Traffic Violations / ହେଲମେଟ୍ ନାହିଁ...Red Lightକୁ ମାନୁନାହାନ୍ତି, ରାଜଧାନୀରେ ପ୍ରତି ଘଣ୍ଟାରେ ୩୪ ହଜାର ଟ୍ରାଫିକ ଉଲ୍ଲଂଘନ !

ଦିଲ୍ଲୀରେ ଟ୍ରାଫିକ ନିୟମକୁ କେତେ ମାତ୍ରାରେ ଅଣଦେଖା କରାଯାଉଛି, ତାହା ଦକ୍ଷିଣ ଦିଲ୍ଲୀର ଦୁଇଟି ବଡ଼ ଛକର ତଥ୍ୟରୁ ସ୍ପଷ୍ଟ ହେଉଛି । ଇନ୍‌ଷ୍ଟିଚ୍ୟୁଟ୍ ଅଫ୍ ରୋଡ୍ ଟ୍ରାଫିକ୍ ଏଡୁକେସନ୍ (IRTE)ର ଏକ ଅଧ୍ୟୟନ ଅନୁସାରେ, ଗୋବିନ୍ଦପୁରୀ ଏବଂ କୋଟଲା ମୁବାରକପୁର ଛକରେ ପ୍ରତି ଘଣ୍ଟାରେ ପ୍ରାୟ ୩୪,୭୨୨ଟି ଟ୍ରାଫିକ ନିୟମ ଉଲ୍ଲଂଘନ ରେକର୍ଡ ହୋଇଛି ।

ଗୋବିନ୍ଦପୁରୀ ଛକ ଦେଇ ପ୍ରତି ଘଣ୍ଟାରେ ପ୍ରାୟ ୨୬ ହଜାର ଯାନ ଯାତାୟାତ କରୁଥିବା ବେଳେ, ସେଠାରେ ପ୍ରାୟ ୧୬,୭୯୧ଟି ଟ୍ରାଫିକ୍‌ ଉଲ୍ଲଂଘନ ରେକର୍ଡ ହୋଇଛି । ସେହିପରି କୋଟଲା ମୁବାରକପୁର ଛକ ଦେଇ ପ୍ରତି ଘଣ୍ଟାରେ ପ୍ରାୟ ୨୪ ହଜାର ଯାନ ଯାଉଥିବା ବେଳେ, ଏଠାରେ ପ୍ରାୟ ୧୭,୯୩୧ଟି ଉଲ୍ଲଂଘନ ସାମ୍ନାକୁ ଆସିଛି ।
ତେବେ ଏଠାରେ ଏକ କଥା ସ୍ପଷ୍ଟ କରିବା ଜରୁରୀ । ୩୪,୭୨୨ ସଂଖ୍ୟାଟି ଚାଲାଣର ସଂଖ୍ୟା ନୁହେଁ, ବରଂ ରେକର୍ଡ ହୋଇଥିବା ଟ୍ରାଫିକ ନିୟମ ଉଲ୍ଲଂଘନର ସଂଖ୍ୟା । ଗୋଟିଏ ଗାଡ଼ି କିମ୍ବା ଚାଳକଙ୍କ ଦ୍ୱାରା ଏକାଧିକ ପ୍ରକାରର ନିୟମ ଉଲ୍ଲଂଘନ ହୋଇଥାଇପାରେ ।

ରେଡ୍ ଲାଇଟ୍ ଜମ୍ପ ଓ ହେଲମେଟ୍ ନ ପିନ୍ଧିବା ବଡ଼ ସମସ୍ୟା

ଅଧ୍ୟୟନରେ ବିଭିନ୍ନ ପ୍ରକାରର ଟ୍ରାଫିକ ଉଲ୍ଲଂଘନ ସାମ୍ନାକୁ ଆସିଛି । କୋଟଲା ମୁବାରକପୁରରେ ପ୍ରତି ଘଣ୍ଟାରେ ପ୍ରାୟ ୪,୮୦୮ଟି ରେଡ୍ ଲାଇଟ୍ ଜମ୍ପ ରେକର୍ଡ ହୋଇଥିବା ବେଳେ, ଗୋବିନ୍ଦପୁରୀରେ ଏହି ସଂଖ୍ୟା ପ୍ରାୟ ୧,୭୩୧ । ସେହିପରି ହେଲମେଟ୍ ନ ପିନ୍ଧି ଦୁଇଚକିଆ ଚଳାଇବା କିମ୍ବା ପଛରେ ବସିଥିବା ଯାତ୍ରୀ ହେଲମେଟ୍ ନ ପିନ୍ଧିବା ମାମଲା ମଧ୍ୟ ବହୁ ସଂଖ୍ୟାରେ ଦେଖିବାକୁ ମିଳିଛି । କୋଟଲା ମୁବାରକପୁରରେ ପ୍ରାୟ ୩,୦୬୮ ଏବଂ ଗୋବିନ୍ଦପୁରୀରେ ପ୍ରାୟ ୩,୭୨୫ଟି ଏଭଳି ଉଲ୍ଲଂଘନ ରେକର୍ଡ ହୋଇଛି ।

ଏହା ବ୍ୟତୀତ ଭୁଲ ଦିଗରେ ଗାଡି ଚାଳନା ଏବଂ ଭୁଲ ୟୁ-ଟର୍ଣ୍ଣ ସମ୍ପର୍କିତ ଉଲ୍ଲଂଘନ ମଧ୍ୟ ବହୁ ସଂଖ୍ୟାରେ ରହିଛି । କୋଟଲା ମୁବାରକପୁରରେ ପ୍ରାୟ ୧,୮୪୦ଟି ଏବଂ ଗୋବିନ୍ଦପୁରୀରେ ପ୍ରାୟ ୧,୬୩୨ଟି ଭୁଲ ଦିଗରେ ଗାଡ଼ି ଚାଳନା ମାମଲା ରେକର୍ଡ ହୋଇଛି । କୋଟଲା ମୁବାରକପୁରରେ ପ୍ରତି ଘଣ୍ଟାରେ ପ୍ରାୟ ୭୮୨ଟି ଯାନ ଭୁଲ ଦିଗରେ ଗାଡ଼ି ଯାଉଥିବା ଦେଖିବାକୁ ମିଳିଥିଲା । ଅନ୍ୟପଟେ ଗୋବିନ୍ଦପୁରୀରେ ପ୍ରାୟ ୩୬୫ଟି ଭୁଲ୍ U-Turn ମାମଲା ରେକର୍ଡ ହୋଇଛି ।

ଟ୍ରାଫିକ ସିଗ୍ନାଲ ନିକଟରେ ଗାଡ଼ିର ଗତି କମ୍ ନ କରିବା ଭଳି ଉଲ୍ଲଂଘନ ମଧ୍ୟ ସାମ୍ନାକୁ ଆସିଛି । ବିଶେଷଜ୍ଞଙ୍କ ମତରେ, ବ୍ୟସ୍ତବହୁଳ ଛକଗୁଡ଼ିକରେ ଏଭଳି ବିପଜ୍ଜନକ ଆଚରଣ ରାସ୍ତା ଦୁର୍ଘଟଣାର ଆଶଙ୍କାକୁ ବଢ଼ାଇପାରେ । IRTEର ମତରେ, ସଡ଼କ ସୁରକ୍ଷା ପାଇଁ କେବଳ ଦୁର୍ଘଟଣା କିମ୍ବା ଚାଲାଣ ସଂଖ୍ୟାକୁ ଦେଖିଲେ ହେବ ନାହିଁ । ରାସ୍ତାରେ କେଉଁ ପ୍ରକାରର ବିପଜ୍ଜନକ ଆଚରଣ କେଉଁ ସ୍ଥାନରେ ଘଟୁଛି, ତାହା ବୁଝିବା ମଧ୍ୟ ଆବଶ୍ୟକ ।

କେବଳ ଚାଳକ ନୁହେଁ, ସଡ଼କ ବ୍ୟବସ୍ଥାରେ ମଧ୍ୟ ସୁଧାର ଆବଶ୍ୟକ

ଅଧ୍ୟୟନରେ କେବଳ ଗାଡ଼ି ଚାଳକଙ୍କ ଆଚରଣକୁ ସମସ୍ୟା ଭାବେ ଦର୍ଶାଯାଇନାହିଁ । କେତେକ ସ୍ଥାନରେ ସଡ଼କ ନିର୍ମାଣର ତ୍ରୁଟି, ଦୁର୍ବଳ କିମ୍ବା ରାସ୍ତାରେ ଚିହ୍ନ ନଥିବା, ଫିକା ପଡ଼ିଯାଇଥିବା ଜେବ୍ରା କ୍ରସିଂ ଓ ଖରାପ ଟ୍ରାଫିକ ସିଗନାଲ ମଧ୍ୟ ଟ୍ରାଫିକ୍‌ ବ୍ୟବସ୍ଥାକୁ ପ୍ରଭାବିତ କରୁଛି ।

ବିଶେଷଜ୍ଞଙ୍କ ଅନୁସାରେ, ଏଭଳି ସ୍ଥାନଗୁଡ଼ିକୁ ବୈଜ୍ଞାନିକ ଭାବେ ଚିହ୍ନଟ କରି ସଡ଼କ ଡିଜାଇନ୍, ସିଗନାଲ ବ୍ୟବସ୍ଥା ଓ ଟ୍ରାଫିକ ପରିଚାଳନାରେ ସୁଧାର ଆଣିବା ଆବଶ୍ୟକ । ସେହିପରି ବିପଦପୂର୍ଣ୍ଣ ଲେନ୍ ପରିବର୍ତ୍ତନ, ଦ୍ରୁତ ଗାଡି ଚାଳନା ଏବଂ ନିରାପଦ ଦୂରତା ବଜାୟ ରଖିବାରେ ବିଫଳ ହେବା ଭଳି ଆଚରଣଗୁଡ଼ିକୁ ମଧ୍ୟ ସମାଧାନ କରାଯିବା ଆବଶ୍ୟକ ।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ୩୪,୭୨୨ ସଂଖ୍ୟା ଏହି ଦୁଇଟି ଛକରେ ରେକର୍ଡ ହୋଇଥିବା ଉଲ୍ଲଂଘନ ମଧ୍ୟରୁ, ଏହାକୁ ସମଗ୍ର ଦିଲ୍ଲୀ ସହରରେ ପ୍ରତି ଘଣ୍ଟାରେ ଜାରି ହୋଇଥିବା ଉଲ୍ଲଂଘନ କିମ୍ବା ଚାଲାଣର ସଂଖ୍ୟା ଭାବରେ ବିବେଚନା କରାଯିବା ଉଚିତ୍ ନୁହେଁ ।