Air India / ହଠାତ୍ ୩୦୦ ଫୁଟ୍ ଉଚ୍ଚରେ ଏୟାର ଇଣ୍ଡିଆ ବିମାନରେ ଆତଙ୍କ; ଅନେକ ଯାତ୍ରୀ ଆହତ

ଏୟାର ଇଣ୍ଡିଆର ଥାଇଲ୍ୟାଣ୍ଡରୁ ଦିଲ୍ଲୀ ଆସୁଥିବା ଫ୍ଲାଇଟରେ ଅଘଟଣ । ମଝି ଆକାଶରେ ଭୟଙ୍କର ଟର୍ବୁଲାନ୍ସ । ଅଘଟଣରେ ଅନେକ ଯାତ୍ରୀ ଆହତ ହୋଇଥିବା ଜଣାପଡ଼ିଛି । ଏହି ବିମାନଟି ଥାଇଲ୍ୟାଣ୍ଡର ଫୁକେଟରୁ ଦିଲ୍ଲୀ ଆସୁଥିଲା । ଟର୍ବୁଲାନ୍ସ ଏତେ ଭୟଙ୍କର ଥିଲା ଯେ କେଉଁ ଯାତ୍ରୀଙ୍କ କାନରେ ତ ଆଉ କେଉଁ ଯାତ୍ରୀଙ୍କ ବେକରେ ଆଘାତ ଲାଗିଛି । ଏବେ ସେମାନଙ୍କ ଚିକିତ୍ସା କରାଯାଉଛି । ଘଟଣାରେ ମୋଟ ୧୨ଜଣ ଯାତ୍ରୀ ଆହତ ହୋଇଛନ୍ତି ।

ଏୟାର ଇଣ୍ଡିଆ ପକ୍ଷରୁ କୁହାଯାଇଛି ଯେ ଅଗଷ୍ଟ ୪ରେ ଫୁକେଟରୁ ଦିଲ୍ଲୀ ଆସୁଥିବା ବିମାନ AI2379 ଉଡ଼ାଣ ବେଳେ କିଛି ସମୟ ପର୍ଯ୍ୟନ୍ତ ଟର୍ବୁଲାନ୍ସର ସାମ୍ନା କରିବାକୁ ପଡ଼ିଥିଲା, ଯେଉଁଥିରେ ବିମାନର ଉଚ୍ଚତାରେ ହଠାତ୍ ପରିବର୍ତ୍ତନ ହୋଇଥିଲା । ମାତ୍ର ଏବେ ବିମାନଟି ଦିଲ୍ଲୀରେ ସୁରକ୍ଷିତ ଭାବେ ଅବତରଣ କରିଛି ଓ ୧୨ ଜଣ ଯାତ୍ରୀଙ୍କୁ ଛାଡ଼ିଦେଲେ ଅନ୍ୟ ଯାତ୍ରୀ ଓ କ୍ରୁ ମେମ୍ବର ସୁରକ୍ଷିତ ଅଛନ୍ତି ।

• ହଠାତ୍ ତଳକୁ ଖସିଲା ବିମାନ

ଯାତ୍ରୀମାନେ କହିଛନ୍ତି ଯେ ଦିଲ୍ଲୀରେ ଅବତରଣ କରିବା ପୂର୍ବରୁ ବିମାନଟି ହଠାତ୍ ତଳକୁ ଖସିଯାଇଥିଲା । ଘଟଣାରେ ଯାତ୍ରୀ ଖୁବ ଭୟଭୀତ ହୋଇଯାଇଥିବାବେଳେ ଚିତ୍କାର କରିଥିଲେ । ଏହି ସମୟରେ ଅନେକ ଯାତ୍ରୀ ଆହତ ହୋଇଛନ୍ତି । ତେବେ ପାଇଲଟ ବହୁ କଷ୍ଟରେ ବିମାନକୁ ସଫଳତାପୂର୍ବକ ଅବତରଣ କରିଥିବା ଜଣାପଡ଼ିଛି ।

#Breaking - An Air India plane sways violently, throwing passengers without seat belts into the air! Horrifying turbulence on the Phuket-Delhi Air India flight. pic.twitter.com/PHnnaYgbEQ

— NEWS WALA (@NEWSWALApy) August 4, 2026

• ଆହତ ଯାତ୍ରୀଙ୍କ ଚିକିତ୍ସା ଜାରି

ଏୟାର ଇଣ୍ଡିଆ କର୍ତ୍ତୃପକ୍ଷଙ୍କ କହିବାନୁସାରେ, ସୌଭାଗ୍ୟବଶତଃ କୌଣସି ଯାତ୍ରୀଙ୍କୁ ଅଧିକ ଆଘାତ ଲାଗିନାହିଁ । ଯେଉଁମାନେ ସାମାନ୍ୟ ଆହତ ହୋଇଛନ୍ତି ସେମାନଙ୍କୁ ବିମାନ ବନ୍ଦରରେ ଚିକିତ୍ସା କରାଯାଉଛି । ଘଟଣାର ଗମ୍ଭୀରତାକୁ ଦୃଷ୍ଟିରେ ରଖି ଏୟାର ଇଣ୍ଡିଆର ବିମାନବନ୍ଦର ଟିମ ଓ ମେଡିକାଲ ସଦସ୍ୟମାନେ ତୁରନ୍ତ ବିମାନବନ୍ଦରରେ ପହଞ୍ଚିଥିଲେ । ଯାତ୍ରୀ ଓ କ୍ରୁ ମେମ୍ବରଙ୍କ ସୁରକ୍ଷା ଏୟାରଲାଇନ୍ସ ପାଇଁ ସବୁଠୁ ଗୁରୁତ୍ଵପୂର୍ଣ୍ଣ ବୋଲି ଏୟାର ଇଣ୍ଡିଆ ପକ୍ଷରୁ କୁହାଯାଇଛି ।

• ଏୟାର ଟର୍ବୁଲାନ୍ସ ମାନେ କଣ ?

ମଝି ଆକାଶରେ ଏୟାର ଟର୍ବୁଲାନ୍ସ ସେତେବେଳେ ସୃଷ୍ଟି ହୁଏ ଯେତେବେଳେ ପବନର ଗତି ଅନିୟମିତ ହୋଇଥାଏ । ପୃଥିବୀପୃଷ୍ଠରେ ପ୍ରବଳ ଗରମ ଯୋଗୁଁ ଗରମ ପବନ ଆକାଶକୁ ଉଠେ ଓ ଥଣ୍ଡା ପବନ ତଳକୁଆସେ, ଯାହାଦ୍ଵାରା ଥର୍ମାଲ୍ ଡିଷ୍ଟର୍ବାନ୍ସ ହୁଏ । ପାହାଡ଼ରେ ଧକ୍କା ଖାଇବା ଯୋଗୁଁ ପବନ ଉପର ତଳ କରି ବିଭିନ୍ନ ସ୍ତର ସୃଷ୍ଟି କରେ । ଏହି ସମୟରେ ବିମାନଟି ଉପର ତଳ କିମ୍ଵା ବାମ ଡାହାଣ ଧକ୍କା ଅନୁଭବ କରେ । ଏପରି ସ୍ଥିତିରେ ବିମାନଟି ହଲିଥାଏ । ଏହି ସମୟରେ ଯାତ୍ରୀମାନଙ୍କୁ ସିଟ୍ ବେଲ୍ଟ ବାନ୍ଧି ରଖିବା ଉଚିତ । ନଚେତ୍ ସେମାନେ ଖସିପଡ଼ି ବା ଏପଟ ସେପଟ ହୋଇ ଆହତ ହୋଇଥାନ୍ତି ।