ଶୁକ୍ରବାର ତେଲେଙ୍ଗାନାର କୁର୍ଣ୍ଣୁଲରେ ହୋଇଥିବା ବସ୍‌ ଦୁର୍ଘଟଣା ସମସ୍ତଙ୍କୁ ଚକିତ କରିଛି । ଏହି ମର୍ମନ୍ତୁଦ ସଡ଼କ ଦୁର୍ଘଟଣାରେ ୨୦ ଜଣ ନିରୀହ ଲୋକ ମୃତ୍ୟୁବରଣ କରିଥିଲେ । ତେବେ ଏହି ଘଟଣାକୁ ନେଇ ହାଇଦ୍ରାବାଦ ପୋଲିସ୍‌ କମିଶନର ଭିସି ସଜ୍ଜନାର ଏକ ବଡ଼ ବୟାନ ଦେଇଛନ୍ତି । ସେ କହିଛନ୍ତି ମଦ୍ୟପ ଗାଡ଼ି ଚାଳକମାନେ ଆତଙ୍କବାଦୀ ଏବଂ ସେମାନଙ୍କ କାର୍ଯ୍ୟ ରାସ୍ତାରେ କୌଣସି ଆତଙ୍କଠାରୁ କମ୍ ନୁହେଁ । କମିଶନର କହିଛନ୍ତି ଯେ ଏହା କୌଣସି ସାଧାରଣ ସଡ଼କ ଦୁର୍ଘଟଣା ନୁହେଁ ବରଂ ମଦ୍ୟପ ବାଇକ୍ ଚାଳକଙ୍କ ଅବହେଳା ଏବଂ ସମ୍ବେଦନହୀନତା ଯୋଗୁଁ ଘଟିଥିବା ଏକ ଦୁଃଖଦ ଘଟଣା । ଯାହାକୁ ଏଡାଯାଇପାରିଥାନ୍ତା ବୋଲି ସେ କହିଛନ୍ତି ।

ସେ କହିଛନ୍ତି, "ଦୁର୍ଘଟଣା ସମୟରେ ଆରୋହୀ ବି. ଶିବ ଶଙ୍କର ମଦ୍ୟପାନ କରିଥିଲେ । ସିସିଟିଭି ଫୁଟେଜରେ ସେ ରାତି ୨:୨୪ରେ ତାଙ୍କ ବାଇକ୍‌ରେ ପେଟ୍ରୋଲ ଭର୍ତ୍ତି କରୁଥିବାର ଦେଖିବାକୁ ମିଳିଥିଲା । ଏହାର କିଛି ମିନିଟ୍‌ ପରେ ଅର୍ଥାତ ରାତି ପ୍ରାୟ ୨.୩୯ ସମୟରେ ସେ ନିୟନ୍ତ୍ରଣ ହରାଇ ବସ୍‌ ସହ ଗାଡ଼ି ଧକ୍କା କରିଥିଲେ ।

କମିଶନର କହିଛନ୍ତି ଯେ ମଦ୍ୟପାନ କରି ଗାଡ଼ି ଚଳାଇବା ଯୋଗୁଁ ଆଜି ଏଭଳି ଏକ ଭୟଙ୍କର ଦୁର୍ଘଟଣା ଘଟିଛି । ସଜ୍ଜନାର ପୁଣି କହିଛନ୍ତି, "ମୁଁ ମୋର ବକ୍ତବ୍ୟରେ ଅଟଳ ଯେ ମଦ୍ୟପ ଚାଳକମାନେ ପ୍ରକୃତରେ ଆତଙ୍କବାଦୀ । ଏହି ଲୋକମାନେ ଜୀବନ, ​​ପରିବାର ଏବଂ ଭବିଷ୍ୟତକୁ ନଷ୍ଟ କରିଦିଅନ୍ତି । ଏପରି କାର୍ଯ୍ୟକୁ କେବେବି ବରଦାସ୍ତ କରାଯିବ ନାହିଁ ।"

ଅଧିକ ପଢ଼ନ୍ତୁ: ଭାରତୀୟ ସୀମାରେ ଛିଡ଼ା ହେଲାଣି ଯୁଦ୍ଧ ଟ୍ୟାଙ୍କ, ଆକାଶରେ ଗର୍ଜନ କଲାଣି ଫାଇଟର ଜେଟ୍ !

ସେହିପରି ସେ ଆହୁରି କହିଛନ୍ତି, ହାଇଦ୍ରାବାଦରେ ମଦ୍ୟପାନ କରି ଗାଡି ଚାଳନା ବିରୋଧରେ ଶୂନ୍ୟ ସହନଶୀଳତା ନୀତି କାର୍ଯ୍ୟକାରୀ କରାଯାଇଛି । ମଦ୍ୟପାନ କରି ଗାଡ଼ି ଚାଳନା କରୁଥିବା ଯେକୌଣସି ବ୍ୟକ୍ତିଙ୍କ ବିରୋଧରେ ଆଇନ ଅନୁଯାୟୀ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏହା ସହ ସେ ଜନସାଧାରଣଙ୍କୁ ନିବେଦନ କରି କହିଥିଲେ ଯେ ମଦ୍ୟପାନ କରି ଗାଡି ଚାଳନା ଆଉ ଏକ ଭୁଲ ନୁହେଁ ବରଂ ଏକ ଗମ୍ଭୀର ଅପରାଧ ।

ସୂଚନା ଅନୁସାରେ, ଶୁକ୍ରବାର ବେଙ୍ଗାଲୁରୁ-ହାଇଦ୍ରାବାଦ ରାଜପଥରେ କାବେରୀ ଟ୍ରାଭେଲ୍ସର ଏକ ବସ୍ ଏକ ମୋଟର ସାଇକେଲ ସହିତ ଧକ୍କା ହୋଇଥିଲା । ଆଉ ଏହା ପରେ ହିଁ ବସ୍‌ଟିରେ ନିଆଁ ଲାଗିଯାଇଥିଲା । ଖବର ପାଇ ପ୍ରଥମେ ସ୍ଥାନୀୟ ଲୋକ ଓ ପୋଲିସ୍ ଉଦ୍ଧାର କାର୍ଯ୍ୟ କରିଥିଲା । ପରେ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା । ତେବେ ପୋଲିସ୍ ରିପୋର୍ଟ ଅନୁସାରେ ଦୁର୍ଘଟଣା ସମୟରେ ବସ୍‌ରେ ଡ୍ରାଇଭର ଓ ହେଲପରଙ୍କ ସମେତ ମୋଟ ୪୨ ଜଣ ଯାତ୍ରୀ ଥିଲେ । ତେବେ ଏହି ଦୁର୍ଘଟଣାରେ ୨୦ ଜଣ ଯାତ୍ରୀଙ୍କ ମୃତ୍ୟୁ ହୋଇଥିଲା ।