ଚଣ୍ଡିଗଡ଼: ହରିୟାଣାର ଫରିଦାବାଦର ଅମୃତା ହସ୍ପିଟାଲରୁ ଏକ ଅଜବ ଘଟଣା ସାମ୍ନାକୁ ଆସିଛି । ଚିକିତ୍ସିତ ହେଉଥିବା ଜଣେ ୩୦ ବର୍ଷୀୟ ମହିଳାଙ୍କ ପେଟ ଭିତରୁ ଡାକ୍ତରମାନେ କେଶର ଏକ ଗଣ୍ଠି ପାଇଛନ୍ତି । ମହିଳାଙ୍କୁ ମାସ ମାସ ଧରି ଭୋକ ଲାଗୁନଥିଲା । ସେ ବାନ୍ତି ଏବଂ ବିଭିନ୍ନ ପାଚନ ଜନିତ ସମସ୍ୟାରେ ପୀଡିତ ଥିଲେ। ଏପରିକି ସେ କେତେକ ସମୟରେ ପ୍ରବଳ ପେଟ ଯନ୍ତ୍ରଣା ମଧ୍ୟ ଭୋଗୁଥିଲେ। ପାଚନ ପ୍ରକ୍ରିୟାରେ କୌଣସି ସମସ୍ୟା ଥିବା ଭାବୁଥିଲେ ମହିଳା । ଅଳ୍ପ ପରିମାଣରେ ଖାଇବା ପରେ ତାଙ୍କ ପେଟରେ ପୂରି ଯାଉଥିଲା ।

ଏପରିକି ତାଙ୍କର କିଛି ଖାଇବାକୁ ଇଚ୍ଛା ନଥିଲା । ପରିସ୍ଥିତି ଅସମ୍ଭାଳ ହେବା ପରେ ଶେଷରେ ସେ ଡାକ୍ତରଖାନାକୁ ଯାଇଥିଲେ । ପରୀକ୍ଷା କରିବା ପରେ ଡାକ୍ତରମାନେ ତାଙ୍କ ପେଟ ଭିତରେ ଏକ ବଡ଼ କେଶ ଗଣ୍ଠି ବା ଚୁଟି ଗୁଚ୍ଛା ପାଇଥିଲେ । ଯାହା ଡାକ୍ତରଙ୍କୁ ବି ପ୍ରଥମେ ଆଶ୍ଚର୍ଯ୍ୟ କରିଥିଲା । ଏହି ଖବର ସାମ୍ନାକୁ ଆସିବା ପରେ ସମସ୍ତଙ୍କ ମନରେ ଗୋଟିଏ ପ୍ରଶ୍ନ ଯେ ମହିଳାଙ୍କ ପେଟ ଭିତରକୁ ଚୁଟି କିପରି ଗଲା ?

• ପେଟ ଭିତରେ ମିଳିଲା ଗୁଚ୍ଛାଏ ଚୁଟି

ବିଶେଷଜ୍ଞମାନେ କହିଛନ୍ତି ଯେ ମହିଳାଙ୍କ ପେଟରେ ଚୁଟି ଗୁଚ୍ଛା ତାଙ୍କ ନିଜ ଯୋଗୁଁ ପହଞ୍ଚିଥିଲା । ପ୍ରକୃତରେ, ଏହା ଏକ ସାଧାରଣ ସମସ୍ୟା ନୁହେଁ ବରଂ ମାନସିକ ସ୍ୱାସ୍ଥ୍ୟର ଅବନତିର ଏକ ଘଟଣା । ଏହି ରୋଗକୁ 'ଟ୍ରାଇକୋଟିଲୋମାନିଆ' କୁହାଯାଏ, ଯେଉଁଥିରେ ଜଣେ ବ୍ୟକ୍ତି ନିଜର କେଶ ଛିଣ୍ଡାଇ ଦିଅନ୍ତି । ଯଦି ସେ ଛିଣ୍ଡେଇଥିବା ଚୁଟିକୁ ଖାଆନ୍ତି, ତେବେ ଏହି ଅବସ୍ଥାକୁ ଟ୍ରାଇକୋଫାଗିଆ କୁହାଯାଏ । ଏହି କ୍ଷେତ୍ରରେ ରୋଗୀ ନିଜ କେଶ ଖାଆନ୍ତି, କିନ୍ତୁ ପେଟ ଏହାକୁ ହଜମ କରିପାରେନାହିଁ । ତେଣୁ ବର୍ଷ ବର୍ଷ ଧରି ସେମାନେ ଖାଇଥିବା କେଶ ସେମାନଙ୍କ ପେଟରେ ଜମା ହୋଇ ଏକ ଗଣ୍ଠି ସୃଷ୍ଟି କରେ ।

• ରାପୁଞ୍ଜେଲ ସିଣ୍ଡ୍ରୋମରେ ପୀଡ଼ିତ ମହିଳା

ଡାକ୍ତରଙ୍କ କହିବା କଥା ହେଉଛି, ଏହି ଅବସ୍ଥାକୁ ରାପୁଞ୍ଜେଲ ସିଣ୍ଡ୍ରୋମ କୁହାଯାଏ । ଯେତେବେଳେ ଏହି ରୋଗ ହୁଏ, ସେତେବେଳେ ଚୁଟି ଗୁଚ୍ଛା ପେଟ ବାହାରକୁ ଅନ୍ତଃନଳୀ ପର୍ଯ୍ୟନ୍ତ ବ୍ୟାପିଯାଏ । ଯଦି ତୁରନ୍ତ ଚିକିତ୍ସା ନ କରାଯାଏ, ତେବେ ଏହି ଅବସ୍ଥା ଜୀବନ ପ୍ରତି ବିପଦ ସୃଷ୍ଟି କରିପାରେ । ଅମୃତା ହସ୍ପିଟାଲର ଗ୍ୟାଷ୍ଟ୍ରୋଇଣ୍ଟେଷ୍ଟାନାଲ୍ ସର୍ଜରୀ ବିଭାଗର ଡାକ୍ତର ସଲିମ୍ ନାୟକ, ଡାକ୍ତର ପୁନୀତ ଧର ଏବଂ ଡାକ୍ତର ଜୟା ଅଗ୍ରୱାଲ ଏହି ମହିଳାଙ୍କ ଚିକିତ୍ସା କରିଥିଲେ । ଅସ୍ତ୍ରୋପଚାର ପରେ ଡାକ୍ତରମାନେ ମହିଳାଙ୍କ ପେଟରୁ ବଡ଼ ଡ୍ରାଇ-କୋବେଜୋଆର ବା କେଶ ଗୁଚ୍ଛା ବାହାର କରିଥିଲେ ।

ପଢନ୍ତୁ ଏହି ଖବର: ଆଶ୍ଚର୍ଯ୍ୟ ! ୫ଦିନ ଧରି କଷ୍ଟ ସହିଲେ, ଜନ୍ମ କଲେ ୪ ଶିଶୁ

ସ୍ଵାସ୍ଥ୍ୟ ବିଶେଷଜ୍ଞମାନେ କହିଛନ୍ତି ଯେ ଏହା ଏକ ମାନସିକ ସ୍ୱାସ୍ଥ୍ୟ ସମସ୍ୟା । ଏଣୁ ପିତାମାତାମାନେ ସେମାନଙ୍କ ପିଲାମାନଙ୍କ ପ୍ରତି ବିଶେଷ ଧ୍ୟାନ ଦେବା ଉଚିତ । ଏହି ଅବସ୍ଥା ବହୁତ କମ୍ ଦେଖାଯାଏ, କିନ୍ତୁ ଯଦି କେହି ଏଥିରେ ଆକ୍ରାନ୍ତ ହୁଅନ୍ତି, ତେବେ ଏହା ଘାତକ ମଧ୍ୟ ହୋଇପାରେ । ନିକଟରେ ଉତ୍ତର ପ୍ରଦେଶର ଗୋରଖପୁରରେ ଏକ ୭ ବର୍ଷର ଝିଅ ସହିତ ଜଡ଼ିତ ଏକ ସମାନ ଘଟଣା ସାମ୍ନାକୁ ଆସିଥିଲା ।