Free LPG Cylinder / ଦୀପାବଳିରେ ମାଗଣା LPG ସିଲିଣ୍ଡର ! ଜାଣନ୍ତୁ କେଉଁମାନେ ପାଇବେ ଏହି ସୁବିଧା...

ଦୀପାବଳି ପୂର୍ବରୁ ଗୃହିଣୀଙ୍କ ପାଇଁ ଖସି ଖବର । ମହଙ୍ଗା ଗ୍ୟାସ୍ ଦର ମଧ୍ୟରେ ଦିଲ୍ଲୀ ଏବଂ ଉତ୍ତରପ୍ରଦେଶ ସରକାରଙ୍କ ପକ୍ଷରୁ ଯୋଗ୍ୟ ପରିବାରଙ୍କୁ ମିଳିବ ମାଗଣା ଗ୍ୟାସ୍ ସିଲିଣ୍ଡରର ସୁବିଧା । ଏହା ଦ୍ୱାରା ଦୀପାବଳି ଭଳି ବଡ଼ ପର୍ବରେ ଗରିବ ଓ ମଧ୍ୟବିତ୍ତ ପରିବାରଙ୍କ ଘରୋଇ ବଜେଟ୍‌କୁ ମିଳିପାରେ ବଡ଼ ଆଶ୍ୱସ୍ତି ।

ଦିଲ୍ଲୀରେ କାହାକୁ ମିଳିବ ଲାଭ ?

ଦିଲ୍ଲୀ ସରକାରଙ୍କ ଘୋଷଣା ଅନୁସାରେ, ରାସନ କାର୍ଡଧାରୀ ପରିବାର ଏହି ସୁବିଧାର ଲାଭ ପାଇପାରିବେ । ଦିଲ୍ଲୀର ଯେଉଁ ପରିବାର ପାଖରେ ବୈଧ ରାସନ କାର୍ଡ ରହିଛି, ସେମାନେ ଏହି ଯୋଜନାର ଲାଭ ଉଠାଇ ପାରିବେ । ଏହାର ଆଉ ଏକ ବିଶେଷ କଥା ହେଉଛି, କେବଳ LPG ସିଲିଣ୍ଡର ବ୍ୟବହାର କରୁଥିବା ପରିବାର ନୁହେଁ, PNG କନେକ୍ସନ ଥିବା ରାସନ କାର୍ଡଧାରୀଙ୍କୁ ମଧ୍ୟ ବର୍ଷକୁ ଦୁଇଥର ଆର୍ଥିକ ସହାୟତା ମିଳିବ । ଦୀପାବଳି ଏବଂ ହୋଲି ସମୟରେ ଏହି ସହାୟତା ଦିଆଯିବ ।

ଉତ୍ତରପ୍ରଦେଶରେ ଉଜ୍ଜ୍ୱଳା ହିତାଧିକାରୀଙ୍କୁ ମାଗଣା ସିଲିଣ୍ଡର

ଉତ୍ତରପ୍ରଦେଶରେ ଯୋଗୀ ସରକାରଙ୍କ ପକ୍ଷରୁ ମାଗଣା LPG ରିଫିଲ୍ ଯୋଜନା ଚାଲିଆସୁଛି । ଏହି ଯୋଜନା ଅନୁସାରେ ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନାର ସମସ୍ତ ଯୋଗ୍ୟ ହିତାଧିକାରୀ ଦୀପାବଳି ସମୟରେ ଗୋଟିଏ ମାଗଣା ରୋଷେଇ ଗ୍ୟାସ୍ ସିଲିଣ୍ଡର ପାଇପାରିବେ । ଏହା ସହିତ ବର୍ଷକୁ ଦୁଇଥର—ହୋଲି ଏବଂ ଦୀପାବଳି ସମୟରେ ଉଜ୍ଜ୍ୱଳା ହିତାଧିକାରୀଙ୍କୁ ମାଗଣା LPG ରିଫିଲ୍‌ର ସୁବିଧା ଦିଆଯାଉଛି ।

କେନ୍ଦ୍ରର ଉଜ୍ଜ୍ୱଳା ଯୋଜନା କ'ଣ ?

ଗରିବ ଏବଂ ଆବଶ୍ୟକତା ଥିବା ମହିଳାମାନଙ୍କୁ ରୋଷେଇ ଇନ୍ଧନ ଯୋଗାଇବା ଲକ୍ଷ୍ୟରେ କେନ୍ଦ୍ର ସରକାର ୨୦୧୬ ମସିହାରେ ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା ଆରମ୍ଭ କରିଥିଲେ । ଏହି ଯୋଜନା ଅଧୀନରେ ଯୋଗ୍ୟ ହିତାଧିକାରୀଙ୍କୁ LPG ସିଲିଣ୍ଡରରେ ସବସିଡିର ସୁବିଧା ମିଳିଥାଏ ।

ଦିଲ୍ଲୀରେ ୧୪.୨ କିଲୋଗ୍ରାମ୍ LPG ସିଲିଣ୍ଡରର ବଜାର ଦର ଅଧିକ ଥିବାବେଳେ, ଉଜ୍ଜ୍ୱଳା ଯୋଜନାର ହିତାଧିକାରୀମାନେ ସବସିଡି ଯୋଗୁଁ ତୁଳନାମୂଳକ କମ୍ ଦାମରେ ସିଲିଣ୍ଡର ପାଇପାରନ୍ତି ।

ଉଜ୍ଜ୍ୱଳା ଯୋଜନା ପାଇଁ କେଉଁ ଡକ୍ୟୁମେଣ୍ଟ ଦରକାର ?

ଯଦି ଆପଣ ଉଜ୍ଜ୍ୱଳା ଯୋଜନାର ଲାଭ ନେବାକୁ ଚାହୁଁଛନ୍ତି, ତେବେ ଆବେଦନ ସମୟରେ କିଛି ଆବଶ୍ୟକୀୟ କାଗଜପତ୍ର ଦରକାର ହୋଇପାରେ । ଏଥିରେ BPL ପ୍ରମାଣପତ୍ର କିମ୍ବା SECC ତାଲିକାରେ ନାମ, ପରିଚୟପତ୍ର, ଠିକଣା ପ୍ରମାଣ, PAN କାର୍ଡ, ବ୍ୟାଙ୍କ ପାସବୁକ୍‌, ଜାତି ପ୍ରମାଣପତ୍ର ଏବଂ ପାସପୋର୍ଟ ସାଇଜ୍ ଫଟୋ ଭଳି ଡକ୍ୟୁମେଣ୍ଟ ଆବଶ୍ୟକ ।