ଦେଶର ରେଳ ଯୋଗାଯୋଗ ଓ ଭିତ୍ତିଭୂମି କ୍ଷେତ୍ରରେ ଆସିବ ଏକ ବଡ଼ ପରିବର୍ତ୍ତନ । ଉତ୍ତର ଭାରତରେ ହାଇସ୍ପିଡ୍ ବୁଲେଟ୍ ଟ୍ରେନ୍ କରିଡର୍ ନିର୍ମାଣ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଞ୍ଜୁରି ପ୍ରଦାନ କରିଥିବା ନେଇ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଘୋଷଣା କରିଛନ୍ତି । ଏହି ପ୍ରକଳ୍ପ କାର୍ଯ୍ୟକାରୀ ହେଲେ ଉତ୍ତର ଭାରତର ଅନେକ ପ୍ରମୁଖ ସହର ମଧ୍ୟରେ ଯାତ୍ରା ସମୟ ଯଥେଷ୍ଟ କମିଯିବ ।

ପ୍ରସ୍ତାବିତ ବୁଲେଟ୍ ଟ୍ରେନ୍ କରିଡର୍ ଅନୁଯାୟୀ, ଦିଲ୍ଲୀରୁ ଆଗ୍ରା ମାତ୍ର ୫୯ ମିନିଟ୍‌ରେ ପହଞ୍ଚି ହେବ । ସେହିପରି ଦିଲ୍ଲୀରୁ କାନପୁର ପାଇଁ ୧ ଘଣ୍ଟା ୪୫ ମିନିଟ୍, ଦିଲ୍ଲୀରୁ ଲକ୍ଷ୍ନୌ ପାଇଁ ୨ ଘଣ୍ଟା ୧୨ ମିନିଟ୍ ସମୟ ଲାଗିବ । ଲକ୍ଷ୍ନୌରୁ ବାରାଣସୀ ୧ ଘଣ୍ଟା ୨୧ ମିନିଟ୍, ବାରାଣସୀରୁ ପାଟନା ମାତ୍ର ୧ ଘଣ୍ଟା ଏବଂ ବାରାଣସୀରୁ ପ୍ରୟାଗରାଜ ମାତ୍ର ୩୩ ମିନିଟ୍‌ରେ ଯାତ୍ରା ସମ୍ଭବ ହେବ । ଏହାବ୍ୟତୀତ ବାରାଣସୀରୁ ଦିଲ୍ଲୀ ଯିବାକୁ ପ୍ରାୟ ୩ ଘଣ୍ଟା ୩୩ ମିନିଟ୍ ଲାଗିବ ବୋଲି ଆକଳନ କରାଯାଇଛି ।

ଏହି କରିଡର୍ ଦିଲ୍ଲୀରୁ ଆରମ୍ଭ ହୋଇ ଆଗ୍ରା, କାନପୁର, ଲକ୍ଷ୍ନୌ  , ଅଯୋଧ୍ୟା, ବାରାଣସୀ, ପ୍ରୟାଗରାଜ, ପାଟନା ଓ ଶିଲିଗୁଡ଼ି ଦେଇ ଆସାମର ଗୁଆହାଟୀ ପର୍ଯ୍ୟନ୍ତ ପ୍ରସାରିତ ହେବାର ଯୋଜନା ରହିଛି । ରେଳମନ୍ତ୍ରୀଙ୍କ ସୂଚନା ଅନୁଯାୟୀ, ଏହି ପ୍ରକଳ୍ପର ନିର୍ମାଣ କାର୍ଯ୍ୟରେ ପିଲାର୍‌ଠାରୁ ଆରମ୍ଭ କରି ଗାର୍ଡର୍ ପର୍ଯ୍ୟନ୍ତ ଭାରତୀୟ ଜ୍ଞାନକୌଶଳ ଓ ଦେଶୀୟ ଇଞ୍ଜିନିୟରଙ୍କ ଦକ୍ଷତାକୁ ବ୍ୟବହାର କରାଯିବ ।

ଏହି ପ୍ରକଳ୍ପ ସଫଳ ହେଲେ ଯାତାୟାତ ସୁବିଧା ବୃଦ୍ଧି ସହିତ ପର୍ଯ୍ୟଟନ, ବାଣିଜ୍ୟ, ଶିଳ୍ପ ଓ ଆଞ୍ଚଳିକ ଅର୍ଥନୀତିକୁ ନୂଆ ଗତି ମିଳିବାର ଆଶା ରହିଛି । ତେବେ ପ୍ରକଳ୍ପର ନିର୍ମାଣ ଓ କାର୍ଯ୍ୟକ୍ଷମ ହେବାର ସମୟସୀମା ସମ୍ପର୍କିତ ବିସ୍ତୃତ ତଥ୍ୟ ଆସିବାକୁ ବାକି ରହିଛି ।

ଏଥି ସହ ପଢନ୍ତୁ:    ନଭେମ୍ବର ୧ରୁ ମୋବାଇଲ୍ ୟୁଜର୍ସଙ୍କ ପାଇଁ ନୂଆ ନିୟମ, ଅଜଣା ନମ୍ବରରୁ କଲ୍ ଆସିଲେ ବି ଦେଖାଯିବ ନାମ