'ବିହାର' ଓ 'ବିଡି' ପୋଷ୍ଟକୁ ନେଇ ରାଜନୈତିକ ଝଡ଼ । କଂଗ୍ରେସର କେରଳ ୟୁନିଟ୍ GST ସଂସ୍କାରକୁ ନେଇ କେନ୍ଦ୍ରର ବିଜେପି ସରକାରଙ୍କୁ ଟାର୍ଗେଟ କରି ଏକ ପୋଷ୍ଟ ସେୟାର କରିଛି । ଯାହାକୁ ନେଇ ବିହାରରେ ଏବେ ରାଜନୈତିକ ଝଡ଼ ସୃଷ୍ଟି ହୋଇଛି । କଂଗ୍ରେସ ପକ୍ଷରୁ କରାଯାଇଥିବର ପୋଷ୍ଟରେ ବିଡି ଏବଂ ବିହାରକୁ 'B' ସହିତ ଯୋଡ଼ି ତାଚ୍ଛଲ୍ୟ କରାଯାଇଥିଲା । ଯାହାକୁ BJP ଏବଂ JDU ବିହାରର ଅପମାନ ବୋଲି କହିଛନ୍ତି । ତେବେ ଏହି ବିବାଦ ଏବେ ଆଗକୁ ହେବାକୁ ଥିବା ବିହାର ବିଧାନସଭା ନିର୍ବାଚନରେ ଏକ ବଡ଼ ପ୍ରସଙ୍ଗ ହେବାକୁ ଯାଉଛି ।

କେରଳ କଂଗ୍ରେସ ଦ୍ୱାରା ସୋସିଆଲ ମିଡିଆ ପ୍ଲାଟଫର୍ମ `X'ରେ ଏକ ଫଟୋ ସେୟାର କରାଯାଇଥିଲା । ଏଥିରେ ସିଗାରେଟ୍ ଏବଂ ଅନ୍ୟାନ୍ୟ ତମାଖୁ ଉତ୍ପାଦ ଏବଂ ବିଡି ଉପରେ ଲାଗୁ ହୋଇଥିବା GSTର ତୁଳନା କରାଯାଇଛି । କୁହାଯାଇଛି ଯେ ତମାଖୁ ଉପରେ GST ବର୍ତ୍ତମାନର ୨୮ ପ୍ରତିଶତରୁ ୪୦ ପ୍ରତିଶତକୁ ବୃଦ୍ଧି କରାଯାଇଛି । ସିଗାରେଟ୍ ଏବଂ ସିଗାର୍ ଉପରେ ଟିକସ ସମାନ ଭାବରେ ବୃଦ୍ଧି କରାଯାଇଛି । କିନ୍ତୁ ବିଡ଼ି ଉପରେ GST ହ୍ରାସ କରାଯାଇଛି। ପୂର୍ବରୁ ବିଡ଼ି ଉପରେ ୨୮ ପ୍ରତିଶତ GST ଥିଲା, ଯାହାକୁ ଏବେ ୧୮ ପ୍ରତିଶତକୁ ହ୍ରାସ କରାଯାଇଛି । 'ବିଡି ଏବଂ ବିହାର' ଉଭୟ 'B' ରୁ ଆରମ୍ଭ ହୁଏ, ଏବେ ଏହାକୁ ସିନ୍ ବା ହାନୀକାରକ ବୋଲି ଆଉ ବିବେଚନା କରାଯାଇପାରିବ ନାହିଁ । ଯଦିଓ କେରଳ କଂଗ୍ରେସ ପକ୍ଷରୁ ଏହି ପୋଷ୍ଟକୁ ହଟାଇ ଦିଆଯାଇଛି, କିନ୍ତୁ ବିଜେପି ଓ ଜେଡିୟୁ ଏହାକୁ ନେଇ କଂଗ୍ରେସକୁ କଡ଼ା ସମାଲୋଚନା କରିଛି ।

ବିହାରର ଉପମୁଖ୍ୟମନ୍ତ୍ରୀ ଏବଂ ବିଜେପି ନେତା ସମ୍ରାଟ ଚୌଧୁରୀ ଏହାକୁ "ସମଗ୍ର ବିହାର ପାଇଁ ଅପମାନ" ବୋଲି କହିଛନ୍ତି । ସେ କହିଛନ୍ତି ଯେ କଂଗ୍ରେସ ବାରମ୍ବାର ତା'ର ସଂକୀର୍ଣ୍ଣ ମନୋଭାବ ପ୍ରଦର୍ଶନ କରୁଛି । ଜେଡିୟୁ ନେତା ସଞ୍ଜୟ କୁମାର ଝା ମଧ୍ୟ ଏହାକୁ ନେଇ ଏକ କଡ଼ା ମନ୍ତବ୍ୟ ରଖିଛନ୍ତି । ସେ ଏକ ପୋଷ୍ଟରେ ଲେଖିଛନ୍ତି: "ମୁଁ ଆପଣଙ୍କୁ କହିବାକୁ ଚାହୁଁଛି ଯେ B ର ଅର୍ଥ କେବଳ ବିଡ଼ି ନୁହେଁ, ଏହାର ଅର୍ଥ ବୁଦ୍ଧିମତ୍ତା ମଧ୍ୟ, ଯାହା ଆପଣଙ୍କ ପାଖରେ ନାହିଁ ! B ର ଅର୍ଥ ବଜେଟ୍ ମଧ୍ୟ, ଯେଉଁଥିରେ ବିହାରକୁ ବିଶେଷ ସହାୟତା ମିଳିଲେ ଆପଣ ବିରକ୍ତ ଅନୁଭବ କରନ୍ତି । କଂଗ୍ରେସ କେବଳ ବିହାରୀମାନଙ୍କୁ ନୁହେଁ ବରଂ ଦେଶର ଗୌରବମୟ ଐତିହ୍ୟକୁ ମଧ୍ୟ ଉପହାସ କରିଛି ବୋଲି ଜେଡିୟୁ ନେତା ସଞ୍ଜୟ ଝା କହିଛନ୍ତି । ସେହିପରି ସଞ୍ଜୟ ଝା ଚେତାବନୀ ଦେଇଛନ୍ତି ଯେ ବିହାରର ଲୋକମାନେ ନଭେମ୍ବର-ଡିସେମ୍ବର 2025 ରେ ହେବାକୁ ଥିବା ବିଧାନସଭା ନିର୍ବାଚନରେ କଂଗ୍ରେସକୁ ଯଥାର୍ଥ ଜବାବ ଦେବେ ।

पहले हमारे माननीय प्रधानमंत्री श्री @narendramodi जी की पूजनीय माता जी का अपमान और अब पूरे बिहार का अपमान — यही है कांग्रेस का असली चरित्र, जो बार-बार देश के सामने उजागर हो रहा है। pic.twitter.com/VvliP16tTJ
— Samrat Choudhary (@samrat4bjp) September 5, 2025

ସେହିପରି ବିଜେପି ମୁଖପାତ୍ର ଶେହଜାଦ ପୁନାୱାଲା ମଧ୍ୟ କଂଗ୍ରେସର "ବିହାର ବିରୋଧୀ ମାନସିକତା" ଉପରେ ଟାର୍ଗେଟ କରି କହିଛନ୍ତି, "ଯଦି B ବିଡ଼ି ଏବଂ ବିହାର ପାଇଁ ଅଟେ, ତେବେ C କଂଗ୍ରେସ ଏବଂ ଦୁର୍ନୀତି ପାଇଁ ଅଟେ ।" ସେପଟେ ସୋସିଆଲ ମିଡିଆରୁ ଏହି ପୋଷ୍ଟ ହଟାଇବା ପରେ, କଂଗ୍ରେସ ପକ୍ଷରୁ କୌଣସି ସ୍ପଷ୍ଟୀକରଣ ଆସିନାହିଁ ।

Argus News | argus news | Odisha Latest News, Breaking News, Trending News, Live TV