ନବରାତ୍ରୀରୁ ଦେଶରେ ଲାଗୁ ହୋଇଛି GST 2.0 । ଏହି ଅବସରରେ ରାଷ୍ଟ୍ର ଉଦ୍ଦେଶ୍ୟରେ ସମ୍ବୋଧନ କରି ଦେଶବାସୀଙ୍କୁ ପାର୍ବଣ ଶୁଭେଚ୍ଛା ଜଣାଇବା ସହ ନେକ୍ସଟ୍-ଜେନେରେସନ ଜିଏସଟିକୁ ନୂତନ ସୂର୍ଯ୍ୟ ଉଦୟ ସହ ତୁଳନା କରିଛନ୍ତି ପିଏମ ମୋଦି । ତେବେ ନେକ୍ସଟ୍-ଜେନେରେସନ୍ ଜିଏସଟିରେ ଅତ୍ୟାବଶ୍ୟକ ଖାଦ୍ୟ, ଔଷଧ, ଜୀବନ ବୀମା, ସ୍ବାସ୍ଥ୍ୟ ବୀମା ହେବ GST ମୁକ୍ତ ।
ସେହିପରି ଛେନା, ପନିର୍ ଓ ପାଉଁରୁଟି ପରି ଖାଦ୍ୟ, ୩୩ ଜରୁରୀ ଔଷଧ ସହ ଜୀବନ ବୀମା ଓ ସ୍ବାସ୍ଥ୍ୟ ବୀମାକୁ ସମ୍ପୂର୍ଣ୍ଣ GST ମୁକ୍ତ କରାଯାଇଛି । ଶିକ୍ଷା ସହ ଜଡ଼ିତ ସାମଗ୍ରୀ ମ୍ୟାପ୍, ଚାର୍ଟ, ଗ୍ଲୋବ, ପେନସିଲ, ରବର, ବହି ଓ ନୋଟବୁକକୁ ମଧ୍ୟ ଟିକସ ମୁକ୍ତ କରାଯାଇଛି । ଦୈନନ୍ଦିନ ଜୀବନରେ ବ୍ୟବହୃତ ସାବୁନ, ସାମ୍ପୁ, ଟୁଥପେଷ୍ଟ, ଟୁଥ ବ୍ରସ୍, ସେଭିଙ୍ଗ କ୍ରିମ୍ ପରି ସାମଗ୍ରୀ ଉପରେ ଏଣିକି ୧୮% ବଦଳରେ ଲାଗୁ ହେବ ୫% GST ।

ଅଧିକ ପଢ଼ନ୍ତୁ: ଆଜିଠୁ GST ସଞ୍ଚୟ ଉତ୍ସବ, ଲାଭବାନ ହେବେ ଚାଷୀ ଓ ସାଧାରଣ ଲୋକ

ସେହିପରି ବଟର, ଘିଅ, ନମକୀନ, ଭୁଜିଆ, ମିକ୍ସର, ବାସନକୁସନ, ନାପକିନ୍, ସିଲେଇ ମେସନ୍ ଓ ଯନ୍ତ୍ରାଂଶ ଉପରେ GST ୧୨%ରୁ ୫%କୁ ହ୍ରାସ ପାଇଛି । ଏହି ନୂଆ ସ୍ଲାବ ମଧ୍ୟବିତ୍ତଙ୍କ କ୍ରୟ ଶକ୍ତି ବୃଦ୍ଧି କରିବା ସହ ଗରିବଙ୍କ ପାଇଁ ବଡ଼ ଉପହାର ସାବ୍ୟସ୍ତ ହୋଇଛି । ଅନ୍ୟପକ୍ଷରେ ବିଳାସମୟ ସାମଗ୍ରୀ ଓ ତମାଖୁ ଜାତ ସାମଗ୍ରୀକୁ ସ୍ବତନ୍ତ୍ର ୪୦% ସ୍ଲାବରେ ରଖାଯାଇଛି । ଟ୍ରାକ୍ଟର, ବାୟୋ ପେଷ୍ଟିସାଇଡ୍, ସ୍ପ୍ରଙ୍କଲର ଉପରେ ଜିଏସଟି ୫% କୁ କମିଥିବାରୁ ଲାଭବାନ ହେବେ ଚାଷୀ । ଏସି, ଟିଭି, ମନିଟର, ପ୍ରୋଜେକ୍ଟର ପରି ଇଲେକ୍ଟ୍ରୋନିକ୍ସ ସାମଗ୍ରୀ ଉପରେ ୨୮%ରୁ ୧୮% କୁ ଖସିଛି ଜିଏସଟି ।