ପୁଣି ମହଙ୍ଗା ହେଲା ଘରୋଇ ଗ୍ୟାସ୍ । କ୍ଷୀର, ପେଟ୍ରୋଲ, ଡିଜେଲ ଏବଂ CNG ପରେ, ଦେଶରେ ଘରୋଇ LPG ସିଲିଣ୍ଡରର ମୂଲ୍ୟ ମଧ୍ୟ ବୃଦ୍ଧି ପାଇଛି । ନ୍ୟୁଜ୍ ଏଜେନ୍ସି PTI ର ସୂଚନା ଅନୁସାରେ, ଗ୍ୟାସ୍‌ କମ୍ପାନୀଗୁଡ଼ିକ LPG ସିଲିଣ୍ଡରର ମୂଲ୍ୟ ୨୯ ଟଙ୍କା ବୃଦ୍ଧି କରିଛନ୍ତି, ଯାହା ଫଳରେ ଘରୋଇ ସିଲିଣ୍ଡରର ମୂଲ୍ୟ ୯୪୨ ଟଙ୍କାରେ ପହଞ୍ଚିଛି । ଏହି ବର୍ଦ୍ଧିତ ଦର ଆଜିଠାରୁ ସାରା ଦେଶରେ ଲାଗୁ ହେବ ।

ଦିଲ୍ଲୀ-NCRରେ ୧୪.୨ କିଲୋଗ୍ରାମ ଘରୋଇ LPG ଗ୍ୟାସ ସିଲିଣ୍ଡରର ମୂଲ୍ୟ ବର୍ତ୍ତମାନ ୯୪୨ ଟଙ୍କା ହୋଇଛି । ସେହିପରି ୫ କିଲୋଗ୍ରାମ ସିଲିଣ୍ଡରର ମୂଲ୍ୟ ୩୩୯ ଟଙ୍କା ଥିବା ବେଳେ ୧୯ କିଲୋଗ୍ରାମ ବାଣିଜ୍ୟିକ ସିଲିଣ୍ଡରର ମୂଲ୍ୟ ୩,୧୧୩ ଟଙ୍କା ରହିଛି ।

ତେବେ ପଶ୍ଚିମ ଏସିଆରେ ସଂଘର୍ଷ ଯୋଗୁଁ ବିଶ୍ୱ ଶକ୍ତି ଯୋଗାଣ ବାଧାପ୍ରାପ୍ତ ହୋଇଥିଲା ଏବଂ ଅନ୍ତର୍ଜାତୀୟ ଇନ୍ଧନ ମୂଲ୍ୟ ବୃଦ୍ଧି ପାଇଥିଲା । ଯାହାଫଳରେ ମାର୍ଚ୍ଚ ୭ରେ ଘରୋଇ ସିଲିଣ୍ଡର ପିଛା ମୂଲ୍ୟ ୬୦ ଟଙ୍କା ବୃଦ୍ଧି ପାଇଥିଲା ।

ଅଧିକ ପଢ଼ନ୍ତୁ: ରାସ୍ତାରେ ଅଳିଆ ଫିଙ୍ଗି ସୋସିଆଲ୍ ମିଡିଆରେ ହରାଇଲେ ଇଜ୍ଜତ, ପୁଣି ନିଜକୁ ଗୁଳି କରିଦେଲେ ଯୁବକ

ଜୁନ୍ ୧ ତାରିଖରେ ୧୯ କିଲୋଗ୍ରାମର ବାଣିଜ୍ୟିକ ଏଲପିଜି ସିଲିଣ୍ଡରର ମୂଲ୍ୟ ଯଥେଷ୍ଟ ବୃଦ୍ଧି ପାଇଥିଲା । ଦିଲ୍ଲୀରେ ବାଣିଜ୍ୟିକ ସିଲିଣ୍ଡର ୪୨ ଟଙ୍କା ମହଙ୍ଗା ହୋଇଥିଲା । ସେହିପରି ଛୋଟ ବ୍ୟବସାୟ ଏବଂ ନାଗରିକମାନଙ୍କ ଦ୍ୱାରା ବ୍ୟବହୃତ ୫ କିଲୋଗ୍ରାମର ଏଲପିଜି ସିଲିଣ୍ଡରର ମୂଲ୍ୟ ମଧ୍ୟ ୧୧ ବୃଦ୍ଧି ପାଇଥିଲା ।

ତୈଳ ମୂଲ୍ୟରେ ବ୍ୟାପକ ବୃଦ୍ଧି ମଧ୍ୟରେ ଏଲପିଜି ମୂଲ୍ୟ ମଧ୍ୟ ବଢ଼ିଛି । ମେ' ମାସଠାରୁ ପେଟ୍ରୋଲ ଏବଂ ଡିଜେଲ ମୂଲ୍ୟରେ ମୋଟ ୭.୫୦ ଟଙ୍କା ପ୍ରତି ଲିଟର ବୃଦ୍ଧି କରାଯାଇଛି । ସେହିପରି CNG ଦର କିଲୋଗ୍ରାମ ପ୍ରତି ପ୍ରାୟ ୬ ଟଙ୍କା ବୃଦ୍ଧି ପାଇଛି ।

ସେପଟେ ଏଲପିଜି ସିଲିଣ୍ଡରର ଯୋଗାଣ ସମ୍ପର୍କରେ, ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ଏକ ସରକାରୀ ବିବୃତ୍ତିରେ କହିଛି ଯେ ଯୋଗାଣ ସମ୍ପୂର୍ଣ୍ଣ ସ୍ୱାଭାବିକ ରହିଛି । ସଙ୍କଟ ସତ୍ତ୍ୱେ କୌଣସି ଖୁଚୁରା ଗ୍ୟାସ୍ ଏଜେନ୍ସି ଗ୍ୟାସ୍ ଅଭାବ ରିପୋର୍ଟ କରିନାହାନ୍ତି । ମନ୍ତ୍ରଣାଳୟ ଏହା ମଧ୍ୟ କହିଛି ଯେ ଏଲପିଜି ସିଲିଣ୍ଡରର ଗଚ୍ଛିତ ଏବଂ କଳାବଜାରୀ ରୋକିବା ପାଇଁ ସାରା ଦେଶରେ ନିରନ୍ତର କାର୍ଯ୍ୟାନୁଷ୍ଠାନ ଚାଲିଛି ।