Argus News - ଦିଲ୍ଲୀ IGI ଏୟାରପୋର୍ଟରେ ଇଣ୍ଡିଗୋ ବିମାନର ଜରୁରୀ ଅବତରଣ

ଜାତୀୟ ରାଜଧାନୀ ଦିଲ୍ଲୀ ସ୍ଥିତ ଇନ୍ଦିରା ଗାନ୍ଧୀ ଅନ୍ତର୍ଜାତୀୟ (IGI) ବିମାନ ବନ୍ଦରରେ ଶନିବାର ସକାଳେ ହଲଚଲ ହୋଇପଡ଼ିଥିଲା । ହଠାତ୍ ଏକ ଇଣ୍ଡିଗୋ ବିମାନର ଜରୁରୀ ଅବତରଣ ନେଇ ଘୋଷଣା ହେଲା । ଏହି ବିମାନଟି ଆନ୍ଧ୍ରପ୍ରଦେଶ ବିଶାଖାପାଟନମରୁ ଦିଲ୍ଲୀ ଅଭିମୁଖେ ଆସୁଥିଲା । ତେବେ ବିମାନରେ ପ୍ରାୟ ୧୬୧ ଜଣ ଯାତ୍ରୀ ଥିଲେ । ବିମାନ ସଠିକ ସମୟରେ ଜରୁରୀ ଅବତରଣ କରିଥିବାରୁ ମୃତ୍ୟୁମୁଖରୁ ବର୍ତ୍ତିଗଲେ ଯାତ୍ରୀ ।

ଜରୁରୀ ଅବତରଣ କରିଥିବା ଏହି ବିମାନର ଇଞ୍ଜିନ ଫେଲ୍ ହେବା ଆଶଙ୍କାରେ ଦିଲ୍ଲୀର ରନୱେ-୨୮ରେ 'ଫୁଲ୍ ଇମରଜେନ୍ସି' ଘୋଷିତ ହୋଇଥିଲା । ପାଇଲଟଙ୍କ ସତର୍କତା ଓ ଏୟାରପୋର୍ଟ ପ୍ରଶାସନର ତୁରନ୍ତ ସହଯୋଗ ଯୋଗୁଁ ଏକ ବଡ଼ ଅଘଟଣ ଟଳିଯାଇଛି । ଜରୁରୀକାଳୀନ ପ୍ରୋଟୋକଲ ମଧ୍ୟରେ, ଇଣ୍ଡିଗୋର ଏହି ବିମାନଟି ସକାଳ ୧୦.୫୪ଟାରେ ଆଇଜିଆଇ ବିମାନ ବନ୍ଦରର ରନୱେ-୨୮ରେ ଜରୁରୀ ଅବତରଣ କରିଛି । ଅବତରଣ ସମୟରେ କୌଣସି ଅଘଟଣକୁ ମୁକାବିଲା କରିବା ଲାଗି ରନୱେରେ ଆଗୁଆ ଦମକଳ ବାହିନୀ ଓ ଆମ୍ବୁଲାନ୍ସ ରହିଥିଲା ।

ପଢନ୍ତୁ ଏହି ଖବର: ଭୟଙ୍କର ବିମାନ ଦୁର୍ଘଟଣା; ୬୬ ସେନା ଯବାନ ମୃତ...୧୨୫ ଜଣ ଯବାନଙ୍କୁ ନେଇ ଯାଉଥିଲା କଲମ୍ବିଆ ବିମାନ

ଏହି ଜରୁରୀ ଅବତରଣ ସମ୍ପର୍କରେ ଦିଲ୍ଲୀ ଅଗ୍ନିଶମ ସେବା (DFS) ଏକ ବିବୃତ୍ତିରେ କହିଛି, "ଦିଲ୍ଲୀ ବିମାନବନ୍ଦରରେ ଏକ ବିମାନ ଜରୁରୀକାଳୀନ ଅବତରଣ କରିଥିଲା । ଅଗ୍ନିଶମ ବିଭାଗ ଅନୁଯାୟୀ, ସମସ୍ତେ ସୁରକ୍ଷିତ ଅଛନ୍ତି ଏବଂ କୌଣସି କ୍ଷତିର ରିପୋର୍ଟ ହୋଇନାହିଁ । ଅଗ୍ନିଶମ ବିଭାଗ ସକାଳ ୧୦.୫୩ଟାରେ ଜରୁରୀକାଳୀନ ଅବତରଣ ବିଷୟରେ ସୂଚନା ପାଇ ତୁରନ୍ତ ଅଗ୍ନିଶମ ଗାଡି ପଠାଇଥିଲା । ବିମାନଟି ସୁରକ୍ଷିତ ଭାବରେ ଅବତରଣ କରିଛି ।"

• ବିମାନରେ ଥିଲା ୧୬୧ ଯାତ୍ରୀ

ବିଶାଖାପାଟନମରୁ ଦିଲ୍ଲୀ ଆସୁଥିବା ଏହି ବିମାନରେ ୧୬୧ ଜଣ ଯାତ୍ରୀ ଯାତ୍ରା କରୁଥିଲେ । ଜରୁରୀ ଅବତରଣ ଘୋଷଣା ହେବା ପରେ ବିମାନର ଯାତ୍ରୀମାନେ ଭୟଭୀତ ହୋଇପଡ଼ିଥିଲେ । ହେଲେ ପାଇଲଟଙ୍କ ସମେତ ବିମାନର କ୍ରୁ ମେମ୍ବର ସେମାନଙ୍କୁ ସାହାସ ଦେଇଥିଲେ । ବିମାନଟି ଜରୁରୀ ଅବତରଣ କରିବା ପରେ ତୁରନ୍ତ ଯାତ୍ରୀମାନଙ୍କୁ ବିମାନରୁ ବାହାର କରାଯାଇଥିଲା । ଏବେ ଇଣ୍ଡିଗୋ ପ୍ରଶାସନ ଇଞ୍ଜିନରେ ଆସିଥିବା ଯାନ୍ତ୍ରିକ ତ୍ରୁଟିକୁ ବିସ୍ତୃତ ଭାବେ ଯାଞ୍ଚ କରୁଛି ।