ନୂଆଦିଲ୍ଲୀ: ଘର ସଫା କରିବା ସମୟରେ ପ୍ରାୟତଃ ଲୋକେ ପୁରୁଣା ସାମଗ୍ରୀ ବାହାର କରି ଫିଙ୍ଗି ଦିଅନ୍ତି । ଆଉ ସେହି ଅଳିଆ ଆବର୍ଜନା ଭିତରେ ଯଦି ଆପଣଙ୍କ କୌଣସି ମୂଲ୍ୟବାନ ସାମଗ୍ରୀ ଚାଲିଯାଏ ତାହାଲେ ? ଫରିଦାବାଦରେ ଏମିତି ହୋଇଛି ।

ଗୋଟିଏ ପରିବାର ଅଜାଣତରେ ୧୫ ଲକ୍ଷର ସୁନା ଗହଣାକୁ ଅଳିଆ ଭାବି କବାଡ଼ି ୱାଲାକୁ ବିକି ଦେଇଥିଲେ । କିନ୍ତୁ ୪ ମାସ ପରେ କବାଡ଼ି ୱାଲା ଯାହା କଲେ, ତାହା ସମସ୍ତଙ୍କ ହୃଦୟ ଜିତିନେଲା ।

ଏଥିସହ ପଢ଼ନ୍ତୁ: ବିବାହ ଋତୁରେ ଜାଣିନିଅନ୍ତୁ ଆପଣଙ୍କ ସହରରେ ଆଜି କେତେ ରହିଛି ସୁନା ରୁପା ଦର...?

ଆଜିର ଦିନରେ ଯେଉଁଠି ଚୋରି, ଠକେଇ ଓ ଲୋଭ ମଣିଷକୁ ଅଟକାଇ ପାରୁନାହିଁ । ସେଠି ଫରିଦାବାଦରୁ ଆସିଛି ମଣିଷପଣିଆର କାହାଣୀ । ଯାହା ଭରସାକୁ ପୁଣି ଜୀବିତ କରିଛି । ଅଳିଆ କିଣୁଥିବା ମଣିଷ ହାଜି ଅଖତର ହିରୋ ପାଲଟିଛନ୍ତି ।

ଅଳିଆ ଅଖାରେ ସୁନା ରଖି କବାଡ଼ି ୱାଲାକୁ ବିକ୍ରି କରିଥିବା ଅଶୋକ ଶର୍ମା କହିଛନ୍ତି, "ଗତବର୍ଷ ଜାନୁଆରୀରେ ତାଙ୍କ ପରିବାର କୁମ୍ଭ ସ୍ନାନ ପାଇଁ ଯାଇଥିଲେ । ଚୋରି ଡରରେ ଘର ଲୋକ ସମସ୍ତ ଗହଣାକୁ ସୁରକ୍ଷିତ ରଖିବା ଲାଗି ଏକ ଡବାରେ ଭର୍ତ୍ତି କରି ଅଖା ଭିତରେ ରକି ଦେଇଥିଲେ ।"

ସେତେବେଳେ ସମସ୍ତେ ଭାବିଥିଲେ ଅଖା ଭିତରେ ଗହଣା ସୁରକ୍ଷିତ ରହିବ । କାହାକୁ କୌଣସି ସନ୍ଦେହ ହେବ ନାହିଁ । କିନ୍ତୁ ଅଶୋକଙ୍କ ପରିବାରର ଭାଗ୍ୟରେ ଅନ୍ୟ କିଛି ଥିଲା । ସମୟ ଗଡ଼ି ଚାଲିଲା, କୁମ୍ଭ ସ୍ନାନ ସାରି ପରିବାର ଫେରିଲେ, ସବୁକିଛି ସ୍ଵାଭାବିକ ଥିଲା... ପୁଣି ଆସିଲା ଦୀପାବଳି ।

ଛୋଟିଆ ଭୁଲ୍‌ରୁ ବଡ଼ କ୍ଷତି

ଦୀପାବଳିରେ ଘର ସଫା କରିବା ବେଳେ ପୁରୁଣା ଅବ୍ୟବହୃତ ସାମଗ୍ରୀକୁ ଘର ଲୋକ ଅଲଗା କରିଥିଲେ । ସେହି ସମୟରେ ଡବାରେ ସୁନା ରଖିଥିବା ଅଖାଟିକୁ ଅଳିଆ ଭାବି ନେଇଥିଲେ ଘର ଲୋକ । ଅଖା ଭିତରେ କ'ଣ ଅଛି ନଦେଖି ଅଦରକାରୀ ଭାବି କବାଡ଼ି ୱାଲାକୁ ଦେଇ ଦେଇଥିଲେ । କେହି ବି ମନେ ରଖି ନଥିଲେ ଉକ୍ତ ଅଖାରେ ୧୦୦ ଗ୍ରାମ୍ ସୁନା ଗହଣା ଅଛି, ଯାହାର ମୂଲ୍ୟ ପ୍ରାୟ ୧୫ ଲକ୍ଷ ଟଙ୍କା ।

ଦୀପାବଳି ପୂଜା ସମୟରେ ପରିବାର ଲୋକଙ୍କ ମନେ ପଡ଼ିଥିଲା ସୁନା ଗହଣା କଥା । ଏହାପରେ ସମସ୍ତଙ୍କ ପାଦ ତଳୁ ମାଟି ଖସି ଯାଇଥିଲା । ଅଶୋକ ଶର୍ମା ସଙ୍ଗେ ସଙ୍ଗେ କୱାଡ଼ି ୱାଲା ପାଖକୁ ଯାଇ ଖୋଜାଖୋଜି କରିଥିଲେ । କିନ୍ତୁ ସେତେବେଳେ ସୁନା ମିଳି ନଥିଲା । ଅଶୋକ ଭାରି ମନରେ ନିରାଶ ହୋଇ ଘରକୁ ଫେରିଥିଲେ । ସମସ୍ତ ଆଶା ମଳିନ ପଡ଼ି ଯାଇଥିଲା ।

ଏହା ପରେ ୪ ମାସ ବିତଗଲା । ସମସ୍ତେ ସୁନା କଥା ଭୁଲି ଯାଇଥିବା ବେଳେ ପୁଣି ଗୋଟିଏ ଦିନ କବାଡ଼ି ୱାଲା ହାଜି ଅଖତର ଖାନ ତାଙ୍କ ଗୋଦାମରେ ଏକ ପ୍ୟାକେଟ୍ ଦେଖନ୍ତି । ଆଉ ପ୍ଯାକେଟ୍ ଖୋଲିଲା ବେଳକୁ ସୁନା ଗହଣା ମିଳେ, ଯାହାକୁ ମାସାଧିକ ଆଗରୁ ଅଶୋକ ବିକ୍ରି କରିଥିଲେ ।

ଏଥିସହ ପଢ଼ନ୍ତୁ: ପୁଲିସ ନିକଟରେ ବୟାନ ଅଦାଲତରେ ସାକ୍ଷ୍ୟ ଭାବେ ଗ୍ରହଣୀୟ ନୁହେଁ: ହାଇକୋର୍ଟ

ମଣିଷପଣିଆ ଦେଖାଇଲେ ହାଜି

ଏତେ ପରିମାଣର ସୁନା ପାଇବା ପରେ କବାଡ଼ି ୱାଲା ହାଜି ଅଖତରଙ୍କ ମନରେ ଲୋଭ ଆସି ନଥିଲା । ମଣିଷପଣିଆ ଦେଖାଇ ସେ ପୋଲିସକୁ ସମ୍ପର୍କ କରି ଏସ୍‌ପି ଅଫିସ୍‌ରେ ପହଞ୍ଚିଥିଲେ । ସେଠାକୁ ଅଶୋକ ଶର୍ମାଙ୍କ ପରିବାରକୁ ଡାକି ସୁନା ଗହଣା ଫେରାଇଥିଲେ । ଅଜାଣତରେ ବିକିଥିବା ସୁନା ଫେରି ପାଇ ଖୁସିରେ ଝୁମି ଉଠିଥିଲେ ଅଶୋକଙ୍କ ପରିବାର ।

କବାଡ଼ି ୱାଲା ହାଜି ଅଖତର ଖାନ କହିଛନ୍ତି, "ଯେତେବେଳେ ମୋତେ ସୁନା ମିଳିଲା ତ ମୁଁ ଭାବିଲି ଏହା କାହାର ପରିଶ୍ରମର ଫଳ । ଏହାକୁ ପ୍ରକୃତ ମାଲିକଙ୍କ ପାଖରେ ପହଞ୍ଚାଇବା ମୋର କର୍ତ୍ତବ୍ୟ । ମୋ ପରିବାର ମଧ୍ୟ ମୋ ସାଥ୍ ଦେଇଥିଲେ ।"