ନୂଆଦିଲ୍ଲୀ: ଆଜି ଦିଲ୍ଲୀ ବିଧାନସଭା ନିର୍ବାଚନ ପାଇଁ ସରିବ ପ୍ରଚାର । ଭୋଟରଙ୍କୁ ମନେଇବା ପାଇଁ ବିଭିନ୍ନ ଦଳ ପକ୍ଷରୁ ଚାଲିଛି ମାରଥନ ପ୍ରଚାର । ଆଜି କ୍ୟାମ୍ପେନିଂକୁ ଆହୁରି ଜୋରଦାର କରାଯାଇଛି । କେନ୍ଦ୍ର ଗୃହମନ୍ତ୍ରୀ ଅମିତ ଶାହା, ବିଜେପି ରାଷ୍ଟ୍ରୀୟ ସଭାପତି ଜେପି ନଡ୍ଡା, ଉତ୍ତରାଖଣ୍ଡ ମୁଖ୍ୟ ମନ୍ତ୍ରୀ ପୁଷ୍କର ସିଂ ଧାମୀ, ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ , ଉତ୍ତର ପ୍ରଦେଶର ଉପ ମୁଖ୍ୟ ମନ୍ତ୍ରୀ ବ୍ରିଜେଶ ପାଠକ ଙ୍କ ସହିତ ଅନେକ କେନ୍ଦ୍ର ମନ୍ତ୍ରୀ ଓ ସାଂସଦଙ୍କ ପ୍ରଚାର କରିବେ ।

`ସୁନିଶ୍ଚିତ ବସ୍ତିର ବିକାଶ, ଫେବ୍ରୁଆରୀ 5ରେ ଆସିବ ନୂଆ ବସନ୍ତ'

ଦିଲ୍ଲୀ ସିଂହାସନ ପାଇଁ ଏଥର ଆରପାର୍ ଲଢ଼େଇ । ମୋଦିଙ୍କ ଗ୍ୟାରେଣ୍ଟି `ବିକଶିତ ଦିଲ୍ଲୀ' । ଦିଲ୍ଲୀବାସୀଙ୍କ ଭାଗ୍ୟ ବଦଳାଇବ ବିଜେପି । ଗତକାଲି ଆରକେପୂରମରେ ନିର୍ବାଚନୀ ସଭାରେ ଉଦବୋଧନ ଦେଇ ଆପ-ଦା ପାର୍ଟିର ମିଛ ଘୋଷଣାର ପୋଲ୍ ଖୋଲିଥିଲେ ମୋଦି । ଯମୁନା ନଦୀର ପ୍ରଦୂଷଣ ଏଥର ପ୍ରମୁଖ ପ୍ରସଙ୍ଗ ରହିଛି । ଆସନ୍ତା ୫ରେ ଦିଲ୍ଲୀ ବିଧାନସଭା ନିର୍ବାଚନ ହେବ । ଏହା ପରେ ୮ରେ ଗଣତି ହେବ ।

ଅନ୍ୟପଟେ ଦୀର୍ଘ 26 ବର୍ଷ ପରେ ଏଥର ଦିଲ୍ଲୀ ଶାସନ କ୍ଷମତାକୁ କମବ୍ୟାକ କରିବାକୁ ପୁରା ଦମ ଲଗାଇଛି ବିଜେପି । କେନ୍ଦ୍ର ଶାସିତ ଷ୍ଟେଟ୍ ଘୋଷଣା ହେବା ପରଠାରୁ ଦିଲ୍ଲୀରେ ବିଜେପି ଥରେ, କଂଗ୍ରେସ 3 ଥର ଓ ଆପ୍ 2 ଥର ନିର୍ବାଚନ ଜିତିଛନ୍ତି । ଖୋଦ୍ କେଜ୍ରିୱାଲଙ୍କ ସମେତ ଦଳର ବଡ଼ ନେତା ଦୁର୍ନୀତି ଜାଲରେ ଛନ୍ଦି ହୋଇଥିଲେ ବି ଦିଲ୍ଲୀବାସୀଙ୍କୁ ଅନ୍ଧାରରେ ରଖି ପ୍ରତି ଘଣ୍ଟାରେ ମିଛ ଘୋଷଣା କରୁଛି । ଦୁର୍ନୀତି ବିରୋଧରେ ସଂଗ୍ରାମ ଘୋଷଣା କରି ଗତ ଦୁଇଟି ଟର୍ମରେ କ୍ଷମତାକୁ ଆସି ଦିଲ୍ଲୀକୁ ଦୁର୍ନୀତିର ଗଡ଼ ସଜାଇଥିବା ଆପ-ଦା ପାର୍ଟିକୁ ପ୍ରତ୍ୟାଖ୍ୟାନ କରିବାକୁ ଆହ୍ବାନ ଦେଇଛନ୍ତି ମୋଦି ।