ଗ୍ରେଟର ନୋଏଡାରେ ଜଣେ ୧୬ ବର୍ଷୀୟା ଛାତ୍ରୀଙ୍କ ମୃତ୍ୟୁ ସମଗ୍ର ଅଞ୍ଚଳକୁ ଥରାଇ ଦେଇଛି । ଏହି ଘଟଣା ସେତେବେଳେ ଘଟିଛି ​​ଯେତେବେଳେ ଜଣେ ଦଶମ ଶ୍ରେଣୀର ଛାତ୍ରୀଙ୍କୁ ତାଙ୍କ ପ୍ରି-ବୋର୍ଡ ପରୀକ୍ଷା ସମୟରେ AI ଉପକରଣ ବ୍ୟବହାର କରୁଥିବା ସନ୍ଦେହରେ ପଚରା ଉଚରା କରାଯାଇଥିଲା ।

ପୋଲିସର ସୂଚନା ଅନୁଯାୟୀ, ପରୀକ୍ଷା ସମୟରେ ଛାତ୍ରୀ ଜଣକ ମୋବାଇଲ ଫୋନ୍ ମାଧ୍ୟମରେ AI ଟୁଲ୍ସ ବ୍ୟବହାର କରୁଥିବା ଜଣାପଡ଼ିଥିଲା । ଏହା ପରେ ସ୍କୁଲ ଶିକ୍ଷକ ଏବଂ ପ୍ରିନ୍ସିପାଲ ତାଙ୍କୁ ଏନେଇ ପଚରାଉଚରା କରିଥିଲେ । ମୃତ ଛାତ୍ରୀଙ୍କ ବାପା କହିଛନ୍ତି ଯେ ତାଙ୍କ ଝିଅକୁ ସ୍କୁଲ ପ୍ରଶାସନ ମାନସିକ ନିର୍ଯାତନା ଏବଂ ସାର୍ବଜନୀନ ଅପମାନ ଦେଇଥିଲେ । ଅପମାନ ଏବଂ ଧମକ ଯୋଗୁଁ ଗୁରୁତର ମାନସିକ ଚାପ ସୃଷ୍ଟି ହୋଇଥିଲା, ଯାହା ଫଳରେ ତାଙ୍କର ଦୁଃଖଦ ମୃତ୍ୟୁ ଘଟିଥିଲା ବୋଲି ତାଙ୍କ ବାପା କହିଛନ୍ତି । ସ୍କୁଲ ଅଧିକାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଦାବି କରିଛନ୍ତି ମୃତ ଛାତ୍ରୀଙ୍କ ପିତା ।

କ’ଣ ଛାତ୍ରୀଙ୍କ ମୃତ୍ୟୁ ଏଆଇ-ଭିତ୍ତିକ ସହାୟତା ସନ୍ଦେହରୁ ହୋଇଥିଲା?

ପୋଲିସ ଅନୁଯାୟୀ, ଏହି ଘଟଣା ଡିସେମ୍ବର ୨୩ ତାରିଖରେ ଗ୍ରେଟର ନୋଏଡା ପଶ୍ଚିମରେ ଘଟିଥିଲା । ପରୀକ୍ଷା ସମୟରେ ଛାତ୍ରୀ ଜଣଙ୍କ ମୋବାଇଲ ଫୋନରେ AI ଭିତ୍ତିକ ସହାୟତା ବ୍ୟବହାର କରୁଥିବା ଜଣାପଡ଼ିଥିଲା । ଏହା ପରେ ସ୍କୁଲ ଅଧିକାରୀମାନେ ତାଙ୍କୁ ପଚରା ଉଚରା କରିଥିଲେ । ପରିବାର ପକ୍ଷରୁ କୁହାଯାଇଛି ଯେ ପ୍ରଶ୍ନ ଏବଂ ଅପମାନଜନକ ଆଚରଣ ଛାତ୍ରୀଙ୍କ ଭାବନାକୁ ଗୁରୁତର ଭାବରେ ପ୍ରଭାବିତ କରିଥିଲା ।

ସେପଟେ ତାଙ୍କ ପିତାଙ୍କ ଅଭିଯୋଗଗୁଡ଼ିକୁ ସ୍କୁଲ ପ୍ରଶାସନ ପକ୍ଷରୁ ଅସ୍ୱୀକାର କରାଯାଇଛି । ସ୍କୁଲ୍‌ ପକ୍ଷରୁ କୁହାଯାଇଛି ଯେ ତାଙ୍କୁ ସିବିଏସଇ ପରୀକ୍ଷା ନିୟମ ଅନୁଯାୟୀ ପଚରା ଉଚରା କରାଯାଇଥିଲା । ଆଉ ଏହି ଆଲୋଚନା ସଂକ୍ଷିପ୍ତ ଥିଲା । ପ୍ରିନ୍ସିପାଲ କହିଛନ୍ତି ଯେ ଛାତ୍ରୀଙ୍କ ସହ ଆଲୋଚନା ସଂକ୍ଷିପ୍ତ, ନିୟମାବଳୀ ଅନୁଯାୟୀ ହୋଇଥିଲା ଏବଂ କୌଣସି ଦୁର୍ବ୍ୟବହାର ହୋଇନାହିଁ । ସ୍କୁଲ କହିଛି ଯେ ଛାତ୍ରୀଙ୍କ ମୋବାଇଲ୍ ଫୋନ୍ ଜବତ କରାଯାଇଛି ଏବଂ ତାଙ୍କୁ CBSE ପରୀକ୍ଷା ନିୟମାବଳୀ ଅନୁଯାୟୀ ହିଁ ପଚରା ଉଚରା କରାଯାଇଛି ।

ଛାତ୍ରୀଙ୍କ ମୃତ୍ୟୁ ସମ୍ପର୍କରେ ଏପର୍ଯ୍ୟନ୍ତ ପୋଲିସର ଅପଡେଟ୍ କ’ଣ?

ପୋଲିସ ନିଶ୍ଚିତ କରିଛି ଯେ ସ୍କୁଲ୍ ସିସି ଟିଭି ଫୁଟେଜ୍ ପ୍ରଦାନ କରିଛି ଏବଂ ତଦନ୍ତ ଆରମ୍ଭ ହୋଇଛି । ଛାତ୍ରୀ ଜଣକ ପ୍ରକୃତରେ ମାନସିକ ଚାପର ଶିକାର ହୋଇଥିଲେ କି ତାହାକୁ ନେଇ ତଦନ୍ତ ଜାରି ରହିଛି । ତଦନ୍ତ ରିପୋର୍ଟ ଆଧାରରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ୍‌ ପକ୍ଷରୁ କୁହାଯାଇଛି ।