କର୍ଣ୍ଣାଟକରେ ଆଜିଠୁ ଆରମ୍ଭ ହେଲା ଡିକେ ରାଜ୍ । ସମସ୍ତ କଳ୍ପନାଜଳ୍ପନାର ଅନ୍ତ ଘଟାଇ ସିଦ୍ଦରମୈୟାଙ୍କ ଇସ୍ତଫା ପରେ ରାଜ୍ୟର ୨୫ ତମ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି ଡିକେ ଶିବକୁମାର । ଆଜି ଲୋକଭବନ ସ୍ଥିତ ଗ୍ଲାସ୍ ହାଉସରେ ଆୟୋଜିତ ସମାରୋହରେ ରାଜ୍ୟପାଳ ଥାୱର ଚାନ୍ଦ ଗେହଲଟ୍ ଶିବକୁମାରଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି ।

ମୁଖ୍ୟମନ୍ତ୍ରୀଙ୍କ ସହ ବରିଷ୍ଠ କଂଗ୍ରେସ ନେତା ଜି. ପରମେଶ୍ୱର ଉପ-ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି । ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ପୁଅ ୟତୀନ୍ଦ୍ରଙ୍କ ସମେତ ଅନ୍ୟ ୧୨ ଜଣ ବିଧାୟକ ମନ୍ତ୍ରୀ ପଦର ଶପଥ ନେଇଛନ୍ତି । ଶପଥ ଗ୍ରହଣ ଉତ୍ସବରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ, ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧିଙ୍କ ସମେତ ବିଭିନ୍ନ କଂଗ୍ରେସ ଶାସିତ ରାଜ୍ୟର ମୁଖ୍ୟମନ୍ତ୍ରୀମାନେ ଯୋଗ ଦେଇଥିଲେ । ପୂର୍ବତନ ମୁଖ୍ୟମନ୍ତ୍ରୀ ସିଦ୍ଦରମୈୟା ମଧ୍ୟ ଏହି କାର୍ଯ୍ୟକ୍ରମରେ ଉପସ୍ଥିତ ରହି ଶିବକୁମାରଙ୍କୁ ଶୁଭେଚ୍ଛା ଜଣାଇଥିଲେ ।

ଗତ ମେ' ୨୮ ତାରିଖରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ ସିଦ୍ଦରମୈୟା । ଇସ୍ତଫା ଦେବା ପରେ କରିଥିବା ପ୍ରେସମିଟ୍‌ରେ ସେ କହିଛନ୍ତି, କଂଗ୍ରେସ ହାଇକମାଣ୍ଡ ମୋତେ ଇସ୍ତଫା ଦେବା ପାଇଁ କହିଥିଲେ । ମୁଖ୍ୟମନ୍ତ୍ରୀ ଭାବେ ସୁଯୋଗ ଦେଇଥିବାରୁ ସୋନିଆ ଗାନ୍ଧି, ମଲ୍ଲିକାର୍ଜୁନେ ଖଡଗେ ଓ ରାହୁଲ ଗାନ୍ଧିଙ୍କୁ ସେ କୃତଜ୍ଞତା ଜଣାଇଥିଲେ ।

କର୍ଣ୍ଣାଟକ ମୁଖ୍ୟମନ୍ତ୍ରୀ ପଦରୁ ଇସ୍ତାଫ ଦେବା ପୂର୍ବରୁ ସିଦ୍ଧରମୈୟା ବେଙ୍ଗାଲୁରୁରେ ତାଙ୍କର ଶେଷ କ୍ୟାବିନେଟ୍ ବୈଠକ କରିଥିଲେ । ଏହି ବୈଠକ ସମୟରେ ସିଦ୍ଧରମୈୟା ଭାବପ୍ରବଣ ହୋଇ ପଡ଼ିଥିଲେ। ସେ ତାଙ୍କର କ୍ୟାବିନେଟ୍ ସହଯୋଗୀମାନଙ୍କୁ କହିଥିଲେ ଯେ ଗତ ୨୦ ବର୍ଷ ମଧ୍ୟରେ ମୁଁ ଆପଣମାନଙ୍କ ଉପରେ ଚିତ୍କାର କରିଛି ଏବଂ ରାଗିଛି । କିନ୍ତୁ ସେ ଦଳର ଲାଭ ପାଇଁ ଏସବୁ କରିଛନ୍ତି । ଏଥିରେ ବ୍ୟକ୍ତିଗତ କିଛି ନଥିଲା । ମୁଁ ଦଳ ଏବଂ ସରକାରଙ୍କ ସ୍ୱାର୍ଥ ପାଇଁ ଏହା କରିଛି। ଏହା ପଛରେ କୌଣସି ବ୍ୟକ୍ତିଗତ ଉଦ୍ଦେଶ୍ୟ ନଥିଲା । ଆପଣମାନେ ଏତେ ବର୍ଷ ଧରି ମୋତେ ସମର୍ଥନ କରିଆସୁଛନ୍ତି, ଆପଣମାନଙ୍କୁ ସମସ୍ତଙ୍କୁ ଧନ୍ୟବାଦ।"