ଆତ୍ମନିର୍ଭର ଦିଗରେ ଡିଆରଡ଼ିଓର ବଡ଼ ପଦକ୍ଷେପ
ଅର୍ଗସ ବ୍ୟୁରୋ : ଆତ୍ମନିର୍ଭର ଦିଗରେ ଡିଆରଡ଼ିଓର ବଡ଼ ପଦକ୍ଷେପ । ଭାରତୀୟ ସେନା ପାଇଁ ପ୍ରସ୍ତୁତ ହେଉଛି ଦେଶୀ ଷ୍ଟେଲ୍ଥ ଡ୍ରୋନ୍ ଘାତକ । ଯାହାର ସଫଳ ପରୀକ୍ଷା କରିଛି ଡିଆରଡ଼ିଓ । ଏହା ଏକ ଚାଳକ ବିହିନ ଡ୍ରୋନ ହୋଇଥିବା ବେଳେ କ୍ଷିପ୍ର ଗତିରେ ଶତ୍ରୁ ଉପରେ ଆକ୍ରମଣ କରିବାରେ ସକ୍ଷମ । ଏହି ଡ୍ରୋନ୍ ଟେକ୍ନୋଲୋଜି ଭାରତକୁ ଦେବା ପାଇଁ ମନା କରି ଦେଇଥିଲା ଆମେରିକା । କିନ୍ତୁ ଏବେ ସ୍ବଦେଶୀ ଜ୍ଞାନ କୌଶଳରେ ଏହି ଡ୍ରୋନ ନିର୍ମାଣ କରିବାରେ ସଫଳ ହୋଇଛି ଡିଆରଡ଼ିଓ ।
ଅଧିକ ପଢନ୍ତୁ ଭାରତ ଖବର
୨୦୨୨ ଜୁଲାଇ ୧ରେ ଏହାର ପ୍ରଥମ ପରୀକ୍ଷଣ କରାଯାଇଥିଲା । ଆଜି ପୁଣି ଥରେ ଏହାର ସଫଳ ପରୀକ୍ଷଣ କରିଛି ଡିଆରଡ଼ିଓ । କର୍ଣ୍ଣାଟକରେ ଏହି ଅଟୋନୋମସ ଫ୍ଲାଇଁ ୱିଙ୍ଗ୍ ଡେମୋନଷ୍ଟ୍ରେଟରର ସଫଳ ପରୀକ୍ଷଣ କରାଯାଇଛି । ଆମେରିକାର B-2 ବମ୍ବର ବିମାନ ଭଳି ଦିଶୁଥିବା ଏହି ଡ୍ରୋନ୍ ସମ୍ପୂର୍ଣ୍ଣ ଭାବେ ସ୍ବୟଂଚାଳିତ । ଏହା ନିଜେ ଟେକ୍ ଓଭର କରିବା ସହ ମିଶନ ପୂରା କରି ଆପେ ଆପେ ଲ୍ୟାଣ୍ଡିଂ କରିବାରେ ସକ୍ଷମ । ଏହି ଡ୍ରୋନ୍ ଭବିଷ୍ୟତରେ ଭାରତର ପ୍ରତିରକ୍ଷାକୁ ଅଧିକ ମଜଭୁତ କରିବା ସହ ଗେମ୍ ଚେଞ୍ଜର ହେବ । ଚୀନ ଓ ପାକିସ୍ତାନକୁ ଡୋମିନେଣ୍ଟ କରିବା ସହ ଆତଙ୍କବାଦୀଙ୍କ ପାଇଁ କାଳ ହେବ ଏହି ସ୍ବଦେଶୀ ଷ୍ଟେଲ୍ଥ ଡ୍ରୋନ୍ ଘାତକ ।
