Gang Rape And Murder / ରାଜଧାନୀରେ ସୀମା ଟପିଛି ବର୍ରରତା, ନାବାଳିକାଙ୍କୁ ଗଣଦୁଷ୍କର୍ମ ପରେ ହତ୍ୟା!

ନୂଆଦିଲ୍ଲୀ,୧୮/୦୯:  ରାଜଧାନୀରେ ସୀମା ଟପିଛି ବର୍ରରତା । ସ୍ୱରୂପ ନଗର ଅଞ୍ଚଳରେ ଜଣେ ୧୬ ବର୍ଷ ବୟସ୍କା ନାବାଳିକାଙ୍କୁ ଗଣଦୁଷ୍କର୍ମ ପରେ ହତ୍ୟା କରାଯାଇଥିବା ଅଭିଯୋଗ ହୋଇଛି। 

ଗତ ଶୁକ୍ରବାର ନାବାଳିକା ଜଣକ ତାଙ୍କର ଜଣେ ୧୭ ବର୍ଷୀୟ ବନ୍ଧୁଙ୍କୁ ଭେଟିବାକୁ ଯାଇଥିଲେ। ଅଭିଯୋଗ ଅନୁଯାୟୀ, ସେଠାରେ ପ୍ରଥମେ ଉକ୍ତ ନାବାଳକ ତାଙ୍କ ସହ ଦୁଷ୍କର୍ମ କରିଥିଲେ। ଘଟଣାକୁ ପ୍ରକାଶ କରିଦେବାକୁ ପୀଡିତା ଧମକ ଦେବା ପରେ ଅଭିଯୁକ୍ତ ନିଜର ଅନ୍ୟ ସାଙ୍ଗମାନଙ୍କୁ ଡାକିଥିବା ଅଭିଯୋଗ ହୋଇଛି।

ଏହାପରେ ଅନ୍ୟ ଅଭିଯୁକ୍ତମାନେ ସେଠାରେ ପହଞ୍ଚିଥିଲେ। ପୋଲିସର ପ୍ରାଥମିକ ତଦନ୍ତ ଅନୁଯାୟୀ, ସମସ୍ତେ ମଦ୍ୟପାନ କରିଥିବା ଅବସ୍ଥାରେ ନାବାଳିକାଙ୍କୁ ଗଣଦୁଷ୍କର୍ମ କରିଥିବା ଅଭିଯୋଗ ରହିଛି। ଏହାପରେ ଘଟଣାର ପ୍ରମାଣ ଲୁଚାଇବା ପାଇଁ ଅଭିଯୁକ୍ତମାନେ ତାଙ୍କୁ ଏକ କ୍ଷେତକୁ ନେଇଯାଇଥିଲେ। କ୍ଷେତରେ ନେବା ପରେ ନାବାଳିକାଙ୍କ ଉପରେ ଛୁରୀରେ ଆକ୍ରମଣ କରାଯାଇଥିବା ଅଭିଯୋଗ ହୋଇଛି। ପୋଲିସ ଅନୁସାରେ, ତାଙ୍କ ଶରୀରରେ ୬ରୁ ଅଧିକ ଛୁରାଘାତ ଚିହ୍ନ ମିଳିଛି। ଏହି ଆକ୍ରମଣରେ ନାବାଳିକାଙ୍କ ମୃତ୍ୟୁ ହୋଇଥିଲା। ପରେ ଅଭିଯୁକ୍ତମାନେ ମୃତଦେହକୁ ପତ୍ର ଓ ମାଟିରେ ଘୋଡ଼ାଇ ଦେଇଥିବା ଅଭିଯୋଗ ରହିଛି। ଏହାପରେ ସେମାନେ ଏକ ଟେମ୍ପୋରେ ଘଟଣାସ୍ଥଳରୁ ଫେରାର ହୋଇଯାଇଥିଲେ।

ପଢନ୍ତୁ ଏହି ଖବର:  ତ୍ରିକୋଣୀୟ ପ୍ରେମ ପାଇଁ ସାଙ୍ଗକୁ ହତ୍ୟା!, ତଦନ୍ତ କରୁଛି ପୋଲିସ

ଅନ୍ୟପଟେ, ସ୍ୱରୂପ ନଗର ଅଞ୍ଚଳରେ ଏକ ଅଜଣା ନାବାଳିକାଙ୍କ ମୃତଦେହ ମିଳିବା ପରେ ଘଟଣା ସାମ୍ନାକୁ ଆସିଥିଲା। ମୃତଦେହର ପରିଚୟ ପ୍ରଥମେ ମିଳିନଥିଲା। ପୋଲିସ ଅନୁସାରେ, ମୃତଦେହର ଡାହାଣ ହାତରେ ଗଭୀର ଆଘାତ ଥିବା ସହ ମୁହଁ ଓ ପେଟରେ ମଧ୍ୟ ଅନେକ କ୍ଷତଚିହ୍ନ ଦେଖାଯାଇଥିଲା।

ଘଟଣାର ଗମ୍ଭୀରତାକୁ ଦେଖି ପୋଲିସ ତଦନ୍ତକୁ ଜୋରଦାର କରିଥିଲା। ଘଟଣାସ୍ଥଳ ଓ ଏହାର ଆଖପାଖ ଅଞ୍ଚଳରେ ଲାଗିଥିବା ୫୦ରୁ ଅଧିକ ସିସିଟିଭି କ୍ୟାମେରାର ଫୁଟେଜ୍ ଯାଞ୍ଚ କରାଯାଇଥିଲା। ଏହି ଯାଞ୍ଚ ସମୟରେ ସେପ୍ଟେମ୍ବର ୧୫ ତାରିଖ ରାତିରେ, ଟେମ୍ପୋଟି ଖଡ୍ଡା କଲୋନୀରେ ପାର୍କିଂ ହୋଇଥିବା ଦେଖିବାକୁ ମିଳିଥିଲା। ଡ୍ରାଇଭରଙ୍କୁ ଚିହ୍ନଟ କରାଯାଇ ପଚରାଉଚରା କରାଯାଇଥିଲା। ଏହା ପରେ, ପୋଲିସ ତିନି ଜଣ ନାବାଳକଙ୍କ ସମେତ ଚାରି ଜଣ ଅଭିଯୁକ୍ତଙ୍କୁ ଗିରଫ କରିଥିଲା।

ମାମଲାରେ ଶିବମ ଗଣେଶ ନାମକ ୧୯ ବର୍ଷୀୟ ଯୁବକଙ୍କୁ ଗିରଫ କରାଯାଇଛି। ଏଥିସହ ଅନ୍ୟ ତିନିଜଣ ନାବାଳକଙ୍କୁ ପୋଲିସ ପଚରାଉଚରା କରୁଛି। ମାମଲାରେ ହତ୍ୟା, ଦୁଷ୍କର୍ମ ଏବଂ ପ୍ରମାଣ ନଷ୍ଟ କରିବା ଭଳି ଅଭିଯୋଗରେ ମାମଲା ରୁଜୁ ହୋଇଛି। ଘଟଣାରେ ଆଉ କେହି ସମ୍ପୃକ୍ତ ଅଛନ୍ତି କି, ଅପରାଧର ପ୍ରକୃତ ଉଦ୍ଦେଶ୍ୟ କ’ଣ ଥିଲା ସେ ନେଇ ପୋଲିସ ତଦନ୍ତ ଜାରି ରଖିଛି।