Diwali Traffic Jam / ଦୀପାବଳି ପୂର୍ବରୁ ରାଜଧାନୀରେ ଟ୍ରାଫିକ୍ ଜାମ୍, ଦିଲ୍ଲୀରୁ ନୋଏଡା ଯାଏଁ ଭୟଙ୍କର ଟ୍ରାଫିକ୍

ଦୀପାବଳି ପର୍ବକୁ ନେଇ ଦିଲ୍ଲୀ-NCRରେ ଏବେ ଉତ୍ସବର ମାହୋଲ । ଘର ସଜାଇବାଠାରୁ ଆରମ୍ଭ କରି ମିଠା, ପୋଷାକ ଓ ଫୁଲ କିଣିବା ପାଇଁ ଲୋକମାନେ ବଜାରକୁ ଯାଉଛନ୍ତି । ହେଲେ ଏହି ପାର୍ବଣର ଭିଡ଼ ଏବେ ରାଜଧାନୀ ଦିଲ୍ଲୀ ସମେତ ନୋଏଡା ଓ ଆଖପାଖ ଅଞ୍ଚଳର ଟ୍ରାଫିକ୍ ବ୍ୟବସ୍ଥାକୁ ପ୍ରଭାବିତ କରିଛି । ରାସ୍ତାରେ ଗାଡ଼ିର ଲମ୍ବା ଲାଇନ୍‌ ଲାଗିଥିବା ବେଳେ ଅନେକ ସ୍ଥାନରେ ଯାତାୟାତ ପ୍ରାୟ ଠପ୍‌ ହୋଇଯାଇଛି ।

ଗାଜିପୁର ଫୁଲ ମଣ୍ଡିରେ ସବୁଠାରୁ ଅଧିକ ଭିଡ଼

ପୂର୍ବ ଦିଲ୍ଲୀର ଗାଜିପୁର ବର୍ଡର ଏବଂ NH-24ରେ ଥିବା ଗାଜିପୁର ଫୁଲ ମଣ୍ଡି ଏବେ ଟ୍ରାଫିକ୍ ଜାମ୍‌ର ପ୍ରମୁଖ କେନ୍ଦ୍ର ପାଲଟିଛି । ଦୀପାବଳିରେ ରଙ୍ଗୋଲି, ପୂଜା ଓ ଘର ସାଜସଜ୍ଜା ପାଇଁ ତାଜା ଫୁଲର ଚାହିଦା ବଢ଼ିଯାଏ। ଏଥିପାଇଁ ହଜାର ହଜାର ଲୋକ ଫୁଲ କିଣିବାକୁ ମଣ୍ଡିରେ ପହଞ୍ଚୁଛନ୍ତି ।

ଛୋଟ ଗାଡ଼ି, ଅଟୋ, କାର୍‌ ଏବଂ ଟ୍ରକ୍‌ ଏକାସାଙ୍ଗରେ ରାସ୍ତାକୁ ଆସିବା ଫଳରେ ସମଗ୍ର ଅଞ୍ଚଳରେ ଟ୍ରାଫିକ୍ ଜାମ୍‌ ସୃଷ୍ଟି ହୋଇଛି। ସକାଳଠାରୁ ସନ୍ଧ୍ୟା ପର୍ଯ୍ୟନ୍ତ ଗାଡ଼ିଗୁଡ଼ିକ ଧୀରେ ଧୀରେ ଯାଉଛି । ଏହାର ପ୍ରଭାବ ଆଖପାଖ ଅଞ୍ଚଳର ଯାତାୟାତ ଉପରେ ମଧ୍ୟ ପଡ଼ିଛି ।

ଧନତେରସ୍‌ ଦିନ ବଜାରରେ ସବୁଠାରୁ ଅଧିକ ଭିଡ଼ ଦେଖିବାକୁ ମିଳିଥିଲା । ଏହା ପରଦିନ ଟ୍ରାଫିକ୍ ସମସ୍ୟା କମିବ ବୋଲି ଆଶା କରାଯାଉଥିଲେ ମଧ୍ୟ ପଶ୍ଚିମ ଦିଲ୍ଲୀର ପଙ୍ଖା ରୋଡ୍‌ ଓ ଜନକପୁରୀ ଅଞ୍ଚଳରେ ଭିଡ଼ ଜାରି ରହିଛି ।

ଏହି ଅଞ୍ଚଳଗୁଡ଼ିକରେ ବଜାର, ମଲ୍‌ ଏବଂ ଆବାସିକ କଲୋନୀ ରହିଥିବାରୁ ଲୋକଙ୍କ ଯାତାୟାତ ଅଧିକ ରହୁଛି । ସୁନା, ରୁପା, ବାସନକୁସନ, ପୋଷାକ ଓ ଉପହାର କିଣିବାକୁ ଲୋକମାନେ ବାହାରୁଛନ୍ତି । ଏହାସହ ପାର୍କିଂ ସ୍ଥାନର ଅଭାବ ଓ ଅବ୍ୟବସ୍ଥିତ ପାର୍କିଂ ସମସ୍ୟାକୁ ଆହୁରି ବଢ଼ାଇ ଦେଇଛି। ଅନେକ ସ୍ଥାନରେ ଟ୍ରାଫିକ୍ ପୋଲିସ ମୁତୟନ ଥିଲେ ମଧ୍ୟ ଭିଡ଼ ନିୟନ୍ତ୍ରଣ କରିବା କଷ୍ଟକର ହେଉଛି ।

ଟ୍ରାଫିକ୍ ନିୟନ୍ତ୍ରଣ ପାଇଁ ପୋଲିସର ପ୍ରସ୍ତୁତି

ଟ୍ରାଫିକ୍ ସମସ୍ୟାକୁ ନିୟନ୍ତ୍ରଣ କରିବା ପାଇଁ ଟ୍ରାଫିକ୍ ପୋଲିସ ପକ୍ଷରୁ ଅତିରିକ୍ତ ଯବାନ ମୁତୟନ କରାଯାଉଛି। କେତେକ ସ୍ଥାନରେ ଲୋକଙ୍କୁ ବିକଳ୍ପ ରାସ୍ତା ବ୍ୟବହାର କରିବାକୁ ପରାମର୍ଶ ଦିଆଯାଉଛି। ଅତ୍ୟନ୍ତ ଆବଶ୍ୟକ ନଥିଲେ ଘରୋଇ ଗାଡ଼ି ବାହାର ନକରିବା, ମେଟ୍ରୋ ଓ ସାର୍ବଜନୀନ ପରିବହନ ବ୍ୟବହାର କରିବା ସହ କିଣାକିଣି ପାଇଁ ଭିନ୍ନ ଭିନ୍ନ ସମୟ ବାଛିବାକୁ ଲୋକଙ୍କୁ ଅନୁରୋଧ କରାଯାଉଛି ।