

‘ଅପରେସନ୍ ଚକ୍ର-VI’ରେ ବଡ଼ ଚଢ଼ାଉ

ଏହି ଠକେଇ ଚକ୍ରକୁ ଧ୍ୱଂସ କରିବା ପାଇଁ ସିବିଆଇ ‘ଅପରେସନ୍ ଚକ୍ର-VI’ ଅଧୀନରେ ୬୦ଟି ସ୍ୱତନ୍ତ୍ର ଟିମ୍‌ ଗଠନ କରିଥିଲା। ଏହି ଟିମ୍‌ଗୁଡ଼ିକ ପଞ୍ଜାବ, ଗୁଜରାଟ, ଦିଲ୍ଲୀ, ମହାରାଷ୍ଟ୍ର, ହରିୟାଣା, ଉତ୍ତରପ୍ରଦେଶ, ମଧ୍ୟପ୍ରଦେଶ, ରାଜସ୍ଥାନ, ତାମିଲନାଡୁ, ତେଲେଙ୍ଗାନା, ଆନ୍ଧ୍ରପ୍ରଦେଶ, ଆସାମ, ପଶ୍ଚିମବଙ୍ଗ, ମଣିପୁର, କର୍ଣ୍ଣାଟକ ଓ ଓଡ଼ିଶାରେ ଏକାସାଥିରେ ଚଢ଼ାଉ କରିଥିଲେ।
ଏହି ଅଭିଯାନରେ ଚେନ୍ନାଇର ବି. ନରେଶ ଏବଂ କୋଲକାତାର ସଞ୍ଜୀବ ସାହାଙ୍କୁ ଗିରଫ କରାଯାଇଛି। ସିବିଆଇ ଅନୁଯାୟୀ, ସେମାନେ ଭୁଆ କମ୍ପାନି ସୃଷ୍ଟି କରିବା ସହ ‘ମ୍ୟୁଲ୍ ବ୍ୟାଙ୍କ ଆକାଉଣ୍ଟ’ ଖୋଲି ଅପରାଧିକ ଅର୍ଥକୁ ବୈଧ ରୂପ ଦେବା କାର୍ଯ୍ୟରେ ଜଡ଼ିତ ଥିଲେ। ପ୍ରାୟ ୨ କୋଟି ଟଙ୍କାର ଅବୈଧ ଟଙ୍କା ଏହି ମାଧ୍ୟମରେ ପରିଚାଳିତ ହୋଇଥିବା ଜଣାପଡ଼ିଛି।

ଆନ୍ତର୍ଜାତୀୟ ଲିଙ୍କର ସୁରାଗ

ଉନ୍ନତ ବୈଷୟିକ ବିଶ୍ଳେଷଣ ଓ ଫୋରେନସିକ୍ ଯାଞ୍ଚ ମାଧ୍ୟମରେ ସିବିଆଇ ଏହି ସାଇବର ଅପରାଧ ନେଟୱର୍କର ଭାରତ ଏବଂ ବିଦେଶରେ ଥିବା ଲିଙ୍କକୁ ଚିହ୍ନଟ କରିଛି। ତଦନ୍ତରୁ ଜଣାପଡ଼ିଛି ଯେ, ଏହି ଗ୍ୟାଙ୍ଗ କେବଳ ଭାରତୀୟଙ୍କୁ ନୁହେଁ, ବରଂ ବିଦେଶୀ ନାଗରିକଙ୍କୁ ମଧ୍ୟ ଟାର୍ଗେଟ କରି ଠକେଇ କରୁଥିଲା।

ଚଢ଼ାଉ ସମୟରେ ଅଧିକାରୀମାନେ ଅନେକ ମୋବାଇଲ୍ ଫୋନ୍, ଡିଜିଟାଲ୍ ଡିଭାଇସ୍, ବ୍ୟାଙ୍କ କାରବାର ସମ୍ବନ୍ଧୀୟ ଦଲିଲ ଓ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସାମଗ୍ରୀ ଜବତ କରିଛନ୍ତି। ଏହାକୁ ଫୋରେନସିକ୍ ପରୀକ୍ଷା ପାଇଁ ପଠାଯାଇଛି। 

ପଢନ୍ତୁ ଏହି ଖବର: ନୌସେନାରେ ସାମିଲ ହେଲା ସ୍ୱଦେଶୀ ଜ୍ଞାନକୌଶଳରେ ନିର୍ମିତ ୩ ନୂଆ ଯୁଦ୍ଧଜାହାଜ

ବିଦେଶୀ ନାଗରିକମାନେ ମଧ୍ୟ ଏହି ଠକେଇର ଶିକାର ହୋଇଥିବା ଆଶଙ୍କା ଥିବାରୁ ସିବିଆଇ ଆନ୍ତର୍ଜାତୀୟ ଆଇନ ପ୍ରବର୍ତ୍ତନ ଏଜେନ୍ସିମାନଙ୍କ ସହ ମଧ୍ୟ ସୂଚନା ବାଣ୍ଟିଛି।
ସିବିଆଇ କହିଛି, ଏହି ମାମଲାର ତଦନ୍ତ ଜାରି ରହିଛି ଏବଂ ନେଟୱାର୍କ ସହ ଜଡ଼ିତ ଅନ୍ୟ ଅଭିଯୁକ୍ତମାନଙ୍କୁ ଚିହ୍ନଟ କରିବା ପରେ ଆଗାମୀ ଦିନରେ ଆହୁରି ଗିରଫଦାରୀ ହୋଇପାରେ।