ପଶ୍ଚିମ ଏସିଆରେ ଚାଲିଥିବା ଯୁଦ୍ଧର ମାହୋଲ ଏବଂ ତୈଳ ଦର ବୃଦ୍ଧି ପାଉଥିବା ଯୋଗୁଁ ସାରା ବିଶ୍ୱରେ ଏହାର ପ୍ରଭାବ ଦେଖିବାକୁ ମିଳୁଛି । ଏପରି ସ୍ଥିତିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ବିଭିନ୍ନ ଖର୍ଚ୍ଚକାଟ, ବିଶେଷକରି ପେଟ୍ରୋଲ ବ୍ୟବହାର କମ୍ କରିବାକୁ ଆହ୍ୱାନ ଦେଇଥିଲେ । ଆଉ ପ୍ରଧାନମନ୍ତ୍ରୀ ମୋଦି ବି ତାଙ୍କ କାରକେଡ୍‌କୁ ଯଥେଷ୍ଟ ହ୍ରାସ କରିଥିଲେ । ପରବର୍ତ୍ତୀ ସମୟରେ ଅନେକ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀ, ମନ୍ତ୍ରୀ ଏବଂ ରାଜ୍ୟପାଳ ମଧ୍ୟ ଏହାକୁ ଅନୁସରଣ କରୁଥିବା ଦେଖିବାକୁ ମିଳୁଛି । ଗୁରୁବାର ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକ ବାଇକ୍ ଯୋଗେ ବିଧାନସଭାରେ ପହଞ୍ଚିଥିଲେ, ଯାହାର ଏକ ଭିଡିଓ ଏବେ ସାମ୍ନାକୁ ଆସିଛି ।

ସରକାରୀ ସୂତ୍ର ଅନୁଯାୟୀ, ପ୍ରଧାନମନ୍ତ୍ରୀ ମୋଦି ସମ୍ପ୍ରତି ଘରୋଇ ଗସ୍ତ ସମୟରେ ତାଙ୍କ କାରକେଡ୍‌ରେ ଗାଡ଼ି ସଂଖ୍ୟା ହ୍ରାସ କରିଛନ୍ତି । ଏହି ପରିବର୍ତ୍ତନ ଗୁଜରାଟ ଏବଂ ଆସାମ ଗସ୍ତ ସମୟରେ ସ୍ପଷ୍ଟ ଭାବରେ ଦେଖାଯାଇଥିଲା । ତଥାପି, SPG ପ୍ରୋଟୋକଲ ପାଇଁ ଆବଶ୍ୟକୀୟ ସୁରକ୍ଷା ବ୍ୟବସ୍ଥା ବଜାୟ ରଖାଯାଇଛି । ସୂତ୍ର ଅନୁସାରେ ପ୍ରଧାନମନ୍ତ୍ରୀ ଏହା ମଧ୍ୟ ପରାମର୍ଶ ଦେଇଛନ୍ତି ଯେ ସମ୍ଭବ ହେଲେ ତାଙ୍କ କାରକେଡ୍‌ରେ EV ସାମିଲ କରାଯିବା ଉଚିତ, କିନ୍ତୁ କୌଣସି ନୂତନ କ୍ରୟ କରାଯିବା ଉଚିତ ନୁହେଁ ।
ସୂଚନା ଅନୁଯାୟୀ, କେନ୍ଦ୍ର କ୍ୟାବିନେଟ୍ ବୈଠକରେ ପ୍ରଧାନମନ୍ତ୍ରୀ ମୋଦି ମନ୍ତ୍ରୀମାନଙ୍କୁ କହିଥିଲେ ଯେ ପଶ୍ଚିମ ଏସିଆ ସଙ୍କଟକୁ ଦୃଷ୍ଟିରେ ରଖି ସମ୍ବଳ ସଂରକ୍ଷଣ ଏବଂ ଖର୍ଚ୍ଚରେ ସଂଯମତା ଅବଲମ୍ବନ କରିବା ଅତ୍ୟନ୍ତ ଜରୁରୀ । ସେ ମନ୍ତ୍ରୀମାନଙ୍କୁ ସେମାନଙ୍କର କାରକେଡ୍‌କୁ କମ୍‌ କରିବା ଏବଂ ବିଦେଶ ଯାତ୍ରା ହ୍ରାସ କରିବାକୁ ମଧ୍ୟ ଅନୁରୋଧ କରିଥିଲେ ।

On Hon PM @narendramodi Ji’s appeal, here’s my bit towards austerity measures for our Nation 🇮🇳
I appeal everyone to please bring lifestyle changes in every possible way. pic.twitter.com/SbsREExpcr

— Devendra Fadnavis (@Dev_Fadnavis) May 14, 2026

ପ୍ରଧାନମନ୍ତ୍ରୀଙ୍କ ଆବେଦନ ପରେ ଅନେକ ରାଜ୍ୟ ତୁରନ୍ତ ପଦକ୍ଷେପ ନେଇଥିଲେ । ଉତ୍ତର ପ୍ରଦେଶରେ ଯୋଗୀ ଆଦିତ୍ୟନାଥ ମୁଖ୍ୟମନ୍ତ୍ରୀ ଏବଂ ମନ୍ତ୍ରୀମାନଙ୍କ କାରକେଡ୍‌ରେ ଗାଡ଼ି ସଂଖ୍ୟା ୫୦ ପ୍ରତିଶତ ହ୍ରାସ କରିବାକୁ ନିର୍ଦ୍ଦେଶ ଦେଇଛନ୍ତି । ସେ ଜନସାଧାରଣଙ୍କୁ ବୁଦ୍ଧିମାନ ଭାବରେ ଖର୍ଚ୍ଚ କରିବା ଏବଂ ଇନ୍ଧନ ସଞ୍ଚୟ କରିବାକୁ ମଧ୍ୟ ନିବେଦନ କରିଥିଲେ ।

ପ୍ରଧାନମନ୍ତ୍ରୀଙ୍କ ଆହ୍ବାନକୁ ସମ୍ମାନ ଜଣାଇ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଗୁରୁବାର ବର୍ଷା ଆବାସରୁ ବିଧାନସଭା ଏବଂ ତା'ପରେ ସଚିବାଳୟରେ ଅନୁଷ୍ଠିତ କ୍ୟାବିନେଟ୍ ବୈଠକକୁ ବାଇକ୍‌ ଯୋଗେ ଯାଇଥିଲେ ।

ମୁଖ୍ୟମନ୍ତ୍ରୀଙ୍କ ଏହି ପଦକ୍ଷେପକୁ ସରକାରଙ୍କ ପକ୍ଷରୁ ଇନ୍ଧନ ସଂରକ୍ଷଣ ଏବଂ ଅନାବଶ୍ୟକ ଖର୍ଚ୍ଚ ହ୍ରାସ କରିବା ପାଇଁ ଏକ ବାର୍ତ୍ତା ଭାବରେ ଦେଖାଯାଉଛି । ଆବଶ୍ୟକ ହେଲେ ସେୟାର ଯାନ, ବୈଦ୍ୟୁତିକ ଯାନ ବ୍ୟବହାର ବୃଦ୍ଧି କରିବାକୁ ମୁଖ୍ୟମନ୍ତ୍ରୀ ମନ୍ତ୍ରୀ ଏବଂ ଅଧିକାରୀମାନଙ୍କୁ ଅନୁରୋଧ କରିଥିବା ଜଣାପଡ଼ିଛି ।