ପୁଣି ଚର୍ଚ୍ଚାରେ ଜଗଦୀପ ଧନଖଡ଼, ପେନସନ୍ ପାଇଁ କଲେ ଆବେଦନ
ପୁଣି ଚର୍ଚ୍ଚାରେ ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ଼ । ଉପରାଷ୍ଟ୍ରପତି ପଦରୁ ଅଚାନକ ଇସ୍ତଫା ଦେବା ପରେ ସେ ଏବେ ପେନସନ୍ ପାଇଁ ଆବେଦନ କରିଥିବା ସୂଚନା ମିଳିଛି । ରାଜସ୍ଥାନ ବିଧାନସଭାରେ ସେ ପେନସନ୍ ପାଇ ଆବେଦନ କରିଛନ୍ତି । କାହିଁକି ନା ଜଗଦୀପ ଧନଖଡ଼, ୧୯୯୩ ମସିହାରେ କଂଗ୍ରେସ ଟିକଟରେ କିଶନଗଡ଼ ଆସନରୁ ବିଧାୟକ ଭାବେ ନିର୍ବାଚିତ ହୋଇଥିଲେ । ସେ ପୂର୍ବରୁ ବିଧାୟକ ଥିବା ଏବେ ପେନସନ୍ ପାଇଁ ଆବେଦନ କରିଥିବା ଜଣାପଡ଼ିଛି ।

ନିୟମ ଅନୁଯାୟୀ, ଜଗଦୀପ ଧନଖଡ଼ ରାଜସ୍ଥାନ ବିଧାନସଭାରୁ ପ୍ରାୟ ୪୨ ହଜାର ଟଙ୍କା ମାସିକ ପେନସନ ପାଇବେ । ରାଜସ୍ଥାନରେ ନେତାମାନଙ୍କ ପାଇଁ ଦୁଇଗୁଣ ଏବଂ ତିନିଗୁଣ ପେନସନର ବ୍ୟବସ୍ଥା ରହିଛି । ଅର୍ଥାତ୍ ଯଦି ଜଣେ ବ୍ୟକ୍ତି ସାଂସଦ ଏବଂ ବିଧାୟକ ଉଭୟ ହୋଇଥିବେ, ତେବେ ସେ ଉଭୟ ପଦବୀ ପାଇଁ ଅଲଗା ଅଲଗା ପେନସନ ପାଇପାରିବେ। ଏହି କାରଣରୁ ଅନେକ ପୂର୍ବତନ ନେତା ଏକକାଳୀନ ବିଭିନ୍ନ ପଦବୀ ପାଇଁ ପେନସନ ପାଉଛନ୍ତି ।

ସେପଟେ ରାଜସ୍ଥାନ ବିଧାନସଭା ବାଚସ୍ପତି ବାସୁଦେବ ଦେବନାନି ସ୍ପଷ୍ଟ କରିଛନ୍ତି ଯେ, ଧନଖଡ଼ଙ୍କ ପେନସନ ପାଇଁ ଆବେଦନ କରିଛନ୍ତି । ତାଙ୍କ ଆବେଦନକୁ ବିଧାନସଭା ଗ୍ରହଣ କରିଛି ଏବଂ ପ୍ରକ୍ରିୟା ଆରମ୍ଭ ହୋଇଯାଇଛି ବୋଲି ସେ କହିଛନ୍ତି ।

ସୂଚନା ଅନୁସାରେ, ଜଗଦୀପ ଧନଖଡ଼ ନିକଟରେ ହଠାତ୍ ଉପରାଷ୍ଟ୍ରପତି ପଦରୁ ଇସ୍ତଫା ଦେଇଥିଲେ। ୨୧ ଜୁଲାଇରେ ସେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଏକ ଚିଠି ଲେଖି ଇସ୍ତଫା ବିଷୟରେ ଜଣାଇଥିଲେ। ତାଙ୍କ ଚିଠିରେ ସେ ଇସ୍ତଫାର କାରଣ ସ୍ୱାସ୍ଥ୍ୟ ବୋଲି ଦର୍ଶାଇଥିଲେ । କାର୍ଯ୍ୟକାଳ ବାକି ଥିବା ବେଳେ ହଠାତ୍ ଉପରାଷ୍ଟ୍ରପତି ପଦରୁ ଇସ୍ତଫା ଦେବା ପରେ ରାଜନୀତି ସରଗରମ ହୋଇଥିଲା ।