ନୂଆଦିଲ୍ଲୀ: ଦିଲ୍ଲୀ-ଏନ୍ସିଆର୍ରେ ବଢ଼ୁଥିବା ବାୟୁ ପ୍ରଦୂଷଣ ଏବେ ଲୋକଙ୍କ ଚିନ୍ତା ବଢ଼ାଇଛି । ଖରାପ ବାୟୁ ଗୁଣବତ୍ତାରୁ ରକ୍ଷା ପାଇବା ପାଇଁ ଲୋକେ ଘରେ ଏୟାର ପ୍ୟୁରିଫାୟର୍ ଲଗାଉଥିବା ଦେଖିବାକୁ ମିଳିଛି । ଏହାର ପ୍ରଭାବ ଏବେ ବଜାରରେ ଦେଖିବାକୁ ମିଳିଛି । ଦିଲ୍ଲୀରେ ଏୟାର ପ୍ୟୁରିଫାୟର୍ର ଚାହିଦା ପ୍ରାୟ ୨୦ ଗୁଣ ବଢ଼ିଥିବା ବେଳେ ଅନଲାଇନ୍ ଓ କ୍ୱିକ୍ କମର୍ସ ପ୍ଲାଟଫର୍ମରେ ମଧ୍ୟ ଏହାର ବିକ୍ରି ଜୋରଦାର ବୃଦ୍ଧି ପାଇଛି।
- ଦିଲ୍ଲୀ-ଏନ୍ସିଆର୍ରେ ସର୍ବାଧିକ ଚାହିଦା
ଦୀପାବଳି ପରେ ଦିଲ୍ଲୀ-ଏନ୍ସିଆର୍ ସମେତ ଦେଶର ଅନେକ ସହରରେ ବାୟୁ ପ୍ରଦୂଷଣ ବଢ଼ିଛି । ଶୀତ ଋତୁର ଆଗମନ ସହ ପ୍ରଦୂଷଣ ସ୍ଥିତି ଆହୁରି ଚିନ୍ତାଜନକ ହୋଇପଡ଼ିଛି । ଫଳରେ ଲୋକେ ଘର ଭିତରର ବାୟୁକୁ ସ୍ୱଚ୍ଛ ରଖିବା ପାଇଁ ଏୟାର ପ୍ୟୁରିଫାୟର୍ କିଣୁଛନ୍ତି । ଏହି ଚାହିଦା କେବଳ ଦିଲ୍ଲୀରେ ସୀମିତ ନାହିଁ । ମୁମ୍ବାଇ, ବେଙ୍ଗାଲୁରୁ ଓ କୋଲକାତା ଭଳି ସହରରେ ମଧ୍ୟ ଏୟାର ପ୍ୟୁରିଫାୟର୍ ପ୍ରତି ଲୋକଙ୍କ ଆଗ୍ରହ ବଢ଼ୁଛି ।
- ଏକାଧିକ ରୁମ୍ ପାଇଁ କିଣୁଛନ୍ତି ଲୋକେ
ପୂର୍ବରୁ ଲୋକେ ପୂରା ଘର ପାଇଁ ଗୋଟିଏ ଏୟାର ପ୍ୟୁରିଫାୟର୍ କିଣୁଥିଲେ । କିନ୍ତୁ ଏବେ ଅନେକ ପରିବାର ପ୍ରତ୍ୟେକ ରୁମ୍ ପାଇଁ ଅଲଗା ଅଲଗା ପ୍ୟୁରିଫାୟର୍ କିଣୁଛନ୍ତି । ଦିଲ୍ଲୀର ଏକ ବଡ଼ ଇଲେକ୍ଟ୍ରୋନିକ୍ସ ଷ୍ଟୋର୍ରେ ଏହାର ଚାହିଦା ପ୍ରାୟ ୫୦ ପ୍ରତିଶତ ବଢ଼ିଛି । କିଛି ଗ୍ରାହକ ଦ୍ୱିତୀୟ ଓ ତୃତୀୟ ଏୟାର ପ୍ୟୁରିଫାୟର୍ କିଣିବା ପାଇଁ ମଧ୍ୟ ପୁଣି ଷ୍ଟୋର୍କୁ ଆସୁଛନ୍ତି ।
- ବ୍ଲିଙ୍କଇଟ୍, ଜେପ୍ଟୋରେ ବଢ଼ିଲା ବିକ୍ରି
ଏୟାର ପ୍ୟୁରିଫାୟର୍ର ବଢ଼ୁଥିବା ଚାହିଦାର ପ୍ରଭାବ କ୍ୱିକ୍ କମର୍ସ ପ୍ଲାଟଫର୍ମ ଉପରେ ମଧ୍ୟ ପଡ଼ିଛି । ବ୍ଲିଙ୍କଇଟ୍, ଜେପ୍ଟୋ ଓ ଇନ୍ଷ୍ଟାମାର୍ଟ ଭଳି ପ୍ଲାଟଫର୍ମରେ ଏହାର ବିକ୍ରି ଦ୍ରୁତ ଗତିରେ ବଢ଼ିଛି । ସେପଟେ, ଆମାଜନ୍ରେ ମାତ୍ର ଗୋଟିଏ ସପ୍ତାହ ମଧ୍ୟରେ ଏୟାର ପ୍ୟୁରିଫାୟର୍ ବିକ୍ରି ଦୁଇଗୁଣ ହୋଇଛି । ବଜାର ତଥ୍ୟ ଅନୁଯାୟୀ, ଅକ୍ଟୋବରରେ କ୍ୱିକ୍ କମର୍ସ ପ୍ଲାଟଫର୍ମଗୁଡ଼ିକରେ ଶୀତଦିନେ ବ୍ୟବହୃତ ସାମଗ୍ରୀର ଦୈନିକ ବିକ୍ରି ପ୍ରାୟ ୨୯ ଲକ୍ଷ ଟଙ୍କାରେ ପହଞ୍ଚିଛି । ଯାହା ସେପ୍ଟେମ୍ବର ତୁଳନାରେ ୫୫ ପ୍ରତିଶତ ଅଧିକ । ଏହି ସମୟରେ ଏୟାର ପ୍ୟୁରିଫାୟର୍ର ଦୈନିକ ବିକ୍ରି ୩.୭ ଗୁଣ ବଢ଼ି ପ୍ରାୟ ୯.୬ ଲକ୍ଷ ଟଙ୍କାରେ ପହଞ୍ଚିଛି । ସେହିପରି ରୁମ୍ ହିଟର୍ର ବିକ୍ରି ୧.୬ ଗୁଣ ବଢ଼ି ଦୈନିକ ପ୍ରାୟ ୧୦ ଲକ୍ଷ ଟଙ୍କା ହୋଇଛି ।
ପଢନ୍ତୁ ଏହି ଖବର: ଦୀପାବଳି ପରେ ଦିଲ୍ଲୀରେ ବିଷାକ୍ତ ବାୟୁ…AQI ୪୬୩, ଗ୍ୟାସ୍ ଚାମ୍ବର ପାଲଟିଲା ରାଜଧାନୀ- ଆଗକୁ ଆହୁରି ବଢ଼ିପାରେ ଚାହିଦା
ବଜାର ବିଶ୍ଳେଷକଙ୍କ ମତରେ, ଏୟାର ପ୍ୟୁରିଫାୟର୍ର ବିକ୍ରି ଏବେ ସର୍ବୋଚ୍ଚ ସ୍ତରରେ ପହଞ୍ଚିନାହିଁ । ଗତବର୍ଷ ଅକ୍ଟୋବରରୁ ନଭେମ୍ବର ମଧ୍ୟରେ କ୍ୱିକ୍ କମର୍ସ ପ୍ଲାଟଫର୍ମରେ ଶୀତଦିନିଆ ସାମଗ୍ରୀର ବିକ୍ରି ୫.୭ ଗୁଣ ବୃଦ୍ଧି ପାଇଥିଲା । ଏପରିକି ଜାନୁଆରୀରେ ଏହି ବିକ୍ରି ଅକ୍ଟୋବର ତୁଳନାରେ ପ୍ରାୟ ୧୦ ଗୁଣ ହୋଇଥିଲା । ତେଣୁ ଆଗାମୀ ମାସଗୁଡ଼ିକରେ ଏୟାର ପ୍ୟୁରିଫାୟର୍ର ଚାହିଦା ଆହୁରି ବଢ଼ିବାର ସମ୍ଭାବନା ରହିଛି ।
- ଆମାଜନ୍ ନାଓରେ ବଢ଼ିଲା ଉପଲବ୍ଧତା
ଗ୍ରାହକଙ୍କ ବଢ଼ୁଥିବା ଆବଶ୍ୟକତାକୁ ଦେଖି ଆମାଜନ୍ ନିଜର କ୍ୱିକ୍ କମର୍ସ ପ୍ଲାଟଫର୍ମ 'ଆମାଜନ୍ ନାଓ'ରେ ଏୟାର ପ୍ୟୁରିଫାୟର୍ର ଉପଲବ୍ଧତା ବଢ଼ାଇଛି । ଏଥିସହ ଗ୍ରାହକମାନେ ନିଜ ଘରର ରୁମ୍ର ଆକାର ଓ ଆବଶ୍ୟକତା ଅନୁଯାୟୀ ଉପଯୁକ୍ତ ପ୍ୟୁରିଫାୟର୍ ବାଛିବା ପାଇଁ ଆମାଜନ୍ର AI ଶପିଂ ଆସିଷ୍ଟାଣ୍ଟ 'Rufus'ର ସହାୟତା ମଧ୍ୟ ନେଉଛନ୍ତି । ବଢ଼ୁଥିବା ପ୍ରଦୂଷଣ ଏବେ କେବଳ ସ୍ୱାସ୍ଥ୍ୟ ସମସ୍ୟା ନୁହେଁ, ବରଂ ଏହା ଏକ ବଡ଼ ବଜାର ସୁଯୋଗରେ ମଧ୍ୟ ପରିଣତ ହେଉଥିବା ଦେଖିବାକୁ ମିଳିଛି ।
