Delhi Protest / ସାମ୍ନାକୁ ଆସିଲା CJPର ଅସଲ ଚେହେରା; ବ୍ୟାପକ ହିଂସା ପାଇଁ କରିଥିଲେ ବିଧିବଦ୍ଧ ଷଡ଼ଯନ୍ତ୍ର

ନୂଆଦିଲ୍ଲୀ: ପ୍ରତିବାଦ ଆଳରେ ଦିଲ୍ଲୀରେ ଅରାଜକତା ସୃଷ୍ଟି କରିଥିବା ବିକ୍ଷୋଭକାରୀଙ୍କ ବିରୋଧରେ ଦିଲ୍ଲୀ ପୋଲିସର କଡ଼ା ପଦକ୍ଷେପ । ସେମାନଙ୍କ ବିରୋଧରେ ରୁଜୁ ହୋଇଛି ୫ଟି ମାମଲା । ବିନା ଅନୁମତିରେ ଆନ୍ଦୋଳନ ନାଁରେ ବ୍ୟାପକ ହିଂସାକାଣ୍ଡ ସହ ପୋଲିସକୁ ଟାର୍ଗେଟ୍ କରିଥିଲେ ।

‌ଏହି ଷଡ଼ଯନ୍ତ୍ରମୂଳକ ଆକ୍ରମଣରେ ୧୧୮ ଜଣ ପୋଲିସ କର୍ମଚାରୀ ଲହୁଲୁହାଣ ହୋଇଛନ୍ତି । ମୋବାଇଲ୍ ଫୋନ୍ କ୍ଲିପ୍, ସିସିଟିଭି ଫୁଟେଜ୍, ଡ୍ରୋନ୍ ଫୁଟେଜ୍ ଏବଂ ପୋଲିସର ବଡି କ୍ୟାମେରା ଦ୍ଵାରା ସଂଗ୍ରହ କରାଯାଇଥିବା ୨୫୦ରୁ ଅଧିକ ଭିଡିଓ ଫୁଟେଜରୁ ହିଂସାକାରୀଙ୍କୁ ଚିହ୍ନଟ କରାଯାଉଛି ।

ଏଥିସହ ପଢ଼ନ୍ତୁ: ଦିଲ୍ଲୀର ଛାତି ଉପରେ ଆନ୍ଦୋଳନ ନାଁରେ CJPର ଅରାଜକତା 

ଦାବି ପୂରଣ ପାଇଁ ନୂଆଦିଲ୍ଲୀରେ ଗତକାଲି ବିକ୍ଷୋଭ କରିଥିବା CJPର ଅସଲ ଚେହେରା ସାମ୍ନାକୁ ଆସିଛି । ପ୍ରତିବାଦ ନୁହେଁ, ବ୍ୟାପକ ହିଂସା ଭିଆଇବାକୁ ସେମାନେ ବିଧିବଦ୍ଧ ଷଡ଼ଯନ୍ତ୍ର କରିଥିଲେ । ଏଥିପାଇଁ ବିକ୍ଷୋଭବେଳେ ଅରାଜକତା କରିଥିଲେ । ଘଟଣାସ୍ଥଳରେ ମୁତୟନ ଥିବା ପୋଲିସ କର୍ମଚାରୀଙ୍କୁ ସେମାନେ ଟାର୍ଗେଟ୍ କରିଥିଲେ । ଏକାଠି ହୋଇ ସେମାନଙ୍କ ଉପରକୁ ପଥରମାଡ କରିଥିଲେ ।

ବିଭିନ୍ନ ସ୍ଥାନରେ ହିଂସାରେ ୧୧୮ଜଣ ପୋଲିସ କର୍ମଚାରୀ ଆହତ ହୋଇଥିବା ସୂଚନା ମିଳିଛି । ରାସ୍ତାରେ ଥିବା ଗାଡିଗୁଡିକୁ ଭାଙ୍ଗିବାକୁ ଚେଷ୍ଟା କରିଥିଲେ । ପଥଚାରୀଙ୍କ ଉପରକୁ ବୋତଲ, ଚପଲ ମଧ୍ୟ ଫିଙ୍ଗିଥିଲେ । ନିଷିଦ୍ଧାଞ୍ଚଳରେ ଡ୍ରୋନ ଉଡାଇ ଏକ ପ୍ରକାର ମଉଜ କରିଥିଲେ । ଏଭଳି ବ୍ୟାପକ ହିଂସାକୁ ନେଇ ଦିଲ୍ଲୀ ପୋଲିସ ଏକାଧିକ ମାମଲା ରୁଜୁ କରିଛି ।

ହିଂସା, ଭଙ୍ଗାରୁଜା, ସରକାରୀ ସମ୍ପତ୍ତିକୁ ନଷ୍ଟ କରିବା, ସରକାରୀ କର୍ମଚାରୀଙ୍କୁ କାର୍ଯ୍ୟରେ ବାଧା ପହଞ୍ଚାଇବା ଏବଂ ଜନ୍ତର ମନ୍ତର ପ୍ରତିବାଦ ସମୟରେ ପୋଲିସର ଜାକେଟ୍ ଓ ହେଲମେଟ୍ ଭଳି ସରଞ୍ଜାମ ଛଡ଼ାଇ ନେବା ଘଟଣାରେ ମାମଲା ରୁଜୁ ହୋଇଛି ।

ଗତକାଲି ପ୍ରତିବାଦ ପାଇଁ ବିକ୍ଷୋଭକାରୀମାନେ କୌଣସି ଅନୁମତି ନେଇ ନଥିଲେ । ପୋଲିସ ପକ୍ଷରୁ ସେମାନଙ୍କୁ ବାରମ୍ବାର ବୁଝା ଯାଇଥଲେ ମଧ୍ୟ ସେମାନେ ହିଂସା ଭିଆଇବାକୁ ଅଡ଼ି ବସିଥିଲେ । ହିଂସା ଭିଆଇଥିବା ଦୁର୍ବୃତ୍ତମାନଙ୍କ ମଧ୍ୟରୁ କାହାର ପୂର୍ବରୁ କୌଣସି ଅପରାଧିକ ପୃଷ୍ଠଭୂମି ଅଛି କି ନାହିଁ ସେ ନେଇ ତଦନ୍ତ ଚାଲିଛି ।

ଏଥିସହ ପଢ଼ନ୍ତୁ: CJP ମୁଖପାତ୍ର ପଦରୁ ହଟିଲେ ବିଜେତା ଦାହିୟା, ବାହାରେ ଲୁଚିକି ଖାଉଥିଲେ ବର୍ଗର... 

ଲୋକଙ୍କୁ ଏକାଠି କରିବା ପାଇଁ ହ୍ୱାଟ୍ସଆପ୍ କିମ୍ବା ଟେଲିଗ୍ରାମ୍ ଗ୍ରୁପ୍ ତିଆରି କରାଯାଇଥିଲା କି ନାହିଁ, ସେ ନେଇ ମଧ୍ୟ ପୋଲିସ ଯାଞ୍ଚ କରୁଛି । ମୋବାଇଲ୍ ଫୋନ୍ କ୍ଲିପ୍, ସିସିଟିଭି ଫୁଟେଜ୍, ଡ୍ରୋନ୍ ଫୁଟେଜ୍ ଏବଂ ପୋଲିସର ବଡି କ୍ୟାମେରା ଦ୍ବାରା ସଂଗ୍ରହ କରାଯାଇଥିବା ୨୫୦ରୁ ଅଧିକ ଭିଡିଓ ଫୁଟେଜରୁ ହିଂସାକାରୀଙ୍କୁ ଚିହ୍ନଟ କରାଯାଉଛି । ଗତକାଲିର ହିଂସା ପରେ ନୂଆଦିଲ୍ଲୀରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।