ଅର୍ଗସ ବ୍ୟୁରୋ : PM ଇ-ବିଦ୍ୟା ଅଧୀନରେ ଇଣ୍ଡିଆନ ସାଇନ୍ ଲାଙ୍ଗୁଏଜ୍ (ISL)ର ନୂଆ ଚ୍ୟାନେଲର ଶୁଭାରମ୍ଭ କରିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । DTHରେ ମାଗଣାରେ ପଢ଼ି ପାରିବେ ଶିକ୍ଷାର୍ଥୀ । DTH ଚ୍ୟାନେଲ୍ ନମ୍ବର ୩୧ରେ ଆସିବ ଏହି ଚ୍ୟାନେଲ୍। ଚଳିତ ବର୍ଷ ବଜେଟରେ ଏ ନେଇ ଘୋଷଣା କରିଥିଲେ କେନ୍ଦ୍ର ସରକାର । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆଉ ଏକ ଗ୍ୟାରେଣ୍ଟି ପୂରଣ ହୋଇଛି ବୋଲି କହିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ପୂର୍ବରୁ ଦିବ୍ୟାଙ୍ଗ ମାନଙ୍କୁ ଅନେକ ନାମ ଅନେକ ଭାଷାର ପରିଚୟ ମିଳୁଥିଲା । ୨୦୧୬ ମସିହାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସେମାନଙ୍କୁ ନୂଆ ପରିଚୟ ଦେଇଥିଲେ । ୨୦୧୧ର ଜନ ଗଣନା କହେ, ଦେଶରେ ୫୦ ଲକ୍ଷରୁ ଅଧିକ ଦିବ୍ୟାଙ୍ଗ ରହିଛନ୍ତି । ସେମାନଙ୍କୁ ସମବେଶୀ ଶିକ୍ଷା ପ୍ରଦାନ କରିବା ପାଇଁ ବ୍ୟବସ୍ଥା ହୋଇଛି ।

ଅଧିକ ପଢନ୍ତୁ : ଓଡ଼ିଶା ସାର୍ବଜନୀନ ପରୀକ୍ଷା ବିଲ୍-୨୦୨୪ ବିଧାନସଭାରେ ଆଗତ

ସମାଜରେ ଆମର ଯେତିକି ଅଧିକାର ରହିଛି ସେମାନଙ୍କର ମଧ୍ୟ ସମାନ ଅଧିକାର ରହିଥିବା କେନ୍ଦ୍ର ଶିକ୍ଷାମନ୍ତ୍ରୀ କହିଛନ୍ତି । ଦିବ୍ୟାଙ୍ଗ ମାନଙ୍କ ସହଜ ଜୀଵନ ପାଇଁ ସାଇନ୍ ଲାଙ୍ଗୁଏଜ୍ କୁ ସମାଜରେ ବୃଦ୍ଧି କରିବାକୁ ପଡିବ । ଶବ୍ଦରେ କେବଳ ଭାବ ରୂପାନ୍ତରିତ ହୁଏନାହିଁ । ଭଗବାନଙ୍କ ଆଖିରୁ ମଧ୍ୟ ଭାବ ବୁଝାପଡେ । ଭାରତର କଳା, ସଂସ୍କୃତି, ନୃତ୍ୟରେ ସାଇନ୍ ଲାଙ୍ଗୁଏଜ୍  ରହିଛି । ଭାରତନାଟ୍ୟମ୍, କୁଚୂପୁଡ଼ି, ଓଡ଼ିଶୀରେ ସାଇନ୍ ଲାଙ୍ଗୁଏଜ୍  ରହିଛି । ଆମର ଲକ୍ଷ୍ୟ ସାଇନ୍ ଲାଙ୍ଗୁଏଜ୍ ବା ସାଙ୍କେତିକ ଭାଷାକୁ ବିଶ୍ବସ୍ତରୀୟ କରିବା । ଦିବ୍ୟାଙ୍ଗଙ୍କୁ ସାମାଜିକ ମର୍ଯ୍ୟାଦା ପ୍ରଧାନମନ୍ତ୍ରୀ ମୋଦି ଦେଇଛନ୍ତି ବୋଲି କହିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।