ନୂଆଦିଲ୍ଲୀ: ସମୟ ସକାଳ ୭ଟା । କେହି କେହି ଗଡ଼ପଡ଼ ହେଉଥାନ୍ତି, ଆଉ କିଛି ଲୋକଙ୍କ ଆଖି ଖୋଲି ନଥାଏ । ସୂର୍ଯ୍ୟ ଉଇଁବା ଆରମ୍ଭ କରୁ କରୁ ହଠାତ୍ ଲାଗିଗଲା ନିଆଁ । କେହି କିଛି ବୁଝିବା ପୂର୍ବରୁ ନିଆଁ ବ୍ୟାପି ଯାଇଥିଲା । ବୁଧବାର ସକାଳୁ ଦକ୍ଷିଣପଶ୍ଚିମ ଦିଲ୍ଲୀର ପାଲାମ ଅଞ୍ଚଳର ଏକ ବହୁତଳ ବିଲ୍ଡିଂରେ ଭୟଙ୍କର ଅଗ୍ନିକାଣ୍ଡ ଘଟିଛି ।

ଅଗ୍ନିକାଣ୍ଡରେ ୩ ଛୁଆଙ୍କ ୯ ଜଣଙ୍କ ମୃତ୍ୟୁ ହୋଇଛି । କେବଳ ଗୋଟିଏ ପରିବାରରୁ ପ୍ରାଣ ହରାଇଛନ୍ତି ୫ ଜଣ ସଦସ୍ୟ । ଅଗ୍ନିକାଣ୍ଡ ପରେ ଦିଲ୍ଲୀ ଅଗ୍ନିଶମ ବାହିନୀର ୩୦ଟି ଦମକଳ ଗାଡ଼ି ନିଆଁ ଲିଭାଇବା କାର୍ଯ୍ୟରେ ନିୟୋଜିତ ଅଛନ୍ତି । ଅଗ୍ନିକାଣ୍ଡ ପରେ ବିଲ୍ଡିଂରେ ଫସିଥିବା ଲୋକଙ୍କୁ ଉଦ୍ଧାର କରାଯାଇ ନିକଟସ୍ଥ ମେଡିକାଲ୍‌କୁ ନିଆ ଯାଇଥିଲା । ଡାକ୍ତର ୯ ଜଣଙ୍କୁ ମୃତ ଘୋଷଣା କରିଛନ୍ତି ।

ଏଥିସହ ପଢ଼ନ୍ତୁ: ଭୟାବହ ଅଗ୍ନିକାଣ୍ଡ: ଇଲେକ୍ଟ୍ରିକ୍ ଯାନ ଚାର୍ଜିଂରୁ ସର୍ଟସର୍କିଟ, ୭ ଜଣଙ୍କ ମୃତ୍ୟୁ

ଦିଲ୍ଲୀ ଅଗ୍ନିଶମ ବାହିନୀର ସୂଚନା ଅନୁସାରେ, ଅଗ୍ନିକାଣ୍ଡ ନେଇ ସକାଳ ୭ଟାରେ ସୂଚନା ମିଳିଥିଲା । ସଙ୍ଗେ ସଙ୍ଗେ ୩୦ଟି ଦମକଳ ଗାଡ଼ି ନିଆଁ ଲିଭାଇବା ଲାଗି ପହଞ୍ଚିଛିଲେ । ନିଆଁ ଲିଭାଇବା ସହ ଫସି ରହିଥିବା ଲୋକଙ୍କୁ ଉଦ୍ଧାର କରାଯାଇଥିଲା ।

#WATCH दिल्ली: पालम इलाके की एक बिल्डिंग में भीषण आग लग गई। मौके पर करीब 30 दमकल की गाड़ियां मौजूद हैं और रेस्क्यू ऑपरेशन चल रहा है। कई लोगों के हताहत होने की आशंका है।

(वीडियो मौके से है) pic.twitter.com/xmLgGEtiCQ

— ANI_HindiNews (@AHindinews) March 18, 2026

ଅଗ୍ନିକାଣ୍ଡରୁ ବଞ୍ଚିବା ପାଇଁ ବିଲ୍ଡିଂରୁ ୨ ଜଣ ଡେଇଁ ପଡ଼ିଥିଲେ । ଉଭୟଙ୍କୁ ଗୁରୁତର ଅବସ୍ଥାରେ ମେଡିକାଲ୍‌ରେ ଭର୍ତ୍ତି କରାଯାଇଛି । ଏବେ ବି ବିଲ୍ଡିଂ ଭିତରେ ଆହୁରି କିଛି ଜଣ ଫସି ରହିଥିବା ଅଗ୍ନିଶମ ବାହିନୀ ଆଶଙ୍କା କରି ଉଦ୍ଧାର କାର୍ଯ୍ୟ ଜାରି ରଖିଛି ।

ଅଗ୍ନିଶମ ବାହିନୀ ସହ ପୋଲିସ ଏବଂ ଅନ୍ୟ ଉଦ୍ଧାରକାରୀ ଦଳ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ଉଦ୍ଧାରକାରୀ ଦଳ ୧୦ ଜଣଙ୍କୁ ବିଲ୍ଡିଂରୁ ଉଦ୍ଧାର କରିଥିବା ବେଳେ ସେଥିରୁ ୯ ଜଣଙ୍କ ମୃତ୍ୟୁ ହୋଇଛି । ତେବେ ମୃତକଙ୍କ ସଂଖ୍ୟା ଆହୁରି ବଢ଼ିବା ଆଶଙ୍କା କରାଯାଉଛି ।

ଅନ୍ୟ ଆହତମାନଙ୍କୁ ଭିନ୍ନ ଭିନ୍ନ ହସ୍ପିଟାଲ୍‌ରେ ଭର୍ତ୍ତି କରାଯାଇଛି । ଡେପୁଟି ଫାୟର୍ ଚିଫ୍ ଏସ୍‌କେ ଦୁଆ କହିଛନ୍ତି, "ନିଆଁ ଲିଭାଇବା ପରେ ଏବେ ବିଲ୍ଡିଂକୁ ଥଣ୍ଡା କରିବା ପ୍ରକ୍ରିୟା ଚାଲିଛି । କୋଠା ଥଣ୍ଡା ହେବା ପରେ ଉଦ୍ଧାର କାର୍ଯ୍ୟ ପୁଣି ଥରେ ଆରମ୍ଭ ହେବ ।"

ଏଥିସହ ପଢ଼ନ୍ତୁ: ବଡ଼ ମେଡିକାଲରେ ବଡ଼ ଅଘଟଣ; ବାରମ୍ବାର ଦୁର୍ଘଟଣା ସତ୍ତ୍ଵେ କାହିଁକି ହେଉନି କାର୍ଯ୍ୟାନୁଷ୍ଠାନ ?

ମିଳିଥିବା ସୂଚନା ଅନୁସାରେ, ଉକ୍ତ ବିଲ୍ଡିଂରେ ୨୨ ଜଣ ରହୁଥିଲେ । ସେଥିମଧ୍ୟରୁ ଗୋଆ ବୁଲିବାକୁ ୧୦ରୁ ୧୨ ଜଣ ଯାଇଥିବା ବେଳେ ଯେଉଁମାନେ ଘରେ ଥିଲେ ନିଆଁ ସଂସ୍ପର୍ଶରେ ଆସିଛନ୍ତି । ଏବେ ବି କୋଠାରୁ ଧୂଆଁ ଆକାଶକୁ ଉଠୁଛି ।

ନିଆଁ ଲାଗିଥିବା କୋଠାର ବେସମେଣ୍ଟ, ଗ୍ରାଉଣ୍ଡ ଓ ପ୍ରଥମ ମହଲାରେ କପଡ଼ା ଓ ଅନ୍ୟ ଦୋକାନ ରହିଛି । ଦ୍ଵିତୀୟ ଓ ତୃତୀୟ ମହଲାରେ ଲୋକ ରହୁଥିଲେ । ତେବେ ନିଆଁ କେମିତି ଓ କେଉଁ କାରଣରୁ ଲାଗିଲା ତାହା ସ୍ପଷ୍ଟ ହୋଇନାହିଁ ।