ଡିସେମ୍ବର ୧ରୁ ଆରମ୍ଭ ହୋଇଛି ସଂସଦର ଶୀତକାଳୀନ ଅଧିବେଶନ । ଆଉ ପ୍ରଥମ ଦିନରେ ହିଁ କଂଗ୍ରେସ ସାଂସଦ ରେଣୁକା ଚୌଧୁରୀ ଏକ ବିବାଦରେ ଫସି ଯାଇଛନ୍ତି । ସେ ସଂସଦରେ କୌଣସି ବୟାନ ଦେଇ ନୁହେଁ ବରଂ ସଂସଦକୁ କୁକୁରକୁ ଆଣି ବିବାଦରେ ଫସିଛନ୍ତି ।
ସୂଚନା ଅନୁସାରେ, ଆଜିଠୁ ଆରମ୍ଭ ହୋଇଛି ସସଦର ଶୀତ ଅଧିବେଶନ । ଆଉ ପ୍ରଥମ ଦିନରେ କଂଗ୍ରେସ ସାଂସଦ ରେଣୁକା ଚୌଧୁରୀ ତାଙ୍କ ପୋଷା କୁକୁର ସହ ସଂସଦରେ ପହଞ୍ଚିଥିଲେ । ଯାହାର ଭିଡିଓ ସାମ୍ନାକୁ ଆସିବା ପରେ ଏହାକୁ ନେଇ ରାଜନୈତିକ ମହଲରେ ହଇଚଇ ସୃଷ୍ଟି ହୋଇଛି । ବିଜେପି ଏହାକୁ ସଂସଦର ମର୍ଯ୍ୟାଦାର ଉଲ୍ଲଂଘନ ବୋଲି କହି ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛି ।

ଯେତେବେଳେ ଗଣମାଧ୍ୟମ ରେଣୁକା ଚୌଧୁରୀଙ୍କୁ ଏହି ଘଟଣା ବିଷୟରେ ପ୍ରଶ୍ନ କରିଥିଲେ, ସେ ପାଲଟା ଜବାବ ଦେଇ କହିଥିଲେ ଯେ ଏହି ଘଟଣାକୁ ଅଯଥାରେ ବିବାଦକୁ ଅଣାଯାଉଛି । ସେ କହିଛନ୍ତି, ଏଥିରେ କ'ଣ ସମସ୍ୟା ଅଛି । ଯଦି ଏକ ମୂକ ପଶୁ ଭିତରକୁ ପଶିଯାଏ ତେବେ ଏଥିରେ ବଡ଼ କଥା କ'ଣ ? ଏହା ଛୋଟ ପଶୁଟିଏ ଏବଂ ଏହା କାମୁଡ଼ିବ ନାହିଁ । ରେଣୁକାଙ୍କ ଏହି ବୟାନ ବିବାଦକୁ ଆହୁରି ବଢ଼ାଇ ଦେଇଛି ।

ବିଜେପି ସାଂସଦ ଜଗଦମ୍ବିକା ପାଲ ଏହି ମାମଲାରେ ତୀବ୍ର ପ୍ରତିକ୍ରିୟା ପ୍ରକାଶ କରି ରେଣୁକା ଚୌଧୁରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି । ବିଜେପି ସାଂସଦ କହିଛନ୍ତି ଯେ ଯଦି ଜଣେ ସାଂସଦଙ୍କୁ କିଛି ବିଶେଷ ଅଧିକାର ପ୍ରଦାନ କରାଯାଏ, ତେବେ ତାହାର ଅପବ୍ୟବହାର କରାଯିବା ଉଚିତ୍ ନୁହେଁ ।

ସେ କହିଛନ୍ତି, "ଏହି ଗୃହ ଜାତୀୟ ନୀତି ବିଷୟରେ ଆଲୋଚନା କରିବାର ସ୍ଥାନ... ସେଠାକୁ ତାଙ୍କ କୁକୁରକୁ ଆଣିବା ଏବଂ ପରେ ଏହାକୁ ନେଇ ବିବାଦୀୟ ବୟାନ ଦେଶକୁ ଲଜ୍ଜିତ କରୁଛି । ସେ ଏଭଳି ଘଟଣାକୁ ଗଣତନ୍ତ୍ର ପ୍ରତି ଆଘାତ ଏବଂ ସଂସଦ ପ୍ରତି ଅପମାନ ବୋଲି କହିଛନ୍ତି । ଏହା ସହ କଂଗ୍ରେସ ସାଂସଦଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ୍ ବୋଲି ସେ କହିଛନ୍ତି ।

ସେପଟେ ସଂସଦର ଶୀତକାଳୀନ ଅଧିବେଶନ ପୂର୍ବରୁ ପ୍ରଧାନମନ୍ତ୍ରୀଙ୍କ ସମ୍ବୋଧନ । ଶୀତକାଳୀନ ଅଧିବେଶନ କେବଳ ଏକ ରୀତିନୀତି ନୁହେଁ, ଏହା ଗଣତନ୍ତ୍ରକୁ ବଞ୍ଚାଇଛି । ସଂସଦରେ ବିରୋଧୀ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉଠାଇବା ଉଚିତ୍‌ । ସଂସଦ ଡ୍ରାମା ଓ ହଙ୍ଗାମାର ଜାଗା ନୁହେଁ, ଡ୍ରାମା ପାଇଁ ଅନେକ ଜାଗା ଅଛି । ଯେଉଁମାନେ ନାଟକ କରିବାକୁ ଚାହାଁନ୍ତି ସେମାନେ ଏହା କରିପାରିବେ । ସଂସଦରେ ନାକାରାତ୍ମକ ବିଚାରଧାରା ଆସିବା ଉଚିତ୍‌ ନୁହେଁ ।

ସଂସଦରେ ନୂତନ ସଦସ୍ୟଙ୍କୁ ସୁଯୋଗ ଦିଅନ୍ତୁ । ପରାଜୟର ଭୟ ବିତର୍କର କ୍ଷେତ୍ର ନହେବା ଉଚିତ୍ । ଶୀତକାଳୀନ ଅଧିବେଶନ ଭାରତ ଗଣତନ୍ତ୍ରକୁ ବଞ୍ଚାଇଛି । ଜନପ୍ରତିନିଧି ଭାବରେ, ଆମେ ଭବିଷ୍ୟତ ବିଷୟରେ ଚିନ୍ତା କରିବା । ଏଠି ନାରାବାଜି ନୁହେଁ ନୀତି ଏବଂ ଦେଶ ଗଠନରେ ସକରାତ୍ମକ ଭୂମିକା ନେବା ଆବଶ୍ୟକ ବୋଲି ସଂସଦର ଶୀତ ଅଧିବେଶନ ଅବସରରେ ସମ୍ବୋଧନ କରି ଏହା କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।