Cockroach Effigy / ଦଶହରାରେ ରାବଣ ସହ ଜଳିବ ୩୦ ଫୁଟ୍‌ର ଅସରପା, ରାମଲୀଳା କମିଟିର ନିଷ୍ପତ୍ତିକୁ ନେଇ ଚର୍ଚ୍ଚା

ରାବଣ, କୁମ୍ଭକର୍ଣ୍ଣ ଓ ମେଘନାଦଙ୍କ ପରେ ଏଥର ଦଶହରାରେ ଜଳିବ ୩୦ ଫୁଟ୍ ଉଚ୍ଚର ବିଶାଳ ଅସରପା । ଏହି ଖବର ଆପଣଙ୍କୁ ଆଶ୍ଚର୍ଯ୍ୟ କରିପାରେ । କିନ୍ତୁ ଏହା ସତ । ଦିଲ୍ଲୀର ପୀତମପୁରାରେ ରାମଲୀଳା ସମୟରେ ଏହି ନିଆରା ପ୍ରତିକୃତି ଦହନ କରାଯିବ । ତେବେ ଏହା ପଛରେ ରହିଛି କ’ଣ କାରଣ ? ସ୍ୱଚ୍ଛତାର ବାର୍ତ୍ତା ଦେବା ପାଇଁ ନା ଏହା ପଛରେ ରହିଛି ଆଉ କିଛି ରୋଚକ କାହାଣୀ ? ଆସନ୍ତୁ ଜାଣିବା...

ଏଥର ଦଶହରାରେ ଦିଲ୍ଲୀରେ କିଛି ଅଲଗା ଦୃଶ୍ୟ ଦେଖିବାକୁ ମିଳିବ । ରାବଣ, କୁମ୍ଭକର୍ଣ୍ଣ ଓ ମେଘନାଦଙ୍କ ସହତ ଏଥର ଜଳିବ ୩୦ ଫୁଟ୍ ଉଚ୍ଚର ଏକ ବିଶାଳ ଅସରପାର ପ୍ରତିକୃତି । ଦିଲ୍ଲୀର ପୀତମପୁରାରେ ଆୟୋଜିତ ହେବାକୁ ଥିବା ରାମଲୀଳାରେ ଏହି ନିଆରା ପଦକ୍ଷେପ ନେଇଛି କେଶବ ରାମଲୀଳା ସମିତି । ଏହି ଘୋଷଣା ପରେ ଏହାକୁ ନେଇ ଚର୍ଚ୍ଚା ଜୋର୍ ଧରିଛି ।

ସ୍ୱଚ୍ଛତାର ବାର୍ତ୍ତା ଦେବ ଅସରପାର ପ୍ରତିକୃତି

କେଶବ ରାମଲୀଳା ସମିତି ଅନୁଯାୟୀ, ଅସରପା ଅପରିଷ୍କାର ଓ ମଇଳାର ପ୍ରତୀକ । ଏହି କାରଣରୁ ଦଶହରାରେ ଏହାର ପ୍ରତିକୃତି ଦହନ କରିବାକୁ ନିଷ୍ପତ୍ତି ନିଆଯାଇଛି । ଏହା ମାଧ୍ୟମରେ ଲୋକଙ୍କୁ ପରିଷ୍କାର ପରିଚ୍ଛନ୍ନତା ପ୍ରତି ସଚେତନ କରିବା ସହ ‘ସ୍ୱଚ୍ଛ ଭାରତ’ ଓ ‘ସ୍ୱଚ୍ଛ ଦିଲ୍ଲୀ’ ଅଭିଯାନର ବାର୍ତ୍ତା ପ୍ରଚାର କରିବା ଏହି ସମିତିର ଉଦ୍ଦେଶ୍ୟ ।
ସମିତିର ଅଧ୍ୟକ୍ଷ ତଥା ବିଜେପି ବିଧାୟକ ଅଶୋକ ଗୋୟଲ ସ୍ପଷ୍ଟ କରିଛନ୍ତି ଯେ, ଏହି ନିଷ୍ପତ୍ତି ପଛରେ କୌଣସି ରାଜନୈତିକ ଉଦ୍ଦେଶ୍ୟ ନାହିଁ । ରାମଲୀଳା ମାଧ୍ୟମରେ ଅଧର୍ମ ଉପରେ ଧର୍ମର ବିଜୟର ବାର୍ତ୍ତା ଦେବା ସହ ଲୋକଙ୍କୁ ସ୍ୱଚ୍ଛତାର ଗୁରୁତ୍ୱ ବୁଝାଇବା ହିଁ ଏହାର ମୁଖ୍ୟ ଲକ୍ଷ୍ୟ ବୋଲି ସେ କହିଛନ୍ତି ।

ଏଥର ରାମଲୀଳାରେ ରାବଣର ସେନାର ଅସୁରମାନଙ୍କ ମଧ୍ୟରେ ଅସରପାକୁ ମଧ୍ୟ ଦେଖିବାକୁ ମିଳିବ । ଫଳରେ ପାରମ୍ପରିକ ପ୍ରତିକୃତି ଦହନ ସହ ଦର୍ଶକଙ୍କୁ ଏକ ଭିନ୍ନ ସାମାଜିକ ବାର୍ତ୍ତା ମିଳିବ । ଯଦିଓ ଏହି ସମୟରେ ଅସରପାର ପ୍ରତିକୃତି ଦହନ ଘୋଷଣାକୁ ନେଇ ବିଭିନ୍ନ ଚର୍ଚ୍ଚା ହେଉଛି, ତଥାପି ରାମଲୀଳା ସମିତି ଏହା ପଛରେ କୌଣସି ରାଜନୈତିକ ଉଦ୍ଦେଶ୍ୟ ଥିବା କଥାକୁ ଖଣ୍ଡନ କରିଛି ।