Zoho Founder / ଇସ୍ତଫା ପରେ ଧର୍ମେନ୍ଦ୍ରଙ୍କ ନିସ୍ଵାର୍ଥପରତାକୁ ପ୍ରଶଂସା; ଏମିତି କହିଲେ ZOHO ପ୍ରତିଷ୍ଠାତା

ନୂଆଦିଲ୍ଲୀ: ଦେଶର ଯୁବପିଢି ଓ ଛାତ୍ରଛାତ୍ରୀଙ୍କ ସ୍ଵାର୍ଥ ଓ ଭବିଷ୍ୟତକୁ ସର୍ବାଗ୍ରେ ରଖି ଶେଷରେ କେନ୍ଦ୍ର ଶିକ୍ଷାମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ଧର୍ମେନ୍ଦ୍ର ପ୍ରଧାନ । ଧର୍ମେନ୍ଦ୍ରଙ୍କ ତ୍ୟାଗ ଓ ନିଷ୍ଠାକୁ ବିଭିନ୍ନ ମହଲରେ ପ୍ରଶଂସା କରାଯାଉଛି । ପଦବୀଠୁ ଦେଶ ବଡ଼ ଓ ଦେଶର ଯୁବପିଢ଼ି ଓ ଛାତ୍ରଛାତ୍ରୀଙ୍କ ସ୍ବାର୍ଥ ସର୍ବୋପରି ରଖି ଧର୍ମେନ୍ଦ୍ର ଏହି ନିଷ୍ପତ୍ତି ନେଇଛନ୍ତି । କେନ୍ଦ୍ର ଶିକ୍ଷାମନ୍ତ୍ରୀ ଭାବେ ସେ ଭାରତୀୟ ଶିକ୍ଷା ବ୍ୟବସ୍ଥାରେ ଆଣିଥିବା ଗୁରୁତ୍ଵପୂର୍ଣ୍ଣ ପରିବର୍ତ୍ତନ ଓ ତାଙ୍କର ନିସ୍ଵାର୍ଥପର ସେବାକୁ ମନେ ପକାଇଛନ୍ତି ଭାରତୀୟ କୋଟିପତି ବ୍ୟବସାୟୀ ତଥା ବହୁରାଷ୍ଟ୍ରୀୟ ପ୍ରଯୁକ୍ତିବିଦ୍ୟା କମ୍ପାନୀ'ଜୋହୋ କର୍ପୋରେସନ୍'ର ପ୍ରତିଷ୍ଠାତା ଓ ପୂର୍ବତନ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀଧର ଭେମ୍ବୁ ।

• 'ସର୍ବୋତ୍ତମ ଜନସେବକ ହେଉଛନ୍ତି ଧର୍ମେନ୍ଦ୍ର'

ଶ୍ରୀଧର ଭେମ୍ବୁ ହେଉଛନ୍ତି ଭାରତର ଜଣେ ପ୍ରସିଦ୍ଧ ପ୍ରଯୁକ୍ତିବିଦ୍ୟା ଉଦ୍ୟମୀ ତଥା ପ୍ରମୁଖ ସଫ୍ଟୱେର୍ କମ୍ପାନୀ 'ଜୋହୋ କର୍ପୋରେସନ୍'ର ସହ-ପ୍ରତିଷ୍ଠାତା । ସେ ଧର୍ମେନ୍ଦ୍ରଙ୍କ ଇସ୍ତଫା ପରେ ନିଜ ପ୍ରତିକ୍ରିୟାରେ କହିଛନ୍ତି, "ମୋ ଜାଣିବାରେ ଧର୍ମେନ୍ଦ୍ର ପ୍ରଧାନ ସର୍ବୋତ୍ତମ ଜନସେବକ ଅଟନ୍ତି । ସେ ଦେଶର ଯୁବବର୍ଗଙ୍କ ପାଇଁ ଗଭୀର ଚିନ୍ତା କରନ୍ତି । ତାଙ୍କର ଇସ୍ତଫା ଦେବା ଘଟଣା ମୋତେ ଦୁଃଖିତ କରିଛି । ସେ ନିଜ ସ୍ୱାର୍ଥ ଅପେକ୍ଷା ଦେଶକୁ ଅଧିକ ଗୁରୁତ୍ୱ ଦେଇଛନ୍ତି ।"

• ଏମିତି କହିଲେ ନାଗାଲାଣ୍ଡ ଉଚ୍ଚ ଶିକ୍ଷାମନ୍ତ୍ରୀ

ସେହିପରି ନାଗାଲାଣ୍ଡର ଉଚ୍ଚ ଶିକ୍ଷାମନ୍ତ୍ରୀ ତେମଜେନ ଇମନା ଏଲୋଙ୍ଗ ମଧ୍ୟ ଧର୍ମେନ୍ଦ୍ରଙ୍କ ଶିକ୍ଷାମନ୍ତ୍ରୀ ଭାବେ କର୍ତ୍ତବ୍ୟନିଷ୍ଠାକୁ ପ୍ରଶଂସା କରିଛନ୍ତି । ସେ ଲେଖିଛନ୍ତି, " ଧର୍ମେନ୍ଦ୍ର ପ୍ରଧାନ କେନ୍ଦ୍ର ଶିକ୍ଷା ମନ୍ତ୍ରୀ ଭାବରେ ଜାତୀୟ ଶିକ୍ଷା ନୀତି ୨୦୨୦ର କାର୍ଯ୍ୟାନ୍ୱୟନକୁ ପରିଚାଳନା କରିଛନ୍ତି ଏବଂ ସ୍କୁଲ, ଉଚ୍ଚ ଏବଂ ବୈଷୟିକ ଶିକ୍ଷାରେ ଗୁରୁତ୍ୱପୂର୍ଣ୍ଣ ସଂସ୍କାର ଆଣିଛନ୍ତି । ଶିକ୍ଷା ପ୍ରତି ତାଙ୍କର ସକାରାତ୍ମକ ଦୃଢ଼ତା ନାଗାଲାଣ୍ଡ ରାଜ୍ୟ ପାଇଁ ଅତୁଳନୀୟ । ପଦ ଛାଡିବାର ତାଙ୍କର ନିଷ୍ପତ୍ତି ଏହା ଦର୍ଶାଏ ଯେ ପଦଠାରୁ ଅଧିକ ଗୁରୁତ୍ଵପୂର୍ଣ୍ଣ ଜନସ୍ୱାର୍ଥ ।"

Shri @dpradhanbjp Ji has served the nation with distinction as Union Education Minister, steering the implementation of the National Education Policy 2020 and driving significant reforms across school, higher and technical education.

His positive assertions towards education… pic.twitter.com/29459cpIOf

— Temjen Imna Along (@AlongImna) July 25, 2026

• କିଏ ହେଲେ ନୂଆ କେନ୍ଦ୍ର ଶିକ୍ଷାମନ୍ତ୍ରୀ ?

ରାଷ୍ଟ୍ରପତି ଭବନ ଦ୍ୱାରା ଜାରି ହୋଇଥିବା ଏକ ବିଜ୍ଞପ୍ତି ଅନୁଯାୟୀ, ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ତୁରନ୍ତ ଗ୍ରହଣ କରାଯାଇଛି । ଏହା ପରେ ପ୍ରହଲ୍ଲାଦ ଜୋଶୀଙ୍କୁ ଶିକ୍ଷା ମନ୍ତ୍ରଣାଳୟର ଦାୟିତ୍ୱ ଦିଆଯାଇଛି । ପ୍ରଧାନମନ୍ତ୍ରୀଙ୍କ ପରାମର୍ଶ କ୍ରମେ ରାଷ୍ଟ୍ରପତି ତାଙ୍କୁ ଶିକ୍ଷା ମନ୍ତ୍ରଣାଳୟର ଅତିରିକ୍ତ ଦାୟିତ୍ୱ ଦେବାକୁ ଅନୁମୋଦନ କରିଛନ୍ତି । ତଥାପି ସେ ତାଙ୍କର ବର୍ତ୍ତମାନର ମନ୍ତ୍ରଣାଳୟର ଦାୟିତ୍ୱ ବଜାୟ ରଖିବେ। ଏହାର ଅର୍ଥ ହେଉଛି ଯେ ବର୍ତ୍ତମାନ ପାଇଁ ସେ ତାଙ୍କର ବର୍ତ୍ତମାନର ଦାୟିତ୍ୱ ସହିତ ଶିକ୍ଷା ମନ୍ତ୍ରଣାଳୟ ମଧ୍ୟ ସମ୍ଭାଳିବେ।