ଜିଏସଟି ସରଳୀକରଣ ପାଇଁ ନୂଆଦିଲ୍ଲୀରେ ଗୁରୁତ୍ବପୂର୍ଣ୍ଣ ଜିଏସଟି ପରିଷଦ ବୈଠକ । ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଆଲୋଚନା । ସ୍ବାଧୀନତା ଦିବସରେ ଲାଲକିଲ୍ଲାରୁ ପିଏମ୍ ମୋଦି ବଡ଼ ଘୋଷଣା କରି କହିଥିଲେ ଦୀପାବଳିରେ ଦେଶବାସୀଙ୍କୁ ମିଳିବ ବଡ଼ ଭେଟି । ଆଉ ଏବେ ଆରମ୍ଭ ହୋଇଯାଇଛି ତାର ପ୍ରସ୍ତୁତି। ବ୍ୟବସାୟୀ, ଉଦ୍ୟୋଗୀ ଓ ସାଧାରଣ ଜନତାଙ୍କ ବଡ଼ ଆଶା ରହିଛି । ଆସନ୍ତାକାଲି ନୂଆ ପ୍ରସ୍ତାବ ଉପରେ ବାଜିବ ମୋହର ।

କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ୫୬ତମ ଜିଏସଟି କାଉନସିଲ ବୈଠକରେ ନୂଆ GST ସ୍ଲାବକୁ ନେଇ କରାଯାଇଛି ଆଲୋଚନା । ଆସନ୍ତାକାଲି ନୂଆ ପ୍ରସ୍ତାବ ଉପରେ ମୋହର ବାଜିବ। ଦ୍ରବ୍ୟ ଓ ସେବା କର ପ୍ରକ୍ରିୟାକୁ ସରଳ କରିବାକୁ ବଡ଼ ପଦକ୍ଷେପ ନେଇଛନ୍ତି କେନ୍ଦ୍ର ସରକାର । ପୂର୍ବରୁ ଜିଏସଟିରେ ଥିବା ୪ଟି ସ୍ଲାବକୁ ହଟାଯାଇ ଦୁଇଟି ସ୍ଲାବ ରଖାଯିବ । ଯେଉଁ ଦ୍ରବ୍ୟ ଉପରେ ୨୮% ଜିଏସଟି ଲାଗୁ କରାଯାଇଛି ତାକୁ ୧୮%କୁ ହ୍ରାସ କରାଯାଇପାରେ ।

ଏହାସହ ପଢ଼ନ୍ତୁ:- ରିଲିଜ୍ ପାଇଁ ମମତାଙ୍କୁ 'ହାତ ଯୋଡ଼ି' ନେହୁରା ହେଲେ ବିବେକ ଅଗ୍ନିହୋତ୍ରୀ

ସେହିପିର ୧୮% ଜିଏସଟି ଲାଗୁ ହେଉଥିବା ସାମଗ୍ରୀ ଉପରେ ୧୨% କିମ୍ବା ୫% ଜିଏସଟି ଲାଗୁ ହୋଇପାରେ । ଟିଭି, ଏସି, ଫ୍ରିଜ, ୱାଂଶି ମେସିନ, ସିମେଣ୍ଟ ଶସ୍ତା ହୋଇପାରେ । କପଡ଼ା, ପୋଷାକ, ଜୋତା, ଚପଲ, ଷ୍ଟେସନାରୀ ଆଇଟମ୍, ଘରକରଣା ଜିନିଷ ଦାମ ବି କମିପାରେ । ଦୁଇ ଚକିଆ ଯାନ, କାର, ଘର ନିର୍ମାଣ ସାମଗ୍ରୀର ମୂଲ୍ୟରେ ହୋଇପାରେ ହ୍ରାସ। ନିତ୍ୟ ବ୍ୟବହାର୍ଯ୍ୟ ସାମଗ୍ରୀ, ଫଳ ଜୁସ, ଆଇସକ୍ରିମ୍, ପନିର, ପିଜା ଉପରୁ ଜିଏସଟି ୫%କୁ କମିପାରେ । ନବୀକରଣ ଯୋଗ୍ୟ ଇନ୍ଧନକୁ ପ୍ରୋତ୍ସାହନ ଦେବାକୁ ସୌରଶକ୍ତି ଚାଳିତ ସାମଗ୍ରୀ ଉପରେ ଜିଏସଟି ୫%କୁ ଖସିପାରେ । ଏନେଇ ନୂଆଦିଲ୍ଲୀରେ ୨ ଦିନିଆ ବୈଠକରେ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ କେନ୍ଦ୍ର ଅର୍ଥମନ୍ତ୍ରୀଙ୍କ ଆଲୋଚନା ।

ଅନ୍ୟପଟେ ତମାଖୁ ଓ ଦାମୀ ଅଟୋମୋବାଇଲ ଉପରେ ୪୦% ଜିଏସଟି ଲାଗିପାରେ । ପେଟ୍ରୋଲିୟମ ଉତ୍ପାଦଗୁଡ଼ିକୁ ପୂର୍ବପରି ଜିଏସଟି ସ୍ଲାବର ନୂତନ ବ୍ୟବସ୍ଥାରୁ ବାହାରେ ରଖାଯାଇପାରେ । ଯାହା ମଧ୍ୟବିତ୍ତ ପରିବାରକୁ ବଡ଼ ଫାଇଦା ଦେବ। ଅଟୋମୋବାଇଲ୍, ୧୨ଶହ ସିସିରୁ କମ୍ ସାଧାରଣ କାର, ୩୫୦ ସିସିରୁ କମ୍ ମୋଟର ସାଇକେଲ, ଅଟୋପାର୍ଟସ ଉପରୁ ଜିଏସଟି ୨୮%ରୁ ୧୮ %କୁ କମିପାରେ ।

ହୋଟେଲ ବିଲ୍ ଓ ଫିଲ୍ମ ଟିକେଟ ଉପରେ ଜିଏସଟି ୧୨ ପ୍ରତିଶତରୁ ୫%କୁ କମିପାରେ । କ୍ୟାନସର ଔଷଧ ଉପରୁ ଜିଏସଟି ଛାଡ ହୋଇପାରେ। ଔଷଧ ଓ ଅନ୍ୟ ମେଡିକାଲ ସାମଗ୍ରୀ ଉପରେ ଜିଏସଟି ୧୨ରୁ ୫%କୁ କମିପାରେ । ଗୁରୁତ୍ବପୂର୍ଣ୍ଣ ସ୍ୱାସ୍ଥ୍ୟ ଓ ଜୀବନ ବୀମା ପ୍ରିମିୟମରୁ ହଟିପାରେ ଜିଏସଟି। ପ୍ରସାଧନ ସାମଗ୍ରୀ, ଗୁଟଖା ଓ ମାଦକ ଦ୍ରବ୍ୟ ହୋଇପାରେ ମହଙ୍ଗା। ଏଗୁଡିକରେ ୪୦ ପ୍ରତିଶତ ଜିଏସଟି ଲାଗୁ ହୋଇପାରେ। ୨୫ଶହ ଟଙ୍କାରୁ ଅଧିକ ମୂଲ୍ୟର ପୋଷାକ ଉପରେ ଜିଏସଟି ୧୨ରୁ ୧୮ ପ୍ରତିଶତକୁ ବଢିପାରେ । ସେପଟେ ଜିଏସଟି ପରିବର୍ତ୍ତନ ପରେ ହେବାକୁ ଥିବା ରାଜସ୍ବ ଭରଣା ପାଇଁ ଦାବି କରିଛନ୍ତି ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀ ।

ଏହାସହ ପଢ଼ନ୍ତୁ:- ଦୁନିଆର ସବୁଠାରୁ ଶକ୍ତିଶାଳି ରାଷ୍ଟ୍ର, BRICSକୁ ଦେଖି ଥରିଲାଣି !

ଯେତେବେଳ ଭାରତ ପ୍ରତି ବଡ଼ ଚ୍ୟାଲେଂଜ ଆସିଛି ସେତେବେଳେ ତାହାର କଡ଼ା ମୁକାବିଲା କରାଯାଇଛି । ପୂର୍ବତନ ଆମେରିକା ରାଷ୍ଟ୍ରପତି ରିଚାର୍ଡ ନିକ୍ସନ ଖାଦ୍ୟ ଯୋଗାଣ ବନ୍ଦ କରିଦେବା ପରେ ଷାଠିଏ ଦଶକରେ ଭାରତରେ ଆରମ୍ଭ ହୋଇଥିଲା ଗ୍ରୀନ୍ ରିଭୋଲ୍ୟୁସନ୍ ବା ସବୁଜ ବିପ୍ଳବ । ଖାଦ୍ୟ ଶସ୍ୟ କ୍ଷେତ୍ରରେ ଆତ୍ମନିର୍ଭର ହୋଇଥିଲା ଭାରତ । ଠିକ୍ ସେହିପରି ଟ୍ରମ୍ପଙ୍କ ଟାରିଫ୍ ଓ୍ବାରର ମୁକାବିଲା ପାଇଁ ଜିଏସଟିରେ ବଡ଼ ପରିବର୍ତ୍ତନ ଅଣାଯାଇ କ୍ଷୁଦ୍ର ଓ ଲଘୁ ଉଦ୍ୟୋଗୀଙ୍କୁ ପ୍ରୋତ୍ସାହନ ସହ ବିକଶିତ ଭାରତ ଓ ସମୃଦ୍ଧ ଭାରତ ପାଇଁ ଲକ୍ଷ୍ୟ ରଖିଛନ୍ତି ପିଏମ୍ ମୋଦି ।

Argus News | argus news | -Argusnews Home: Odisha Latest News, Breaking News, Trending News, Live TV and more