ଡିଜିଟାଲ୍ ଆରେଷ୍ଟ ଠକେଇର ଶିକାର ହୋଇଛନ୍ତି ୬୯ ବର୍ଷୀୟ ଜଣେ ଅବସରପ୍ରାପ୍ତ ବୈଜ୍ଞାନିକ । ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରଣାଳୟର ପୂର୍ବତନ ନିର୍ଦ୍ଦେଶକ ପ୍ରଦୀପ କୁମାର ଦାସଙ୍କଠାରୁ ଠକମାନେ ୧.୨୫ କୋଟି ଟଙ୍କା ଠକି ନେଇଥିବା ଅଭିଯୋଗ ହୋଇଛି । ଏହି ଘଟଣାର ତଦନ୍ତ କରି ଦିଲ୍ଲୀ ପୋଲିସ ଏକ ଆନ୍ତର୍ଜାତୀୟ ସାଇବର ଠକେଇ ନେଟୱର୍କର ପର୍ଦ୍ଦାଫାସ୍ କରିଛି । ଏହି ଗ୍ୟାଙ୍ଗର ସମ୍ପର୍କ କାମ୍ବୋଡିଆ ସମେତ ଦକ୍ଷିଣ-ପୂର୍ବ ଏସିଆର ଅନ୍ୟ ଦେଶରେ ଥିବା ହ୍ୟାଣ୍ଡଲରଙ୍କ ସହ ରହିଥିବା ପୋଲିସ ସନ୍ଦେହ କରୁଛି ।

ଏହା ବ୍ୟତୀତ ଆନ୍ଧ୍ରପ୍ରଦେଶର ଜଣେ ୭୯ ବର୍ଷୀୟ ବ୍ୟକ୍ତିଙ୍କଠାରୁ ଡିଜିଟାଲ୍ ଆରେଷ୍ଟ ନାମରେ ହୋଇଥିବା ଠକେଇ ମାମଲାରେ ୭.୨୫ କୋଟି ଟଙ୍କା ଜବତ କରିବାରେ ପୋଲିସ ସଫଳ ହୋଇଛି । ଅନ୍ୟ କେତେକ ଠକେଇ ମାମଲା ସହ ଜଡ଼ିତ ବ୍ୟାଙ୍କ ଖାତାରେ ଥିବା ୧.୯୬ କୋଟି ଟଙ୍କା ମଧ୍ୟ ଅଟକ ରଖାଯାଇଛି ।

କିପରି ହୋଇଥିଲା ୧.୨୫ କୋଟି ଟଙ୍କାର ଠକେଇ ?
ପୋଲିସର ସୂଚନା ଅନୁଯାୟୀ, ଅଗଷ୍ଟ ୧୪ ତାରିଖରେ ପ୍ରଦୀପ କୁମାର ଦାସଙ୍କ ପାଖକୁ ଏକ ଫୋନ୍ କଲ୍ ଆସିଥିଲା । ଫୋନ୍ କରିଥିବା ବ୍ୟକ୍ତିମାନେ ନିଜକୁ ଦିଲ୍ଲୀ ପୋଲିସ, ଆତଙ୍କବାଦ ନିରୋଧୀ ଦଳ (ATS) ଏବଂ ଜାତୀୟ ତଦନ୍ତକାରୀ ସଂସ୍ଥା (NIA)ର ଅଧିକାରୀ ବୋଲି ପରିଚୟ ଦେଇଥିଲେ । ସେମାନେ ଦାସଙ୍କ ଆଧାର ବିବରଣୀ ଏକ ମନି ଲଣ୍ଡରିଂ ବା ଅର୍ଥ ହେରଫେର ମାମଲାରେ ବ୍ୟବହାର ହୋଇଥିବା ଦାବି କରିଥିଲେ । ଏହାସହ ତାଙ୍କୁ ଗିରଫ କରାଯିବ ବୋଲି ଧମକ ଦେଇଥିଲେ ।
ଯାଞ୍ଚରେ ଅଭିଯୁକ୍ତମାନେ ତାଙ୍କଠାରୁ ବ୍ୟାଙ୍କ ଖାତା ସମ୍ପର୍କିତ ତଥ୍ୟ ନେଇଥିଲେ । ପରେ RTGS ମାଧ୍ୟମରେ ତିନୋଟି ବ୍ୟାଙ୍କ ଖାତାକୁ ମୋଟ ୧,୨୫,୦୯,୦୦୦ ଟଙ୍କା ପଠାଇବାକୁ ତାଙ୍କୁ କହିଥିଲେ । ଏତିକି ନୁହେଁ, ଠକମାନେ ତାଙ୍କୁ ଲଗାତାର ଭିଡିଓ ନଜରରେ ରଖିବା ସହ ତାଙ୍କ ଗତିବିଧି ଉପରେ ନିୟନ୍ତ୍ରଣ ରଖିଥିବା ଅଭିଯୋଗ ହୋଇଛି ।

ଏହି ଘଟଣା ପରେ ଦିଲ୍ଲୀ ପୋଲିସର ସ୍ପେଶାଲ୍ ସେଲ୍ ଥାନାରେ ଏଫ୍‌ଆଇଆର୍ ରୁଜୁ ହୋଇଥିଲା । ଟଙ୍କା କେଉଁ କେଉଁ ଖାତାକୁ ଯାଇଛି ଏବଂ ଏହା ପଛରେ କେଉଁମାନେ ଅଛନ୍ତି, ତାହା ଜାଣିବା ପାଇଁ ତଦନ୍ତ ଆରମ୍ଭ ହୋଇଥିଲା ।

ଦ୍ୱାରକାରୁ ୫ ଅଭିଯୁକ୍ତ ଗିରଫ
ତଦନ୍ତ ସମୟରେ ପୋଲିସକୁ ସୂଚନା ମିଳିଥିଲା ଯେ ଏକ ଗୋଷ୍ଠୀ ସାଇବର ଠକେଇ ପାଇଁ ବ୍ୟାଙ୍କ ଖାତା ଯୋଗାଡ଼ କରୁଛି । ଏହି ଗୋଷ୍ଠୀ ‘M/s MR Traders’ ନାମରେ ଥିବା ଏକ ବ୍ୟାଙ୍କ ଖାତାକୁ ମଧ୍ୟ ବ୍ୟବହାର କରୁଥିବା ସନ୍ଦେହ ହୋଇଥିଲା । ଏହାପରେ ଦିଲ୍ଲୀର ଦ୍ୱାରକା ସେକ୍ଟର-୭ ଅନ୍ତର୍ଗତ ରାମଫଲ୍ ଚୌକ୍ ନିକଟରେ ଥିବା ଏକ ସ୍ଥାନରେ ପୋଲିସ ଚଢ଼ାଉ କରିଥିଲା । ସେଠାରୁ ପାଞ୍ଚ ଜଣଙ୍କୁ ଧରାଯାଇଥିଲା ।

ଗିରଫ ଅଭିଯୁକ୍ତମାନେ ହେଲେ:
- ମହମ୍ମଦ ମହଫୁଜାର ରହମାନ, ୪୧ ବର୍ଷ, ଇଝାର ଆଲମ, ୩୪ ବର୍ଷ, ଅଲତାଫ ହୁସେନ, ୪୫ ବର୍ଷ, ଇନ୍ତେଖାବ, ୨୭ ବର୍ଷ, ଅନିଶ ଖାନ, ୩୧ ବର୍ଷ । ପୋଲିସର ଅଭିଯୋଗ ଅନୁଯାୟୀ, ଏହି ବ୍ୟକ୍ତିମାନେ ସାଇବର ଠକେଇରେ ଟଙ୍କା କାରବାର ପାଇଁ ବ୍ୟାଙ୍କ ଖାତା ବ୍ୟବହାର କରୁଥିଲେ ।

ଏଥି ସହ ପଢନ୍ତୁ:  ନବରାତ୍ରିରେ ଡିଜିଟାଲ ଉପବାସ କରିବାକୁ ଡାକ୍ତରଙ୍କ ପରାମର୍ଶ, ଜାଣନ୍ତୁ କଣ ଏହି ଡିଜିଟାଲ ଉପବାସ

ମୋବାଇଲ୍‌ରୁ ମିଳିଲା ସନ୍ଦେହଜନକ ଆପ୍ ‘SMS Tools’
ଅଭିଯୁକ୍ତମାନଙ୍କଠାରୁ ଜବତ ମୋବାଇଲ୍ ଫୋନ୍ ଯାଞ୍ଚ କରିବା ସମୟରେ ପୋଲିସକୁ ଟେଲିଗ୍ରାମ୍ ଚାଟ୍ ଏବଂ ‘SMS Tools’ ନାମକ ଏକ ସନ୍ଦେହଜନକ ଆପ୍ ମିଳିଥିଲା ।

ତଦନ୍ତକାରୀଙ୍କ ସନ୍ଦେହ ଅନୁଯାୟୀ, ଏହି ଆପ୍‌କୁ ଏପରି ଭାବେ ସେଟ୍ କରାଯାଇଥିଲା ଯେ ମୋବାଇଲ୍‌କୁ ଆସୁଥିବା SMS ଏବଂ OTP ଭଳି ବାର୍ତ୍ତା ସ୍ୱୟଂଚାଳିତ ଭାବେ ବିଦେଶରେ ଥିବା ସାଇବର ଅପରାଧୀଙ୍କ ପାଖକୁ ପଠାଯାଇପାରିବ । ପୋଲିସ ଅନୁସାରେ, ଅନିଶ ଖାନ ଏହି ଗୋଷ୍ଠୀର ମୁଖ୍ୟ ହ୍ୟାଣ୍ଡଲର୍ ଭାବେ କାମ କରୁଥିଲା । ସେ ଟେଲିଗ୍ରାମ୍ ମାଧ୍ୟମରେ ବିଦେଶରେ ଥିବା ସହଯୋଗୀଙ୍କ ସହ ଯୋଗାଯୋଗ କରିବା ସହ ଟଙ୍କା କାରବାରରେ ବ୍ୟବହୃତ ବ୍ୟାଙ୍କ ଖାତା ପରିଚାଳନା କରୁଥିବା ଅଭିଯୋଗ ହୋଇଛି ।

ଏହି କାମ ପାଇଁ ସେ USDT ନାମକ କ୍ରିପ୍ଟୋକରେନ୍ସିରେ ୫.୫ ପ୍ରତିଶତ କମିସନ୍ ପାଉଥିବା ପୋଲିସ କହିଛି । ପରେ ଏହି ଡିଜିଟାଲ୍ ମୁଦ୍ରାକୁ କ୍ରିପ୍ଟୋ ଏକ୍ସଚେଞ୍ଜ୍ ଓ ପ୍ଲାଟଫର୍ମ ମାଧ୍ୟମରେ ଭାରତୀୟ ଟଙ୍କାରେ ପରିଣତ କରାଯାଉଥିଲା । ଅଭିଯୋଗ ଅନୁସାରେ, ଇଝାର ଆଲମ ବ୍ୟାଙ୍କ ଖାତାଧାରୀଙ୍କୁ ଅଲତାଫ ହୁସେନଙ୍କ ସହ ପରିଚିତ କରାଇଥିଲା । ଅଲତାଫ ଟେଲିଗ୍ରାମ୍ ମାଧ୍ୟମରେ ଅନ୍ୟମାନଙ୍କ ବ୍ୟାଙ୍କ ଖାତା ଯୋଗାଡ଼ କରୁଥିବା ଅଭିଯୋଗ ହୋଇଛି । ଅନ୍ୟପକ୍ଷରେ, ଇନ୍ତେଖାବ ଦିଲ୍ଲୀରେ ଗୋଷ୍ଠୀର ଯାତାୟାତ ଓ ରହଣି ବ୍ୟବସ୍ଥା କରିବା ସହ ବ୍ୟାଙ୍କ ଖାତାଧାରୀଙ୍କ ଉପରେ ନଜର ରଖୁଥିବା ତଦନ୍ତକାରୀମାନେ କହିଛନ୍ତି ।

ମାମଲାରେ ଆଉ ୬ ଜଣ ଗିରଫ
ପ୍ରଦୀପ କୁମାର ଦାସଙ୍କ ସହ ଜଡ଼ିତ ଏହି ମାମଲାରେ ପୋଲିସ ଆଉ ୬ ଜଣଙ୍କୁ ଗିରଫ କରିଥିବା କହିଛି । ସେମାନେ ହେଲେ ନୀରଜ କୁମାର ମିତ୍ତଲ, କନୱର ପାଲ, ସୈଫ ଅଲି ଖାନ, ରଣବୀର, ପ୍ରଭାତ ରାୟ ଓରଫ ଆଶୁତୋଷ ଏବଂ ଅନିଲ ସାଗୁ ଓରଫ କୃଷ୍ଣ । ପୋଲିସ ଅନୁଯାୟୀ, ଏହି ଅଭିଯୁକ୍ତମାନେ ବ୍ୟାଙ୍କ ଖାତା ଯୋଗାଡ଼ କରିବା, ଟଙ୍କା କାରବାରକୁ ସହଜ କରିବା ଏବଂ କମିସନ୍ ସଂଗ୍ରହ ଓ ବଣ୍ଟନ କରିବା ଭଳି ଭିନ୍ନ ଭିନ୍ନ ଭୂମିକା ନିଭାଉଥିଲେ ।

ଆନ୍ଧ୍ରପ୍ରଦେଶରେ ୧୦.୨୫ କୋଟି ଟଙ୍କାର ଠକେଇ
ଏହି ତଦନ୍ତରୁ ଆନ୍ଧ୍ରପ୍ରଦେଶ ଓ ପଶ୍ଚିମବଙ୍ଗରେ ରୁଜୁ ହୋଇଥିବା ଅନ୍ୟ ସାଇବର ଠକେଇ ମାମଲା ସହ ମଧ୍ୟ ଏହି ଗୋଷ୍ଠୀର ସମ୍ପର୍କ ଥିବା ଜଣାପଡ଼ିଛି । ଆନ୍ଧ୍ରପ୍ରଦେଶର ବିଜୟୱାଡ଼ା ସାଇବର କ୍ରାଇମ୍ ଥାନାରେ ରୁଜୁ ହୋଇଥିବା ଏକ ମାମଲାରେ ୭୯ ବର୍ଷୀୟ ବୋପ୍ପାନା ବାପାରାଓଙ୍କଠାରୁ ଡିଜିଟାଲ୍ ଆରେଷ୍ଟ ନାମରେ ୧୦.୨୫ କୋଟି ଟଙ୍କା ଠକେଇ ହୋଇଥିବା ଅଭିଯୋଗ ହୋଇଛି । ଆନ୍ଧ୍ରପ୍ରଦେଶ ପୋଲିସ ସହ ତ୍ୱରିତ ସମନ୍ୱୟ ଓ ହସ୍ତକ୍ଷେପ ଯୋଗୁଁ ଏହି ଟଙ୍କା ମଧ୍ୟରୁ ୭.୨୫ କୋଟି ଟଙ୍କାକୁ ସୁରକ୍ଷିତ କରାଯାଇଥିବା କିମ୍ବା ଫ୍ରିଜ୍ କରାଯାଇଥିବା ଅଧିକାରୀମାନେ କହିଛନ୍ତି ।

ପଶ୍ଚିମବଙ୍ଗରେ ନିବେଶ ନାମରେ ୨୧ ଲକ୍ଷ ଟଙ୍କା ଠକେଇ
ପଶ୍ଚିମବଙ୍ଗର ପୂର୍ବ ମେଦିନୀପୁର ଜିଲ୍ଲାରେ ମଧ୍ୟ ନିବେଶ ଉପରେ ଅଧିକ ଲାଭ ଦେବାର ମିଥ୍ୟା ପ୍ରତିଶ୍ରୁତି ଦେଇ ଜଣେ ବ୍ୟକ୍ତିଙ୍କଠାରୁ ୨୧ ଲକ୍ଷ ଟଙ୍କା ଠକେଇ ହୋଇଥିବା ଅଭିଯୋଗ ହୋଇଛି । ପୋଲିସ କହିଛି ଯେ ଠକେଇର ସମ୍ପୂର୍ଣ୍ଣ ଟଙ୍କା ‘M/s MR Traders’ ନାମରେ ଥିବା ବ୍ୟାଙ୍କ ଖାତାକୁ ଯାଇଥିଲା । ଖାତାକୁ ଫ୍ରିଜ୍ କରିବା ପୂର୍ବରୁ ପ୍ରାୟ ୫ ଲକ୍ଷ ଟଙ୍କା ଅନ୍ୟ ଖାତାକୁ ପଠାଯାଇଥିଲା। ଏହି ଟଙ୍କାର ଗତିବିଧି ଚିହ୍ନଟ କରିବା ପାଇଁ ପଦକ୍ଷେପ ନିଆଯାଇଛି । ଏହାଛଡ଼ା, ଜୁନ୍ ମାସରେ ଦିଲ୍ଲୀ ପୋଲିସରେ ରୁଜୁ ହୋଇଥିବା ଅନ୍ୟ ଏକ ଡିଜିଟାଲ୍ ଆରେଷ୍ଟ ମାମଲାରେ ଜଣେ ଅଭିଯୋଗକାରୀଙ୍କଠାରୁ ୭୭ ଲକ୍ଷ ଟଙ୍କା ଠକେଇ ହୋଇଥିବା ଘଟଣା ସହ ମଧ୍ୟ ଏହି ଅଭିଯୁକ୍ତମାନଙ୍କ ସମ୍ପର୍କ ଥିବା ସନ୍ଦେହ କରାଯାଉଛି ।

୭୮ଟି ଅଭିଯୋଗ ସହ ଲିଙ୍କ୍, ଠକେଇ ପରିମାଣ ୭୩ କୋଟି
ତଦନ୍ତ ସମୟରେ ପୋଲିସ ୬ଟି ମୋବାଇଲ୍ ଫୋନ୍ ଜବତ କରିଛି। ଏଥିରେ ଟେଲିଗ୍ରାମ୍ ଚାଟ୍, କ୍ରିପ୍ଟୋକରେନ୍ସି କାରବାରର ରେକର୍ଡ ଓ ଅନ୍ୟାନ୍ୟ ଡିଜିଟାଲ୍ ପ୍ରମାଣ ରହିଛି। ଏହାସହ ତଦନ୍ତାଧୀନ ବ୍ୟାଙ୍କ ଖାତା ସହ ଜଡ଼ିତ ଏକ ଚେକ୍ ବୁକ୍ ମଧ୍ୟ ଜବତ ହୋଇଛି । ପୋଲିସ ଆଉ ଏକ ବଡ଼ ତଥ୍ୟ ହାସଲ କରିଛି। ଅନ୍ୟମାନଙ୍କ ବ୍ୟାଙ୍କ ଖାତାକୁ ସାଇବର ଠକେଇରେ ବ୍ୟବହାର ପାଇଁ କିଣାବିକା କରୁଥିବା ୭ଟି ଅନଲାଇନ୍ ଚ୍ୟାନେଲ୍‌କୁ ଚିହ୍ନଟ କରାଯାଇଛି ।

ଏହି ଚାଟ୍ ଓ ଡିଜିଟାଲ୍ ପ୍ରମାଣର ବିଶ୍ଳେଷଣରୁ ବିଭିନ୍ନ ରାଜ୍ୟରେ ଜାତୀୟ ସାଇବର କ୍ରାଇମ୍ ରିପୋର୍ଟିଂ ପୋର୍ଟାଲ୍‌ରେ ରୁଜୁ ହୋଇଥିବା ୭୮ଟି ଅଭିଯୋଗ ସହ ଏହି ଗ୍ୟାଙ୍ଗର ସମ୍ପର୍କ ଥିବା ସୂଚନା ମିଳିଛି। ଏହି ଅଭିଯୋଗଗୁଡ଼ିକରେ ମୋଟ ଠକେଇ ପରିମାଣ ପ୍ରାୟ ୭୩ କୋଟି ଟଙ୍କା ବୋଲି ଅଧିକାରୀମାନେ କହିଛନ୍ତି।
ଏବେ ପୋଲିସ ଟଙ୍କା କେଉଁଠାକୁ ଯାଇଛି, ଏହି ନେଟୱର୍କରେ ଆଉ କେଉଁମାନେ ସାମିଲ ଅଛନ୍ତି ଏବଂ ବିଦେଶରେ ଥିବା ହ୍ୟାଣ୍ଡଲରମାନଙ୍କ ଭୂମିକା କ’ଣ, ତାହା ଜାଣିବା ପାଇଁ ତଦନ୍ତ ଜାରି ରଖିଛି।