Delhi Traffic Advisory / ହାଇଆଲର୍ଟରେ ଦିଲ୍ଲୀ ! ଧାରା ୧୬୩ ଲାଗୁ, ଘରୁ ବାହାରିବା ପୂର୍ବରୁ ପଢ଼ନ୍ତୁ ଆଡଭାଇଜରୀ

ଦିଲ୍ଲୀବାସୀ ଏବଂ ଦିଲ୍ଲୀ ଆସୁଥିବା-ଯାଉଥିବା ଲୋକଙ୍କ ପାଇଁ ଆଜିର ଦିନଟି ବେଶ୍‌ ଗୁରୁତ୍ୱପୂର୍ଣ୍ଣ । ଅକ୍ଟୋବର ୨ ତାରିଖରେ ଦିଲ୍ଲୀରେ ଭାରି ଟ୍ରାଫିକ ଜାମ୍ ହେବାର ସମ୍ଭାବନା ଥିବାରୁ ଲୋକମାନଙ୍କୁ ଯାତାୟାତ ପୂର୍ବରୁ ଟ୍ରାଫିକ ଆଡଭାଇଜରୀ ଦେଖି ଯାତ୍ରା ଯୋଜନା କରିବାକୁ ପରାମର୍ଶ ଦିଆଯାଇଛି ।

ଆଜି ଦିଲ୍ଲୀରେ BNS ର ଧାରା ୧୬୩ ଅନୁସାରେ କଟକଣା ଜାରି କରାଯାଇଛି ଏବଂ ପୋଲିସ ହାଇଆଲର୍ଟରେ ରହିଛି। VVIP ଅଞ୍ଚଳଗୁଡ଼ିକରେ ଦିଲ୍ଲୀ ପୋଲିସ ସହ ଅର୍ଦ୍ଧସାମରିକ ବାହିନୀ ମୁତୟନ କରାଯାଇଛି । ଉତ୍ତରପ୍ରଦେଶ ଏବଂ ହରିୟାଣା ସୀମାରେ ମଧ୍ୟ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ଲିଖିତ ଅନୁମତି ବିନା ସଭା, ବିରୋଧ ପ୍ରଦର୍ଶନ, ମାର୍ଚ୍ଚ କିମ୍ବା ୫ ଜଣରୁ ଅଧିକ ଲୋକଙ୍କ ଏକାଠି ହେବା ଉପରେ କଟକଣା ରହିଛି । ଏହି ନିୟମର ଉଲ୍ଲଂଘନ କଲେ ଆଇନ ଅନୁସାରେ କାର୍ଯ୍ୟାନୁଷ୍ଠାନ ହୋଇପାରେ ।

ଜନ୍ତର-ମନ୍ତର ଅଞ୍ଚଳରେ କଡ଼ା ସୁରକ୍ଷା

ଦିଲ୍ଲୀ ଟ୍ରାଫିକ ପୋଲିସର ଆଡଭାଇଜରୀ ଅନୁସାରେ, ଗାନ୍ଧୀ ଜୟନ୍ତୀ ଅବସରରେ ଆଜି ଜନ୍ତର-ମନ୍ତରରେ ECI ବିବାଦକୁ ନେଇ ବିରୋଧ ପ୍ରଦର୍ଶନ ହେବାର ସମ୍ଭାବନା ରହିଛି । ବିଭିନ୍ନ ସଂଗଠନର କର୍ମୀମାନେ ଏଠାରେ ଏକାଠି ହୋଇପାରନ୍ତି । ଏହାକୁ ନଜରରେ ରଖି ଜନ୍ତର-ମନ୍ତର ଏବଂ ଏହାର ଆଖପାଖ ଅଞ୍ଚଳରେ ସୁରକ୍ଷା କଡ଼ାକଡ଼ି କରାଯାଇଛି ।

ପାର୍ଲାମେଣ୍ଟ ଷ୍ଟ୍ରିଟ୍ ସବ୍-ଡିଭିଜନ ଅଞ୍ଚଳରେ ଅସ୍ତ୍ର, ବ୍ୟାନର, ପୋଷ୍ଟର, ଲାଠି, ବର୍ଚ୍ଛା, ଖଣ୍ଡା କିମ୍ବା ଅନ୍ୟାନ୍ୟ ଆପତ୍ତିଜନକ ସାମଗ୍ରୀ ନେଇ ଯିବା ଉପରେ କଟକଣା ରହିଛି । ଏହା ସହ ନାରାବାଜି, ଭାଷଣ, ଧାରଣା ଏବଂ ବିରୋଧ ପ୍ରଦର୍ଶନ ମଧ୍ୟ ଅନୁମତି ବିନା କରାଯାଇପାରିବ ନାହିଁ । କୌଣସି କାର୍ଯ୍ୟକ୍ରମ ପାଇଁ ଲିଖିତ ଅନୁମତି ନିଆଯାଇଥିଲେ ମଧ୍ୟ ତାହାର ସମୟସୀମା ସନ୍ଧ୍ୟା ୫ଟା ପର୍ଯ୍ୟନ୍ତ ରହିବ । ପାର୍ଲାମେଣ୍ଟ ଷ୍ଟ୍ରିଟ୍ ସମ୍ପର୍କିତ ଏହି ଆଦେଶ ୨୩ ଅଗଷ୍ଟ ୨୦୨୬ରୁ ଲାଗୁ ହୋଇଛି ଏବଂ ୨୧ ଅକ୍ଟୋବର ୨୦୨୬ ପର୍ଯ୍ୟନ୍ତ ବଳବତ୍ତର ରହିବ ।

କେଉଁ ରାସ୍ତାରେ ଟ୍ରାଫିକ ଡାଇଭର୍ସନ ?

ଟ୍ରାଫିକ ପୋଲିସ ଅନୁସାରେ ଆଜି କନଟ୍ ପ୍ଲେସ୍, ପଟେଲ ଚୌକ, GPO, ଟଲଷ୍ଟୟ ମାର୍ଗ, ଜନ୍ତର-ମନ୍ତର ରୋଡ୍, ପାର୍ଲାମେଣ୍ଟ ଷ୍ଟ୍ରିଟ୍ ଏବଂ ଏହାର ଆଖପାଖ ରାସ୍ତାରେ ଟ୍ରାଫିକ ଡାଇଭର୍ଟ କରାଯାଇପାରେ । ତେଣୁ ଆଜି ଏହି ରାସ୍ତାଗୁଡ଼ିକରେ ଯାତାୟାତ ନକରିବାକୁ ଲୋକଙ୍କୁ ପରାମର୍ଶ ଦିଆଯାଇଛି । ଜରୁରୀ କାମରେ ବାହାରୁଥିବା ଲୋକମାନେ ଅତିରିକ୍ତ ସମୟ ହାତରେ ରଖି ଯାତ୍ରା କରିବା ସହ ଟ୍ରାଫିକ ଡାଇଭର୍ସନ ସଙ୍କେତ ଉପରେ ନଜର ରଖିବା ଆବଶ୍ୟକ । ଦିଲ୍ଲୀ ପୋଲିସ ପକ୍ଷରୁ ଟ୍ରାଫିକ ନିୟମ ମାନିବା ଏବଂ ପୋଲିସକୁ ସହଯୋଗ କରିବାକୁ ଲୋକଙ୍କୁ ଅପିଲ୍ କରାଯାଇଛି। ରାଜଧାନୀରେ ଶାନ୍ତି ଓ ଆଇନଶୃଙ୍ଖଳା ବଜାୟ ରଖିବା ସହ ନିୟମ ଉଲ୍ଲଂଘନ କଲେ ଆଇନ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ ।